SEL KÖÇKÜNLƏRİ “FÖVQƏLNAZİR”in YOLUNU GÖZLƏYİR

	13 fevral 2012


Onlayn ictimai-siyasi qəzet

Ölkə

SEL KÖÇKÜNLƏRİ “FÖVQƏLNAZİR”in YOLUNU GÖZLƏYİR

2010-07-29

Hökumət kompensasiyanın azlığından şikayətlənən sakinlərlə hələ də maraqlanmır

Daşqınla bağlı dəymiş ziyana görə əhaliyə veriləcək kompensasiya ilə razılaşmayan Sabirabad, Saatlı və İmişli kəndlərinin sakinləri çarəsiz qalıb. Hökumətin təklif etdiyi kompensasiyanın azlığından şikayətlənən sakinlər bildirir ki, məmurlar onları aldadır və yalan vədlər verir.

Doğrudan da belədir. Bu vədlərin doğru olmadığı artıq hər addımbaşı təsdiqlənir və belə görünür ki, hökumət seldən əziyyət çəkən sakinlərin problemlərini həll etmək niyyətində deyil. Qeyd edək ki, hazırda Sabirabadın su altında qalmış Qasımbəyli və Əsgərbəyli kəndlərində həyətlərdən qrunt suları tam çəkilməyib. Yaşayış evləri bərpa olunmayıb, Şirvan şəhərində yaradılmış çadır şəhərciyində hələ də əhali qalıb. Eyni zamanda sel köçkünlərinin digər qismi Sabirabadın Nizami və Sabir adına orta məktəblərində məskunlaşıb. Ancaq məktəblərdə məskunlaşan sakinlərin ərzaq problemi də həll olunmur.
Sakinlərin qəzetimizə verdiyi məlumata görə, ərzaq və içməli su problemləri olduğu kimi qalır. Sabirabad rayon prokuroru əhali ilə görüşdə sərt şəkildə bəyan edib ki, camaat onlara verilən məbləğlə razılaşmağa məcburdur, əks təqdirdə onları bu məbləğə zor gücünə razı salacaqlar. Sakinlər bildirir ki, Prezident Administrasiyasının önündə təşkil etdikləri etiraz aksiyasından sonra Sabirabadda polis tərəfindən izlənirlər. Belə ki, üzərində Çevik Polis Alayı yazılan polis maşınları əhalinin müvəqqəti yerləşdiyi məktəbin həndəvərini fasiləsiz nəzarətdə saxlayır ki, birdən kimsə etiraza təşəbbüs göstərər. Yeri gəlmişkən, sakinlər Prezident Administrasiyası önündə etiraz aksiyası keçirən zaman zona üzrə kurator Dəyanət Babayev onlara baş çəkəcəyini demişdi. Amma o da gəlməyib.
Qasımbəyli və Əsgərbəyli kəndlərinin sakinləri isə Sabirabadın icra başçısı Heydər Abbasovun verdiyi vədlərə inanaraq hələlik ümidlərini itirməyiblər. İcra başçısı sakinlərlə görüşündə söz verib ki, fövqəladə hallar naziri Kəmaləddin Heydərov yaxın günlərdə bölgəyə səfər edəcək və əhalinin problemlərini dinləyəcək. Sözügedən kəndlərin sakinləri isə K.Heydərovun yolunu gözləməkdədir.
Qasımbəyli sakini Şərafət Musayev qəzetimizə açıqlamasında bildirdi ki, hazırda problemlərin həlli istiqamətində müsbətə doğru heç bir yenilik yoxdur: “Heydər Abbasov bizə deyib ki, ya bu gün (dünən-red.), ya da sabah (bu gün-red.) fövqəladə hallar naziri bizimlə görüşə gələcək. Gözləyirik, amma ortada heç nə yoxdur”.
Əsgərbəyli kənd sakini Yalçın Şirinov bildirdi ki, aksiya keçirilən gündən bəri əhali ilə heç kim maraqlanmayıb: “Vəziyyət dəyişməyib. İndiyə qədər bir nəfər də olsun gəlib problemimizlə maraqlanmayıb. Konkret danışsaq, camaatı aldadırlar”.

Emil SALAMOĞLU

399 dəfə baxılıb