KEÇMİŞ NAZİRİN QOHUMU ETİRAZ EDİR

	12 fevral 2012


Onlayn ictimai-siyasi qəzet

Ölkə

KEÇMİŞ NAZİRİN QOHUMU ETİRAZ EDİR

2010-09-09

Qənirə Hüseynova: “Heç kimin torpağını zəbt etməmişəm”

“Mənzər Cəfərovanın dedikləri cəfəngiyyatdır. Buzovnadakı Səhiyyə Nazirliyinin nəzdində olmuş yaşayış üçün nəzərdə tutulan ərazini hələ 1988-ci ildə qanuni şəkildə almışam və əlimdə Bakı Şəhər İcra Hakimiyyətinin sərəncamı var. Ona görə də kiminsə mülkünü mənimsəməkdə ittiham edilməyim yanlışdır. Yaşadığım binanın yaxınlığındakı 12 sot torpağı da qanunla almışam. Orada vərəm xəstəxanasının camaşırxanası yerləşirdi. Bina köhnə, uçuq idi.

O binanı qəzalı vəziyyətdə olduğu üçün 2003-cü ildə sökməyə başladım və ərazi istilikxana oldu. Əzizbəyov (indiki Xəzər) rayonunun polis rəisi Əhməd Əliyev günlərin birində bir neçə nümayəndəsi ilə Buzovnada gəzib özünə bağ yeri axtarmağa başlayır. Təsadüfən bu küçədən keçəndə görür ki, gözəl bir mənzərə dənizə açılır. Kənd bələdiyyəsinin sədrinə deyir ki, bura mənim olmalıdır. Əhməd Əliyev o yeri almaq üçün Mənzər Cəfərova adlı bir qadını qabağa verir ki, torpaq sahəsini onun vasitəsilə alsın”.
Bunu dünən redaksiyamıza təşrif buyuran vətəndaş Qənirə Hüseynova deyib. O, qəzetimizin 30 avqust tarixli sayında gedən “Keçmiş nazirin qohumu Bakı sakinin mülkünü mənimsəyib” başlıqlı yazıda şikayətçi M.Cəfərovanın dediklərinin doğru olmadığını bildirib. Onun sözlərinə görə, M.Cəfərova Xəzər Rayon Polis İdarəsinin rəisi Əhməd Əliyevin göstərişi əsasında günün birində əlində sərəncamla həmin həyətə gələrək bu ərazinin ona məxsus olduğunu iddia edib: “Biz də dedik ki, 1970-ci ildən burda yaşayırıq, indiyə kimi bu qadını burada görməmişik. Nə vaxt bu ərazi ona aid oldu? Aramızda narazılıq yarandı. Bu hadisədən sonra Əhməd Əliyevin müavinləri və digər nümayəndələri həyətə gələrək torpaq sahəsini ölçməyə başladı və 12 sot ərazinin Mənzər Cəfərovaya aid olduğunu dedilər. Mən sənədləri təqdim etdim. Amma polis rəisinin müavini bildirdi ki, doğrudur, sizin sənədləriniz qanunidir, ancaq buranı Əhməd Əliyev alacaq. Bu minvalla biz həmin qadınla mübarizə apardıq. Günün birində Əhməd Əliyev məni yanına çağırdı. Uzun söhbətdən sonra ona vəziyyəti başa saldım, dedim ki, həyat yoldaşım vəfat edib, əlimdə sənəd var. Məsələ həll olundu. Bundan sonra mən həmin 12 sot torpağı 2005-ci ildə bir nəfər fiziki şəxsə satdım”.
Q.Hüseynova deyir ki, M.Cəfərova bunu eşidən kimi yenidən fəaliyyətə keçib və Xəzər Rayon Məhkəməsinə üz tutub: “2008-ci ildən məhkəmə davam etdi və 2009-cu ildə iş mənim xeyrimə yekunlaşdı. Məlum oldu ki, Cəfərovanın sərəncamı saxtadır. Bu qadın Apelyasiya Məhkəməsinə müraciət etdi. Sentyabrın 6-da keçirilən məhkəmə prosesinə gəlmədi. Yəni bu qadının saxtakar olduğu aydınlaşdı”.
Xatırladaq ki, qəzetimizin 30 avqust sayında gedən məqalədə M.Cəfərova adlı şikayətçi iddia edirdi ki, keçmiş milli təhlükəsizlik naziri İmran Nərimanovun qohumu Q.Hüseynova Buzovnada ona məxsus olan 12 sot torpağı mənimsəyib.

Emil SALAMOĞLU

1026 dəfə baxılıb