PARLAMENTDƏ QOCALAN DEPUTATLAR | Ölkə

	12 fevral 2012


Onlayn ictimai-siyasi qəzet

Ölkə

PARLAMENTDƏ QOCALAN DEPUTATLAR

2010-03-15

Hakim düşərgəni təmsil edən əksər millət vəkilləri Milli Məclisdə ömürlük “srok” çəkmək arzusundadırlar
Amma bu il onların xeylisinin mandatı əlindən alınacaq

Bu ilin sonuna yaxın parlament seçkiləri keçiriləcək. Bu, müstəqil Azərbaycan tarixində dördüncü parlament seçkisidir. Milli Məclisə beş ildən bir keçirilən parlament seçkilərində Azərbaycanın müxtəlif ərazilərini təmsil edən millət vəkilləri seçilir.

Parlamentdə xeyli deputat var ki, onlar 20 ildir kreslolarından tərpənmirlər. Bu yazıda onların bəziləri haqda söhbət açmaq istəyirik.
Parlamentin ən stajlı deputatlarından biri Zeynəb Xanlarovadır. Zeynəb xanım hələ SSRİ dövründən deputat mandatı daşıyır. On birinci və on ikinci çağırış Azərbaycan Respublikası Ali Sovetinin deputatı, birinci və ikinci çağırış Azərbaycan Respublikası Milli Məclisinin deputatı olub. Milli Məclisin Mədəniyyət komitəsinin üzvüdür. 50 saylı Qobustan-Xızı-Quba seçki dairəsindən seçilib.
Arif Rəhimzadə 61 saylı Neftçala seçki dairəsindən seçilib. 69 yaşı var. On birinci və on ikinci çağırış Azərbaycan Respublikası Ali Sovetinin, birinci və ikinci çağırış Azərbaycan Respublikası Milli Məclisinin deputatı olub, 1994-cü il oktyabrın 14-dən 2005-ci il dekabrın 2-dək parlament sədrinin birinci müavini vəzifəsində çalışıb. Milli Məclisin Regional məsələlər komitəsinin sədridir.
4 saylı Naxçıvan şəhər seçki dairəsində seçilən Eldar İbrahimov Yeni Azərbaycan Partiyası Siyasi Şurasının üzvüdür. 65 yaşı var. On birinci çağırış Naxçıvan Muxtar Respublikası Ali Sovetinin deputatı, 12-ci çağırış Azərbaycan Respublikası Ali Sovetinin deputatı, birinci və ikinci çağırış Azərbaycan Respublikası Milli Məclisinin deputatı olub. Milli Məclisin Aqrar siyasət komitəsinin sədridir.
Yeni Azərbaycan Partiyası Siyasi Şurasının və İdarə Heyətinin üzvü Mixail Zabelin on ikinci çağırış Azərbaycan Respublikası Ali Sovetinin, birinci və ikinci çağırış Azərbaycan Respublikası Milli Məclisinin deputatı olub. 12 saylı Qaradağ-Binəqədi-Yasamal seçki dairəsindən seçilib. 64 yaşı var.
85 saylı Şamaxı seçki dairəsindən seçilən Maqsud İbrahimbəyov on birinci və on ikinci çağırış Azərbaycan Respublikası Ali Sovetinin deputatı, birinci və ikinci çağırış Azərbaycan Respublikası Milli Məclisinin deputatı olub. 75 yaşı var.
63 yaşlı Madər Musayev 12-ci çağırış Azərbaycan Respublikası Ali Sovetinin, birinci və ikinci çağırış Azərbaycan Respublikası Milli Məclisinin deputatı olub. Milli Məclisin Hüquq siyasəti və dövlət quruculuğu komitəsinin üzvüdür.
72 saylı Yardımlı-Masallı seçki dairəsindən seçilən Sabir Rüstəmxanlı 12-ci çağırış Azərbaycan Respublikası Ali Sovetinin, birinci və ikinci çağırış Azərbaycan Respublikası Milli Məclisinin deputatı olub.
