NAZİR QIZI HAKİMİYYƏTİ PARÇALAYIB

	12 fevral 2012


Onlayn ictimai-siyasi qəzet

Ölkə

NAZİR QIZI HAKİMİYYƏTİ PARÇALAYIB

2010-07-29

Erməni gənclə eşq macərası yaşayan nazir qızı ilə bağlı siyasilərin fikirləri haçalanır

Azərbaycanda nazir statusunda olan bir komitə sədrinin qızının Londonda erməni gənclə sevgi macərası yaşaması barədə xəbər cəmiyyətimizdə birmənalı qarşılanmayıb. Dünən “Yeni Müsavat”da çıxan sensasion məlumatda bildirilir ki, bu məsələ ortaya çıxandan sonra münasibətlərin kəsilməsi üçün qıza sərt təpki göstərilsə də, nazir qızı buna əhəmiyyət verməyərək erməni gənclə münasibətlərini davam etdirib.

Bildirilir ki, hazırda hakimiyyətin yuxarı eşalonunda da bu məsələ ciddi müzakirə olunur. Qızının hərəkətinə görə nazirin işdən qovulması ehtimalı hakimiyyətdəkiləri parçalayıb.
Elə siyasətçilərin də bu məsləyə münasibəti haçalanır. Ümid Partiyasının sədri İqbal Ağazadə deyir ki, insanların şəxsi həyatına müdaxilə etməyin tərəfdarı deyil: “Amma mən özüm nə erməni qızı almaram, nə də onunla yaşamaram. Kimsə erməni ilə yaşayırsa, bunu ictimai müzakirəyə çıxarmağın, naziri və qızını ictimai qınaq obyektinə çevirməyin tərəfdarı deyiləm. Nazir qızı olsa belə, belə məsələlərdə azad düşüncənin tərəfdarıyam”.
ADP sədri Sərdar Cəlaloğlu da nazirin qızının hərəkətində qəbahətli bir iş olmadığını deyir: “Əgər ailə siyasi motivlərlə qurulmayıbsa, yəni erməni həm də nazir qızından öz milli maraqlarına uyğun istifadə etmək istəmirsə, burada elə bir qəbahət yoxdur. Normal bir şeydir, buna kin, nifrət yaratmaq lazım deyil. Əgər qarışıq ailələr söhbəti qaldırılsa, onda gərək Azərbaycanda on milərlə ailə dağılsın. Bu gün Azərbaycanda o qədər azərbaycanlı qızı ilə evlənmiş məmurlar var ki, onlar dövlətimizə ermənilərdən artıq ziyan vurub, adına xələl gətiriblər. Sadəcə, nazirin fəaliyyətinə qiymət vermək lazımdır. Bu gün yüzlərlə qız və oğlana desək ki, sən öz erməni dostundan və ya aşnandan imtina elə, məgər Qarabağı bu yolla geri qaytara biləcəyik?”
S.Cəlaloğlu nazirin qızının məhz bu hərəkətinə görə vəzifədən götürülməsinin tərəfdarı deyil: “Baxmaq lazımdır ki, həmin nazir nə dərəcədə Azərbaycana, Azərbaycan xalqına xidmət edib. Məsələyə bu aspektdən yanaşılmalıdır. Bir vaxtlar xəbər yayıldı ki, bir nazirin oğlu ərə gedib. Nazirin öz fəaliyyəti ilə iqtisadiyyatımıza vurduğu zərbə müzakirə mövzusu olmalı olduğu halda, onun oğlunun ərə getməsi geniş diskussiyalara səbəb oldu. Hesab edirəm ki, nazirlərin özlərinin fəaliyyəti geniş müzakirə olunmalıdır”.
Qarabağ Azadlıq Təşkilatının sədri Akif Nağı isə baş verən hadisəni biabırçılıq sayır: “Rüsvayçı məsələdir. Oradakı diasporumuzun məsələyə münasibətini təqdir edirəm. Orada tərbiyəvi iş aparılmalıdır. Hesab edirəm ki, həmin nazirin erməni qarışığı var. Təəssüf ki, Azərbaycan məmurlarının xeyli hissəsinin etnik baxımdan qarışıqları böyükdür. Konkret bu məsələyə gəlincə araşdırma aparılmalı, nazir cəzalandırılmalıdır. Ən azı, elə bir qız tərbiyə etmiş valideyn Azərbaycanda nazir vəzifəsi tutmamalıdır”.
Redaksiyamıza daxil olan son məlumatda məsələnin yaxın günlərdə çözüləcəyi, yəni hakimiyyətin nazirlə bağlı qərar verəcəyi bildirilir.

E.QƏDİMOV

2242 dəfə baxılıb