JURNALİSTLƏR BU DƏFƏ DƏ ƏFV FƏRMANINA DÜŞMƏYƏCƏK

	13 fevral 2012


Onlayn ictimai-siyasi qəzet

Ölkə

JURNALİSTLƏR BU DƏFƏ DƏ ƏFV FƏRMANINA DÜŞMƏYƏCƏK?

2010-03-13

Hüquq müdafiəçiləri onlarla bağlı ölkə başçısına müraciət etməyə hazırlaşır

Kütləvi informasiya vasitələri bir neçə gündür ki, Novruz bayramı ərəfəsində əfv fərmanının veriləcəyi barədə məlumatlar yayır. Lakin həbsdə olan baş redaktorların və bloggerlərin budəfəki əfvə düşəcəyinə ümidlər aşağı qiymətləndirilir. Çünki onlar hakimiyyətə yarınmaq üçün əfv ərizəsi yazmaqdan imtina ediblər. Məhbus redaktorlar Eynulla Fətullayev və Qənimət Zahid əfv üçün müraciət etməyəcəklərini bir daha bildiriblər.

Bu barədə “Yeni Müsavat”a onların hüquqlarını müdafiə edən vəkil Elçin Sadıqov məlumat verib. Lakin o bildirib ki, redaktorların əfv üçün müraciət etməməsi onların adlarının əfv fərmanına düşməməsi üçün ola bilməz: “Onlar müraciət etməyəcəklər. Çünki heç bir cinayət törətməyiblər. Həm də əfv olunmaq üçün onların müraciət etməsi mütləq tələb olunmur. Əsasnaməyə görə, müraciəti məhbus özü də edə bilər, beynəlxalq təşkilatlar da”.
Qənimət Zahidin həyat yoldaşı Ayəndə Mürsəliyeva isə bildirib ki, nə özü, nə də Q.Zahid əfv üçün müraciət etməyəcəklər: “Qənimət heç bir günah işlətməyib, qondarma ittihamla həbs olunub. O, heç bir zaman əfv ərizəsi yazmayacaq”. Bunula belə, A.Mürsəliyeva düşünür ki, əfv ərizəsi yazmasa belə, Q.Zahid əfv fərmanına düşə bilər: “İstəsələr, onu azadlığa buraxa bilərlər. Bu, hakimiyyətin, dövlət başçısının səlahiyyətindədir ”.
“Gündəlik Azərbaycan” və “Realnıy Azerbaydjan” qəzetlərinin təsisçisi və baş redaktoru Eynulla Fətulayevin atası Emin Fətullayev də əfv üçün müraciət etmək fikrində deyil. Emin Fətullayev oğlunun Novruz əfvinə düşməyəcəyini də bildirib: “Bu, Eynullaya aid məsələ deyil. Onu əfvə salmaq istəsəydilər, belə çirkin iş açmazdılar”.
Həbsdə olan iki bloqçunun müdafiə komitəsinin koordinatoru Erkin Qədirli isə “Azadlıq” radiosuna deyib ki, artıq Apelyasiya Məhkəməsinin qərarından sonra hökm qüvvəyə minmiş sayılır və Adnan Hacızadənin və Emin Millinin əfvini hüquq müdafiəçiləri, ombudsman, yaxud başqa institutlar gündəmə gətirə bilər. Onun sözlərinə görə, bloqçuların özləri bunun üçün müraciət etməyib.
Hüquq Müdafiə Təşkilatlarının Monitorinq Qrupunun üzvü Çingiz Qənizadə isə “Yeni Müsavat”a bildirib ki, onların Əfv Komissiyasına göndərdikləri siyahıda iki baş redaktorun və iki bloggerin də adları var. O həmçinin qeyd edib ki, Hüquq Müdafiə Təşkilatlarının Monitorinq Qrupuna daxil olan hüquq müdafiəçiləri bir neçə günə dövlət başçısına əfvlə bağlı müraciət edəcəklər və müraciətdə həmin şəxslərin əfvi xahiş ediləcək.
Qeyd edək ki, ötən ilin dekabrında prezident İlham Əliyev məhkum edilmiş bir sıra şəxslərin əfv olunması haqqında sərəncam imzalayıb. 99 nəfərə şamil edilən sərəncama əsasən, yalnız bir jurnalist - “Bizim yol” qəzetinin əməkdaşı Müşfiq Hüseynov əfv edilib.

R.RƏFİYEVA

380 dəfə baxılıb