YAP icra katibinin müavini Mübariz Qurbanlı da neçə illərdir deputat mandatı daşıyır. Birinci və ikinci çağırış Azərbaycan Respublikası Milli Məclisinin deputatı olub. Milli Məclisin Hüquq siyasəti və dövlət quruculuğu komitəsinin üzvüdür.
116 saylı Qəbələ seçki dairəsindən deputat olan Fəttah Heydərov birinci və ikinci çağırış Azərbaycan Respublikası Milli Məclisinin deputatı olub. Milli Məclisin Regional məsələlər komitəsi sədrinin müavinidir. 72 yaşı var.
Millət vəkili Hadı Rəcəbli Yeni Azərbaycan Partiyasının üzvüdür. Birinci və ikinci çağırış Azərbaycan Respublikası Milli Məclisinin deputatı olub. Milli Məclisin Sosial siyasət komitəsinin sədridir. 63 yaşı var.
İmamverdi İsmayılov 1995-ci ildən deputatdır. 52 yaşı var. Milli Məclisin Mədəniyyət komitəsinin üzvüdür. 125 saylı Zəngilan-Qubadlı seçki dairəsindən seçilib.
52 yaşlı Əhəd Abıyev birinci və ikinci çağırış Azərbaycan Respublikası Milli Məclisinin deputatı olub. 70 saylı Masallı şəhər seçki dairəsini təmsil edir.
11 saylı Qaradağ seçki dairəsindən seçilən Murtuz Ələsgərov Yeni Azərbaycan Partiyası sədrinin müavinidir. 82 yaşı var. Birinci və ikinci çağırış Azərbaycan Respublikası Milli Məclisinin deputatı olub, 1996-cı il oktyabrın 16-dan 2005-ci il dekabrın 2-dək parlamentin sədri vəzifəsində çalışıb.
82 yaşlı Cəlal Əliyev 62 saylı Saatlı seçki dairəsindən seçilib. Yeni Azərbaycan Partiyası Siyasi Şurasının üzvüdür. Birinci və ikinci çağırış Azərbaycan Respublikası Milli Məclisinin deputatı olub.
Anar Məmmədxanov da artıq üçüncü dəfədir ki, parlamentə düşür. Suraxanı rayonundan deputatdır.
Naxçıvan “xan”ı Vasif Talıbov da deputatdır. Vasif Talıbov Yeni Azərbaycan Partiyası Siyasi Şurasının və İdarə Heyətinin üzvüdür. Birinci və ikinci çağırış Azərbaycan Respublikası Milli Məclisinin deputatı olub.
Az.TV-nin keçmiş sədri Nizami Xuduyev 15 ildir ki, deputatdır. Az.TV-dəki vəzifəsini itirsə də, deputat mandatını hələ saxlayır.
Gənc və perspektivli YAP-çı deputat Ziyafət Əsgərov deputatlıqda 10 ilini başa vurmaq üzrədir. Hazırda 1-ci vitse-spikerdir.
Ana Vətən Partiyasının sədri Fəzail Ağamalı nə az, nə çox, düz 15 ildir ki, yorulmadan deputat “işləyir”. 63 yaşı olsa da, hələ də həvəsdən düşməyib - yenə də deputat olmaq arzusundadır. 60 saylı Salyan-Neftçala seçki dairəsindən seçilib.

***

Şübhə yoxdur ki, növbəti parlament seçkilərində yuxarıda adlarını çəkdiyimiz deputatların əksəriyyəti kənarda qalacaq. Zatən bunun anonsunu hakimiyyət və YAP yetkililəri veriblər. Siyavuş Novruzov bu günlərdə ümumi şəkildə də olsa demişdi ki, bəzi deputatlar etimadı doğrultmadıqları üçün prosesdən kənarda qalacaqlar.

Şahnaz NOVRUZQIZI

1609 dəfə baxılıb