TANINAN ŞƏXSLƏRDƏN RÜŞVƏT İSTƏMƏYƏ ÇƏKİNİRLƏR

	13 fevral 2012


Onlayn ictimai-siyasi qəzet

İqtisadiyyat

TANINAN ŞƏXSLƏRDƏN RÜŞVƏT İSTƏMƏYƏ ÇƏKİNİRLƏR

2010-03-08

Keçirdiyimiz sorğu zamanı məlum oldu ki, onlardan rüşvət istəyəndə də vermirlər

Mətbuatda xəbər verildiyi kimi, ADP sədrinin müavini Taliyyət Əliyevdən sürücülük vəsiqəsi alarkən rüşvət istəyiblər. Bu fakt rüşvətin geniş yayıldığı ölkədə məmurların hətta ictimai fiqur statusunda olan şəxslərdən də rüşvət istəməkdən çəkinmədiyini göstərir. Bəs başqa hansı tanınmış fiqurlar belə hallarla üzləşiblər?

Sualla müraciət etdiyimiz hüquq müdafiəçisi Çingiz Qənizadə deyir ki, ondan heç vaxt rüşvət istəməyiblər: “Yəqin mənim insan hüquqları müdafiəçisi olduğumu bildikləri üçün risk etməyiblər. Sürücülük vəsiqəsi verilən adamdan rüşvət alınması düzgün deyil. Bu addımı ona görə atırlar ki, vəsiqə alan adam yol hərəkət qaydalarını bilmir. Mən tələbə olarkən özüm imtahan verib vəsiqə almışam. Bildiyimə görə, indi vəziyyət belədir ki, Dövlət Yol Polisində imtahandan keçənlərdən rüşvət alınmır, sadəcə olaraq yol hərəkət qaydalarını bilmək lazımdır”.
ADP sədri Sərdar Cəlaloğlu isə deyir ki, ondan rüşvət almağa cəhd ediblər: “Bir dəfə yol polisləri rüşvət almağa cəhd ediblər, amma verməmişəm. Yol hərəkət qaydalarını pozmadığım halda rüşvət istədilər, ancaq mən protokol yazılmasını tələb etdim, onlar isə yenə rüşvət istədilər. Mən də israr edib vermədim. Vətəndaş özü rüşvət verməyə meyillidirsə, cəmiyyətdə rüşvətin qarşısını almaq mümkün olmaz”.
Millət vəkili Pənah Hüseyn isə ondan heç vaxt rüşvət istəyən olmadığını bildirir: “Amma heç kəs deyə bilməz ki, Azərbaycanda rüşvət yoxdur. Sosial həyatın bütün sahələrində rüşvət geniş vüsət alıb, hətta idarələrdə kompüterləşdiriblər. Çünki hər kəs özündən yuxarıya hesabat verir”.
Millət vəkili Arzu Səmədbəyli də ondan rüşvət istəyən olmadığını bildirir: “Biz bu ölkədə korrupsiya və rüşvətxorluğa qarşı mübarizə aparırıq. Ona görə də məndən heç vaxt rüşvət istəməyiblər”.
“Bizim yol” qəzetinin əməkdaşı Natiq Cavadlıdan isə rüşvət istəyən olub: “Mən son vaxtlar dövlət idarələrində olmadığım üçün məndən rüşvət istəyən olmayıb. Amma bir neçə il əvvəl uşaqlara sosial yardım alarkən rüşvət istəmişdilər. Mən də vermədim, ona görə də bizə sosial yardım vermədilər”.
“Gündəlik Azərbaycan” qəzetinin şef redaktoru Şahvələd Çobanoğludan da rüşvət istəyən olub, amma o verməyib: “Mən heç vaxt rüşvət verməmişəm. Bir dəfə şəxsiyyət vəsiqəsi alarkən rüşvət istəmişdilər, mən də çox böyük səs-küy qaldırmışdım. Mən harasa pul verərkən, qəbz tələb edirəm. Bu məsələyə prinsipiallığımdan başqa, həm də ictimai şüur kimi baxıram. Rüşvət verilməsi qanunsuzluqdur, cinayətdir. Cəmiyyətdə bu qanunsuzluğa qarşı müqavimət olmalıdır”.

Şahnaz NOVRUZQIZI

1338 dəfə baxılıb