KƏND BƏLƏDİYYƏLƏRİ ASSOSİASİYASININ FƏALİYYƏTİ MƏNFİ QİYMƏTLƏNDİRİLİB

	10 fevral 2012


Onlayn ictimai-siyasi qəzet

İqtisadiyyat

KƏND BƏLƏDİYYƏLƏRİ ASSOSİASİYASININ FƏALİYYƏTİ MƏNFİ QİYMƏTLƏNDİRİLİB

2010-02-02

Bələdiyyələrin 80 faizi assosiasiyanın fəaliyyəti barədə yetərincə məlumatlı deyil

Dünən İqtisadi Təşəbbüslərə Yardım İctimai Birliyinin (İTY İB) təşkilatçılığı ilə “Kənd Bələdiyyələri Milli Assosiasiyasının fəaliyyətinin qiymətləndirilməsi” mövzusunda dəyirmi masa keçirilib. Tədbiri giriş sözü ilə açan İTY İB eksperti Samir Əliyev bildirib ki, Kənd Bələdiyyələri Assosiasiyasının fəaliyyətinin qiymətləndirilməsi üçün tədqiqat aparılıb. Tədqiqat çərçivəsində ölkə qanunvericiliyi araşdırılıb, Avropa Şurasının bələdiyyə birlikləri ilə bağlı tövsiyələri öyrənilib, KBA-nın üzvü olan bələdiyyələr arasında sorğular keçirilib, millət vəkilləri, ekspertlər, QHT və KİV nümayəndələri ilə müsahibələr aparılıb, beynəlxalq təcrübə öyrənilib.

Tədbirə dövlət qurumları və bələdiyyə assosiasiyaları dəvət olunsa da iştirak etməyiblər. Ekspertə görə, onların iştirak etməməsi o deməkdir ki, sənəddə göstərilən irad və təkliflərlə razılaşırlar.
İTYİB-nin sədr müavini Rövşən Ağayev KBA-nın fəaliyyətinin qiymətləndirilməsinə dair tədqiqatın nəticələrini iştirakçıların diqqətinə çatdırıb. Onun sözlərinə görə, effektiv bələdiyyə institutunun formalaşması yerli özünüidarə birliklərinin fəaliyyətinin səmərəli qurulmasından əhəmiyyətli dərəcədə asılıdır. R.Ağayev Azərbaycanda bələdiyyə birliklərinin yaradılmasından artıq 3 il ötdüyünü bildirərək onların indiyədək hər hansı ciddi təşəbbüslərlə çıxış etməsinin müşahidə olunmadığını qeyd edib.
Bələdiyyələr arasında keçirilmiş sorğunun üzə çıxardığı məqamlardan danışan çıxışçı vəziyyətin heç də ürəkaçan olmadığını bildirib. Sorğuya cəlb olunan bələdiyyələrin təqribən 80 faizi assosiasiyanın fəaliyyəti barədə yetərincə məlumatlı sayılmır və onların 26 faizi bu qurumun fəaliyyətini yalnız üzvlük haqqı ödədikləri üçün xatırlayırlar. Respondent-bələdiyyələrin 74 faizi assosiasiyanın ötən 3 illik fəaliyyətinin səmərəsiz olduğu qənaətindədir. Respondent-bələdiyyələrin 90 faizi ötən dövr ərzində assosiasiyanın hər hansı xidmətindən faydalanmadıqlarını qeyd ediblər.
Azərbaycanda Vətəndaş Cəmiyyətinin İnkişafına Yardım Assosiasiyasının eksperti Vüqar Tofiqi çıxışında bildirib ki, bələdiyyə assosiasiyalarının indiki fəaliyyəti Azərbaycanda bələdiyyə sisteminə adekvatdır. Onun sözlərinə görə, assosiasiyalar müstəqil deyillər, sərbəst qərar qəbul etmək iqtidarında deyillər.
Tədbir müzakirələrlə davam edib.

Həbibə ABDULLA

438 dəfə baxılıb