İQTİSAD UNİVERSİTETİNDƏ REPRESSİYA KÜLƏKLƏRİ

	23 fevral 2012


Onlayn ictimai-siyasi qəzet

İqtisadiyyat

İQTİSAD UNİVERSİTETİNDƏ REPRESSİYA KÜLƏKLƏRİ

2012-01-29

Şəmsəddin Hacıyev 80 yaşlı professora qarşı
Bədirxan Musayevin rektorun əleyhinə məktubu “Yeni Müsavat”da dərc ediləndən sonra ona qarşı təzyiqlər artıb; bəzi müəllimlərin təkidi ilə çağırılan “zəhmətkeş iclasları”nın ardı-arası kəsilmir

Azərbaycan Dövlət İqtisad Universitetinin professoru, rektorun keçmiş müşaviri Bədirxan Musayev unversitetin rektoru, Milli Məclisin Təhsil komitəsinin sədri Şəmsəddin Hacıyevin ağlasığmaz cəza sanksiyalarına məruz qalıb. Qocaman professorun rektoru mətbuatda tənqid etməsindən dərhal sonra 37-ci ilin cəza metodunu xatırladan mexanizm işə düşüb. Bu barədə “Yeni Müsavat”a universitetdəki mənbələrdən məlumat daxil olub.

Mənbə bildirir ki, 80 yaşlı professor “Yeni Müsavat”da dərc edilən məktubundan sonra müşavir vəzifəsindən uzaqlaşdırılıb. Bunun ardınca Ş.Hacıyevin göstərişi ilə hüquq-mühafizə orqanlarına müraciət edilib. Adı B.Musayevin məktubunda çəkilən müəllimlər belə hesab edir ki, 80 yaşlı professor onlara bohtan atıb. Ancaq bu, hələ son deyil.
Bədirxan Musayev Universitet “zəhmətkeşlərinin” təkidi ilə Elmi Şuranın iclası çağırılıb və qocaman professorun hərəkətləri “universitetin nümunəvi kollektivinə qarşı ləkə” kimi qiymətləndirilib. Bu da azmış kimi, bir qrup müəllim B.Musayevə ən ağır cəza verilməsini tələb edib. Onlar cəzanın nədən ibarət olduğunu açıqlamasalar da rəhbərlikdən “qətiyyətli addımlar” atılmasını tələb ediblər. Heç bu da son deyil.
Elmi Şuranın ardınca universitetin ümumi yığıncağı keçirilib. Burada da B.Musayevin tənqidlərini özlərinə həqarət hesab edən bir qrup müəllim 80 yaşlı professora nifrinlər yağdırıb. Bununla da ürəyi soyumayan Ş.Hacıyevin göstərişi ilə Yeni Azərbaycan Partiyasının universitet şöbəsinin iclası çağırılıb (YAP-ın universitet şöbəsinin sədri Zəfər Bayramov da B.Musayevin tənqid hədəflərindən olub-red.). İclasda B.Musayevin hərəkətlərinə “siyasi qiymət” verilib və 80 yaşlı professor “dövlətçiliyə xəyanətdə” ittiham edilib.
Şəmsəddin Hacıyev Yada salaq ki, B.Musayev məktubunda universitetin rektoru Ş.Hacıyevi rüşvətxorluqda, qohumbazlıqda, yerlibazlıqda, qanunsuz tələbə köçürmələrində, universitetə məxsus mənzil kooperativini özününküləşdirməkdə, tədris yükünü süni şəkildə şişirtmədə ittiham etmişdi. Eyni məzmunlu məktubları Baş Prokuror yanında Korrupsiyaya Qarşı Mübarizə İdarəsinə, Daxili İşlər Nazirliyinə və Təhsil Nazirliyinə göndərən professor sadaladığı faktları özünün iştirakı ilə yoxlamağı tələb edirdi.
Ş.Hacıyev isə “Yeni Müsavat”a açıqlamasında barəsində olan ittihamları təkzib etmişdi: “Bədirxan Musayev yaşlı, xəstə adamdır. Aqoniya vəziyyətindədir. Bu adam intriqasız, qalmaqalsız yaşaya bilmir, yaxın adamlarının haqqında da ən ağlasığmaz böhtanları söyləməkdən çəkinmir”.
Görünür, “yaşlı və xəstə adam”ın dedikləri tam hədəfə dəyib ki, Ş.Hacıyev opponentini 37-ci ilin repressiya metodları ilə susdurmaq istəyir. Əks halda “yaşına və xəstəliyinə” hörmət edib susmaq olardı. Ən azı ona görə ki, “xəstə və yaşlı adam” son günlərə qədər Ş.Hacıyevin müşaviri (məsləhətçisi) olub və onun iqtisad elminə tövfəsi yetərincədir.
B.Musayev 60 ilə yaxındır universitetdə çalışır, bu müddətdə kafedra müdiri, dekan və prorektor vəzifələrində işləyib. İqtisad elmləri doktoru, respublika Dövlət mükafatı laureatı, yeni elmi istiqamətin - “iqtisadi kibernetika”nın yaradıcısıdır. 60-dan çox elmlər namizədi və doktoru yetişdirib, Türk Dünyası Beynəlxalq Araşdırmalar Akademiyasının akademikidir.
Yazıda adı çəkilən şəxslərin, o cümlədən hörmətli Ş.Hacıyevin mövqeyini dərc etməyə hazırıq.