“AKKORD” “GƏNCLİK”də KÖRPÜ-TUNEL TİKİNTİSİNƏ BAŞLADI

	13 fevral 2012


Onlayn ictimai-siyasi qəzet

Ölkə

“AKKORD” “GƏNCLİK”də KÖRPÜ-TUNEL TİKİNTİSİNƏ BAŞLADI

2010-03-16

Ərazidə üçmərtəbəli avtodayanacaq da nəzərdə tutulub

Nərimanov rayonu ərazisində, “Gənclik” metro stansiyasının yaxınlığına neçə gündür ki, ağır texnikalar gətirilib. Dünəndən etibarən isə metronun iki keçidi arasında avtodayanacaq kimi istifadə olunan ərazidə qazıntı işlərinə başlanılıb. Qazıntı işləri “Akkord” Şirkətlər Qrupu tərəfindən aparılır. “Atatürk parkı”nın qarşısındakı meydan hasarlanıb, avtomobillərin giriş-çıxışına icazə verilmir.

“Akkord” Şirkətlər Qrupunun ictimaiyyətlə əlaqələr şöbəsinin rəhbəri Afaq Quliyeva lent.az-a bildirib ki, Nəqliyyat Nazirliyi Bakı şəhərində nəqliyyatın hərəkətinin tənzimlənməsi və yol infrastrukturunun təkmilləşdirilməsi layihələri üzrə tender keçirib. “Gənclik” metro stansiyasının ətrafındakı “Qələbə” meydanı və onunla kəsişən yollarda nəqliyyatın hərəkətinin nizamlanmasını, tıxacların aradan qaldırılmasını və işıqforsuz hərəkət rejiminin təminini nəzərdə tutan bu layihə üzrə tenderin qalibi “Akkord” Şirkətlər Qrupu olub.
Onun sözlərinə görə, yeni layihə ərazidə 5 tunelin və üçmərtəbəli yeraltı avtomobil dayanacağının inşasını, həmçinin əlaqədar yolların genişləndirilməsini nəzərdə tutur. Layihəyə əsasən, “Gənclik” metro stansiyasının Atatürk prospektinə baxan girişinin “Qələbə" meydanının mərkəzinə doğru yerdəyişməsi həyata keçiriləcək. Bu məsələ artıq Bakı Metropoliten İdarəsi ilə razılaşdırılıb.
Afaq Quliyeva bildirib ki, layihə üzrə işlərə aprel ayında start veriləcək. Plana əsasən, “Akkord” Şirkətlər Qrupu tərəfindən ilk olaraq, ərazidə mövcud olan çoxsaylı kommunikasiya xətlərinin dəyişdirilməsi işləri həyata keçiriləcək. Ərazidə nəqliyyatın hərəkətini tam məhdudlaşdırmamaq üçün ilk olaraq layihə üzrə ərazidə 2 tunel inşa ediləcək. Bundan sonra isə ardıcıl olaraq 3, 4 və 5 saylı tunellərin inşası həyata keçiriləcək. Ərazidə yaşıllaşdırma işlərinin aparılması da nəzərdə tutulub.
Artıq ərazidə işlərin aparılması üçün “Akkord” Şirkətlər Qrupunun mütəxəssislər qrupu, 200-ə yaxın işçi qüvvəsi və 40-a yaxın müvafiq texnikası səfərbər olunur. Tikinti ərazisində hasarlama işləri aparılır.
Xatırladaq ki, bir müddət əvvəl Nəqliyyat Nazirliyi katibliyinin rəhbəri Namiq Həsənov “Yeni Müsavat”a açıqlamasında bildirmişdi ki, sözügedən ərazidə körpü-tunel kompleksi tikiləcək: “Həmin ərazilərdə körpü tikilməsi gələcək planlarımıza daxildir. Hazırda bu barədə hələlik konkret məlumat verə bilmərəm. Çünki körpünün necə, smeta dəyərinin nə qədər olacağı haqda dəqiq məlumatım yoxdur. Amma bu ərazidə belə bir körpünün tikilməsi nəzərdə tutulub”.
Xatırladaq ki, layihəyə yeraltı tunellərin salınması da əlavə olunub. İnşa olunacaq körpünün bir neçə milyon manatlıq dəyəri var. Üçmərtəbəli körpü dörd istiqamətə - “Nərimanov” metrosu, Təbriz (Çapayev) küçəsi, 7-ci mikrorayon və Azadlıq prospektinə açılacaq. Körpünün tikilməsində əsas məqsəd paytaxtın həmin ərazisində tıxac problemini aradan qaldırmaqdır. Əldə etdiyimiz məlumata görə, körpü-tunel kompleksi Cənubi Qafqazda analoqu olmayan bir layihə olacaq. Belə körpülər dünyanın yalnız bəzi nəhəng şəhərlərində var.
Xatırladaq ki, bu layihə barədə ilk dəfə “Yeni Müsavat” qəzeti məlumat verib.