RUSTAVİDƏ GÜRCÜ-AZƏRBAYCAN UNİVERSİTETİ AÇILACAQ

	10 fevral 2012


Onlayn ictimai-siyasi qəzet

Ölkə

RUSTAVİDƏ GÜRCÜ-AZƏRBAYCAN UNİVERSİTETİ AÇILACAQ

2010-07-29

“Borçalı” Cəmiyyəti Dmanisidə “Elat mədəniyyəti” günləri keçirdi

İyulun 25-də “Borçalı” Cəmiyyətinin təşkilatçılığı ilə Dmanisidə (Gürcüstan) ikinci “Elat mədəniyyəti” günləri keçirildi. Başkeçid (Armudlu) yaylağında baş tutan tədbirə Azərbaycan və Türkiyənin Gürcüstandakı səfirliyindən, Cənubi Azərbaycandan nümayəndələr qatılmışdı.

Tədbiri folklorşünas Elxan Məmmədli açdı. Azərbaycanın Gürcüstandakı səfirliyinin nümayəndəsi Fəxri Hacıyev Gürcüstanda xalq mədəniyyəti ilə bağlı yaranan ənənələrdən danışıb dedi ki, gürcü və Azərbaycan xalqları arasında dostluğa səbəb olan hər toplantı dəstəklənməlidir.
“Borçalı” Cəmiyyətinin sədri Zəlimxan Məmmədli isə dedi ki, Borçalı türkləri min illərlə yaratdığı mədəniyyəti ortaya qoyub: “Borçalı uğrunda 20 illik mübarizə meydanında olan bir partiyanın Ali Məclis sədrliyindən istefa verdim. Bu gün hesabata gəldik. Amma təəssüf ki, mədəniyyətin qarşısına kötük atanlar var. Azərbaycan və Gürcüstan mədəniyyəti bir yerdə olmalıdır. Mədəniyyətin qarşısına keçəni Allah da qəbul etməz. Babalarımız qızıl balığın kürü tökdüyü bir zolaqda elə bir mədəniyyət yaradıb ki, dünya texnoloqları bunun qarşısında baş əyir. Qarının içində yağ, motalın içində pendir on illərlə qala bilər. Babalarımız bunu sübut edib. Biz böyük ənənələrdən gələn bu dəyərlərin ətrafına yığışmışıq”.
Z.Məmmədli Borçalı toplumunun dəyərlərindən də danışdı: “Ola bilsin, bir məmurun, ya bir hiylənin qarşısında geri çəkilərəm. Bunu qorxaqlığım kimi yox, əxlaqlı olmağım kimi qəbul elə. Millətin dil və yaşam haqqını pozmaq, toplumun dəyərlərini tapdamaq olmaz. Faxralı, Saraclı kəndinin adını dəyişmək olmaz. Gürcüstan konstitusiyasına sayğı ilə yanaşıram. Amma bu kənd adlarının dəyişdirilməsi beynəlxalq hüquqa ziddir. Bundan siyasi kapital toplamağa cəhd etmirik. Mən eyni zamanda bu respublikanın vətəndaşıyam, əslim-nəslim Gürcüstanda doğulub. Mən Gürcüstanın ərazi bütövlüyünü, demokratik inkişafını istəyirəm. Bu yaxınlarda Batumidə dövlət başçılarına verdiyimiz mesajlar dəstək aldı. Nəhayət, Türkiyə-Azərbaycan-Gürcüstan konfederativ dövlət modeli ortaya gəldi. Bu konfederasiya Qafqazı təhlükələrdən xilas edən ən güclü model olacaq. Gürcüstanda korrupsiya, rüşvət aradan qalxıb, Gürcüstan rus imperiyasına qarşı açıq mübarizə aparır. Bunu alqışlayırıq. Gürcüstana təcavüz olacağı təqdirdə biz də ön sıralara keçəcəyik”.
Cəmiyyət sədri dedi ki, Azərbaycanla Gürcüstan arasında aparılan danışıqlar öz bəhrəsini verir: “Rustavidə gürcü-Azərbaycan təmayüllü universitetin tikilməsi haqda qərar var. İnsanlarımız geri qayıdır, onlar Saakaşvilinin çağırışına cavab verdi. Başkeçiddəki canlanma Gürcüstanı sevindirməlidir”.
Türkiyənin Gürcüstandakı səfirliyinin nümayəndəsi Əhməd Ərdəm dedi ki, Türkiyə-Azərbaycan-Gürcüstan dostluğu özünü Armudlu yaylağında göstərdi: “Bu tədbir bizim mədəniyyətlərarası dayanışmanı ortaya qoyur. Buna görə dəyərli qardaşlarıma sevgilərimi çatdırıram”.
Dünya Azərbaycanlıları Konqresinin (DAK) sədr müavini Emin Eminbəyli tədbir iştirakçılarına xaricdə yaşayan azərbaycanlıların salamını çatdırdı və xaricdə yaşayan imkanlı şəxsləri Borçalıya sərmayə qoymağa çağırdı.
Tədbirin bədii hissəsində aşıqların ifasında saz havaları səsləndirildi. Cıdır təşkil olundu. Gənclər arasında idman yarışları keçirildi.

Leyla İLQAR, Bakı-Dmanisi-Bakı

398 dəfə baxılıb