DUBAY ŞİRKƏTİ BAKIDA 1 MİLYARDLIQ LAYİHƏ ALIR

	13 fevral 2012


Onlayn ictimai-siyasi qəzet

İqtisadiyyat

DUBAY ŞİRKƏTİ BAKIDA 1 MİLYARDLIQ LAYİHƏ ALIR

2010-03-07

“Arabtec Holdinq” paytaxtımızda beş qüllədən ibarət ayparaşəkilli super otel və yaşayış kompleksinin tikintisinə dair tenderə qatılıb

Birləşmiş Ərəb Əmirliklərinin ən iri tikinti şirkətlərindən biri “Arabtec Holdinq” Bakının mərkəzində beş qüllədən ibarət aypara şəkilli (layihənin adı da “Aypara”dır) super-dəbdəbəli otel və yaşayış kompleksinin inşasına dair elan olunan tenderə qatılıb. Xəbərlərə görə, paralel olaraq neçə vaxtdır böhranla üzləşən bu şirkət öz səhmlərinin 70 faizini Birləşmiş Ərəb Əmirliklərinin ən iri investisiya şirkətlərindən biri olan “Aabar Investments PJSC”ə satmağa razılaşıb.

Ərəb mənbələrinin məlumatlarına görə, sözügedən tikinti şirkəti Dubayda tikinti sektorunda hökm sürən böhranla bağlı xarici ölkələrə ekspansiya etməyə hazırlaşır. Bildirilir ki, Dubayda bu yaxınlarda istifadəyə verilən və dünyanın ən hündür binası olan “Burc Dubai” binasını da bu şirkət inşa edib. Lakin hazırda Dubayda maliyyə böhranı nəticəsində tikinti sektoru çöküb və əksər tikinti layihələri yarımçıq qalıb, həmçinin daşınmaz əmlakın qiyməti kəskin ucuzlaşıb.
Məlumata görə, “Aypara” kompleksi hər birində 30-dan çox mərtəbə olan beş göydələndən ibarət olacaq. Bu binalar elit yaşayış kompleksləri, biznes və ofis mərkəzləri və 360 nömrədən ibarət otel kimi nəzərdə tutulur. Layihənin Xəzər dənizinin sahilində inşa edilməsi planlaşdırılır. Layihəni Azərbaycandan hansı təşkilatın irəli sürdüyü məlum deyil.
Məlumatda deyilir ki, son zamanlar Bakıda da torpaq sahələrinin və daşınmaz əmlakın qiymətinin ucuzlaşması müşahidə edilir. İstisna deyil ki, iri Dubay şirkətini də Azərbaycana bu ucuzlaşma cəlb edib. Sözügedən kompleksin 2013-cü ilə qədər istifadəyə verilməsi nəzərdə tutulur. “Arabtec Holdinq” şirkəti Rusiyanın “Qazprom” şirkəti tərəfindən irəli sürülən və Sankt-Peterburqda inşa edilməkdə olan ictimai-işgüzar rayonun - “Oxta-Sentr”in də baş podratçısıdır. Şirkətin əldə etdiyi tikinti layihələrinin ümumi dəyəri 10,6 milyard dollardır. Bununla belə şirkət ötən il Dubayda hökm sürən tikinti böhranı ilə bağlı 1,7 milyard dollar ziyana düşüb. Bildirilir ki, şirkətin “Aabar Investments PJSC”lə birləşməsi bu ilin aprel ayında başa çatmalıdır. Bu sövdələşmə şirkətə Bakıdakı layihənin həyata keçirilməsi üçün imkan yarada bilər.
Şirkətin nümayəndəsi deyib ki, onlar Bakıdakı “Aypara” layihəsi üçün sifarişçidən 1 milyard dollardan yuxarı almağı nəzərdə tuturlar. Lakin hələ danışıqlar gedir və sövdələşmə əldə edilməyib.

F.MƏMMƏDOV

1886 dəfə baxılıb