AVROPA “NABUCCO” LAYİHƏSİ ÜÇÜN HƏRƏKƏTƏ KEÇİR

	13 fevral 2012


Onlayn ictimai-siyasi qəzet

İqtisadiyyat

AVROPA “NABUCCO” LAYİHƏSİ ÜÇÜN HƏRƏKƏTƏ KEÇİR

2010-03-05

Reynhard Mitçek: “Bu ilin sonuna qədər hasilatçılarla müqavilə imzalanmasa layihə şübhə altında qalacaq”

Avropanın rus qazından asılılığını azaltmalı olan “Nabucco” qaz kəməri ətrafında yeni suallar ortaya çıxıb. Milyardlarla dollarlıq layihənin kimin tərəfindən qazla təchiz ediləcəyi barədə sualla yanaşı, onun tikilişinə maliyyə ayrılması kimi suallar lap əvvəldən “Nabucco”nun gələcəyi barədə ciddi problemlər yaratmışdı.

BBC-nin məlumatına görə, bir gün əvvəl Sofiyada sona çatmış enerji sammitində Bolqarıstanın baş naziri Boris Boykov şikayət edib ki, ABŞ və Avropa İttifaqı layihəni yalnız sözdə dəstəkləyirlər. Bəs təchizat sazişlərinin bağlanacağı və investisiya qərarlarının qəbul ediləcəyi bu həlledici ildə “Nabucco” layihəsi ilə bağlı işlər nə yerdədir?
“Nabucco” konsorsiumunun rəhbəri Raynhard Mitçek bu suala cavabında deyib ki, hazırda qaz alıcıları Azərbaycan, İraq, Türkmənistan və Misir kimi potensial qaz təchizatçıları ilə danışıqlar aparırlar. Qaz alıcıları danışıqları davam etdirəcəklər və bu il qaz alqısı və satış razılıqları imzalayacaqlar: "İlin sonuna kimi nəqletmə müqavilələrinin də imzalanacağını gözləyirik. 2010-ci ilin sonuna kimi yekun investisiya qərarının da əldə ediləcəyi gözlənilir".
Mitçek deyib ki, o, Bolqarıstanın baş nazirinin mövqeyini bölüşür və hesab edir ki, siyasi qərar qəbul edənlərlə sənaye təmsilçiləri arasında əməkdaşlığı gücləndirmək lazımdır. “Siyasi dəstək hökumətlərarası sazişin imzalanması idi. Lakin bu xoşbəxt sonluq yox, uğurlu bir start kimi qiymətləndirilməlidir. Bütün səviyyələrdə hökumətlər bu çətin layihənin həyata keçirilməsi üçün şərait yaratmalıdırlar. Tikinti işləri, sahələrin boşaldılması kimi məsələlərdə lisenziyaların verilməsinə yardım göstərilməlidir ki, iş getsin”.
İki gün əvvəl Bakıda səfərdə olan Böyük Britaniyanın enerji və ətraf mühit naziri Lord Hant isə deyib ki, onun hökuməti Xəzər bölgəsindən təbii qazın mümkün qədər tez Avropa istiqamətində nəqli üçün Cənub Dəhlizinin inkişafını görmək istərdi. “Böyük Britaniya Cənubi Dəhlizini dəstəkləyir. Yəni söhbət Xəzərdən Cənubi Avropa istiqamətində uzanacaq nəqliyyat şəbəkəsindən gedir. Təbii qaz nəqlinin potensial marşrutları üçün indi bir neçə istiqamət var. ”Nabucco" onlardan biridir. Ötən yay “Nabucco”ya dair hökumətlərarası saziş imzalandı. Kifayət qədər sanballı sənəddir. Lakin bu layihənin tərəqqi etməsi üçün müvafiq konsorsiuma daxil olan şirkətlər marşrut, qiymət və digər şərtlər barədə danışıqlar aparmalıdır. Bununla belə, Britaniya hökumətinin nöqteyi-nəzərindən hər-hansı ayrıca xətt deyil, Cənubi Korridor regional nəqliyyat şəbəkəsində mühüm halqa olmalıdır". Nazir onu da deyib ki, İran regionda iri qaz ehtiyatlarına malik olan ölkə olsa da, onun “Nabucco”ya qoşulması haqda danışmaq tezdir. Çünki İranla bağlı narahatlıq doğuran digər məsələlər var və bu məsələlər həll edilmədən enerji haqda danışmaq çətindir.

Siyasət şöbəsi

586 dəfə baxılıb