“ŞEYXİN QARDAŞI KİMİ BƏZİ ŞEYLƏRDƏN ÇƏKİNİRƏM”

	13 fevral 2012


Onlayn ictimai-siyasi qəzet

Ölkə

“ŞEYXİN QARDAŞI KİMİ BƏZİ ŞEYLƏRDƏN ÇƏKİNİRƏM”

2010-03-11

Cavanşir Paşazadə müxalifətçiləri yas yerlərindən sui-istifadə etməkdə suçladı

Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadənin qardaşı, deputat Cavanşir Paşazadə APA-ya müsahibəsində bildirib ki, parlamentin üzvü seçiləndə “Qızılağac” dövlət qoruğunun direktoru işləyirmiş: “Deputat seçildiyim ərazi mənim doğulduğum, işlədiyim yerdir. Bu ərazinin camaatı məni çox yaxşı tanıyır. İşlədiyim bütün vəzifələrdə, o cümlədən ”Qızılağac" dövlət qoruğunun direktoru olan vaxtda da insanlar fəaliyyətimdən razı olub. Qoruğun rəhbəri olanda bir ovçunun belə tutulmasına razılıq verməmişəm. Çalışmışam ki, insanlar ancaq yüngül cərimələr, şərti cəzalarla cəzalandırılsın. Yəni deputatlığa namizəd olanda camaatın içinə çıxmağa üzüm olub, təbliğat zamanı heç kimə artıq məlumat verməyə ehtiyacım olmayıb".

C.Paşazadə “Şeyxin qardaşı olmaq xeyrinizə işləyir, ya ziyanınıza” sualına belə cavab verib: “Şeyxin qardaşı olmaq hər şeydən əvvəl mənim üçün şərəfdir. O, artıq 31-ci ildir ki, Qafqazın şeyxidir. Şeyxin qardaşı olmaq mənim üzərimə böyük məsuliyyət qoyur. Adam istər-istəməz bəzi şeylərdən çəkinir, yalan danışa bilmir, insanlara qarşı rəhmdil olur. Başqası mənim bir səhvimi görəndə bunu şeyxin qardaşı olduğum üçün etdiyimi düşünüb daha artığını etməyə çalışa bilər. Bunun üçün hər addımı ölçüb-biçməli olursan. Ona görə də şeyxin qardaşı olmağın çətin tərəfləri də var”.
C.Paşazadə “Təzəpir” məscidində həyata keçirilən təmir-bərpa işlərinə nəzarət etməsi ilə bağlı da sualı cavablandırıb: “Bu işlərin hamısı dövlət başçısının tapşırığı ilə görülüb. Mənim bu işlərə nəzarət etmək tapşırılıb, çalışmışam ki, göstərilən etimadı yüksək səviyyədə doğruldum. Şeyxlə müsəlman dövlətlərinə səfərə gedəndə böyük ibadət ocaqlarının ziyarəti zamanı onun hansı hisslər keçirdiyinin şahidi olmuşam. O, çox istəyirdi ki, Azərbaycanda da belə bir abidə olsun. Burada tikinti və təmir gedən vaxt prezident İlham Əliyev tez-tez, hətta gecə vaxtı gəlib işin gedişi ilə tanış olub, tapşırıqlarını verib. Burada böyük işlər görülüb. Təsəvvür edin ki, ”Təzəpir" məscidinin günbəzi 24 əyarlıq xalis qızıldandır. Bu, çox böyük bir vəsaitdir. Onun işlənmə üsulunun dünyada analoqu yoxdur. Bu gün “Təzəpir”də birdəfəyə 3 min nəfərlik yemək hazırlamaq üçün mətbəx fəaliyyət göstərir. Hər biri 300 nəfərlik olmaqla, 6 zal var. Bu zalların təmizliyi ən yüksək səviyyədə təmin olunub. Artıq insanların küçələrdə çadır qurub yas mərasimi keçirməsinə ehtiyac qalmayıb. Açığı, indi bəzi müxalifətçilər üçün danışıq yeri qalmayıb, onlar camaatın yasından istifadə edib öz fikirlərini səsləndirirdilər. Onlar ölkədə görülən işlərə qara yaxmaq üçün gedib kiminsə yasından istifadə edirdi. Burada isə belə şeylərə imkan yoxdur".

Xəbər xidməti

2013 dəfə baxılıb