“GİLAN” “LERİK” OLDU | Ölkə

	12 fevral 2012


Onlayn ictimai-siyasi qəzet

Ölkə

“GİLAN” “LERİK” OLDU

2010-03-10

Qaraçuxurda basqına məruz qalan restoranın adı dəyişdi

Yanvarın 26-dan 27-nə keçən gecə Suraxanı rayonu, Qaraçuxur qəsəbəsində yerləşən “Gilan” şadlıq sarayına basqın edilmişdi. İlkin məlumatlarda bildirilirdi ki, 3 nəfər maskalı şəxs şadlıq sarayının gözətçisi Rasim Eyvazovun əl-ayağını bağlayaraq seyflərin birindən 150 min manat götürüb, içində 300 min dollar və sənədlər olan digər seyfi isə özləri ilə aparıblar.

Qeyd edək ki, ölkədə “Gilan” ticarət nişanı fövqəladə hallar naziri Kəmaləddin Heydərova məxsus olduğundan Qaraçuxur qəsəbəsindəki “Gilan” şadlıq sarayının da bu şəbəkəyə daxil olması ehtimal edilirdi. Restoranın sahibi Hacı Vaqif Əsgərov isə “Yeni Müsavat”a açıqlamasında “Gilan Holdinq”lə heç bir əlaqələrinin olmadığını söyləyib: “Gilan mənim ata vətənimdir. Özüm də 52 ildir ki, Suraxanı rayonunda işləyirəm. Bu illər ərzində bu obyektin ”Gilan Holdinq"lə heç bir əlaqəsi olmayıb. Mən bu restoranı “Gilan Holdinq” yaranmamışdan dörd il qabaq açmışam. Səhvim onda olub ki, o vaxt mən “Gilan” markasını özəlləşdirməmişəm... Burda olanların “Gilan Holdinq”ə nə aidiyyatı var, bilmirəm. İndi məcburam mən buranın adını dəyişim. Çünki istəmərəm ki, hər xırda problemi “Gilan Holdinq” kimi böyük bir şirkətin ayağına yazsınlar".
Artıq “Gilan” restoranının adı dəyişib. Dünən Qaraçuxurdan təsadüfən yol ötən əməkdaşlarımızdan biri “Gilan”ın adının “Lerik”lə əvəzlənməsinin şahidi olub. Bizə çatan məlumatlara görə, “Gilan”da baş verən oğurluqdan sonra K.Heydərovun adamları Hacı Vaqifə tez bir zamanda restoranının adını dəyişmək barədə xəbər göndəriblər. Təbii ki, restoran sahibi olan şəxs bu xəbərdarlığa əməl etməyə bilməzdi. Çünki müqavimət göstərəcəyi halda, Fövqəladə Hallar Nazirliyinin əməkdaşları oranı hansısa bir bəhanə ilə möhürləyə bilərdilər.

M.MAHRIZLI

1923 dəfə baxılıb