“TURAN XƏZİNƏDAROĞLU İNŞAAT” RƏSMƏN MÜFLİS OLUR

	10 fevral 2012


Onlayn ictimai-siyasi qəzet

İqtisadiyyat

“TURAN XƏZİNƏDAROĞLU İNŞAAT” RƏSMƏN MÜFLİS OLUR

2010-02-08

Oğuzdan Bakıya su çəkən türk şirkəti məhkəməyə verildi

Türkiyənin ən iri inşaat şirkətlərindən olan və Azərbaycanda bir sıra iri infrastruktur layihələri həyata keçirən “Turan Xəzinədaroğlu İnşaat”ın ciddi maliyyə sıxıntıları içərisində olduğu haqda bir neçə ay əvvəl xəbər vermişdik. Xatırladaq ki, şirkət qlobal iqtisadi böhran və digər amillərin təsiri ilə ağır duruma düşərək kreditorlar qarşısında öhdəliklərini yerinə yetirə bilmirdi.

Dünən Türkiyə mediasında yer alan yeni xəbərə görə, şirkətin vəziyyəti daha da ağırlaşıb və rəsmən müflis olmaq təhlükəsi ilə üzləşib. Belə ki, şirkətin borclu olduğu “Optima Factoring” şirkəti “Turan Xəzinədaroğlu İnşaat”ın rəsmən müflis elan edilməsi üçün məhkəməyə iddia qaldırıb. “Emlakkulisi.com” saytının xəbərinə görə, şirkət bu iddia ilə “Turan Xəzinədaroğlu İnşaat”ın müflis elan edilməsi halında ondan borclarını məhkəmə yolu ilə almağı təmin etmək istəyir. Belə ki, əgər şirkət müflis elan edilsə, o zaman bütün əmlakı dövlətin xüsusi fondunun mülkiyyətinə keçəcək və onların satılması hesabına borcluların pullarının heç olmasa bir qismi ödəniləcək. İddiaya İstanbul Ədliyyə 6-cı Ticarət Məhkəməsi baxır. İlk iclas aprelin 15-nə təyin olunub. Bildirilir ki, hazırda “Turan Xəzinədaroğlu İnşaat” olduqca ağır günlərini yaşayır və üzərinə götürdüyü layihələri başa çatdırmaq iqtidarında deyil.
Xatırladaq ki, bundan əvvəl “Turan Xəzinədaroğlu İnşaat” son çarə kimi iflasın ertələnməsi üçün məhkəməyə müraciət etmişdi. Türkiyə qanunları imkan verir ki, məhkəmə tərəfindən bu müraciətə baxılması prosesində şirkət borcluların təqiblərindən yayınsın. Belə ki, prosesin davam etdiyi müddətdə heç bir bank və şirkət “Turan Xəzinədaroğlu İnşaat”dan alacaqlarını tələb edə bilməz. Əgər məhkəmə iflasın ertələnməsi haqda iddianı təmin etsə, o zaman şirkət maliyyə öhdəliklərini yerinə yetirmək üçün vaxt qazanacaq və fəaliyyətini davam etdirəcək. Əks halda şirkət özünü müflis elan edib bütün əmlakını dövlət qurumuna təhvil verməlidir. “Turan Xəzinədaroğlu İnşaat” məhkəməni inandırmağa çalışırdı ki, üzləşdiyi bu ağır durumdan çıxmaq və borc öhdəliklərini yerinə yetirə bilmək imkanı var. Şirkət İraqın Ərbil şəhərində və Azərbaycanda 350 milyon dollarlıq layihəsinin olduğunu da üzləşdiyi ağır durumdan çıxa bilmək üçün dəlil kimi göstərirdi. Bu iddia üzrə məhkəmə prosesi başa çatmadığı üçün şirkətin borclu olduğu qurumlar da onun rəsmən müflis elan edilməsinə çalışırlar.
“Turan Xəzinədaroğlu İnşaat” 1971-ci ildə qurulub və Türkiyənin ən aparıcı podratçı şirkətlərindən hesab olunur. Bu şirkət indiyədək Azərbaycan, Rusiya, Bolqarıstan, İraq, Liviya, Moldova, Rumıniya, Ukrayna ilə yanaşı Türkiyənin özündə də irimiqyaslı infrastruktur layihələrini həyata keçirib. Türkiyənin Müdafiə və Enerji nazirlikləri tərəfindən keçirilmiş bir çox tenderləri udub. Şirkətin sahibi iş adamı Turan Xəzinədaroğludur.
Xatırladaq ki, “Turan Xəzinədaroğlu İnşaat” indiyədək Azərbaycanda həyata keçirilən bir çox iri infrastruktur layihələrində əsas podratçı olub. Son olaraq isə təxminən yarım milyard dollara başa gələcək Oğuz-Qəbələ-Bakı su kəmərinin çəkilməsi layihəsinin bir hissəsi bu şirkətə həvalə olunub. Belə ki, “Azərsu” Səhmdar Cəmiyyəti ilə Oğuz-Qəbələ-Bakı su kəmərinin çəkilişi ilə bağlı “Turan Xəzinədaroğlu İnşaat”, “Tekser” və “Gəncə Körpütikinti-2" şirkətləri arasında bağlanan müqavilənin məbləği təqribən 143 milyon dollara yaxındır. Müqavilənin icra müddəti isə 14 aydır. Oğuz-Qəbələ-Bakı su kəmərinin çəkilməsi layihəsinin ümumi dəyəri isə 420 milyon manatdır. Lakin Azərbaycan hökumətinin türkiyəli ortağı maliyyə bataqlığına girib və son məlumatdan da göründüyü kimi oradan heç cür çıxa bilmir.

F.MƏMMƏDOV

1065 dəfə baxılıb