“FORBES” MİLYARDERLƏRİN ADINI AÇIQLADI | İqtisadiyyat

	12 fevral 2012


Onlayn ictimai-siyasi qəzet

İqtisadiyyat

“FORBES” MİLYARDERLƏRİN ADINI AÇIQLADI

2010-03-12

Maaşla “dolanan ” Azərbaycan oliqarxları siyahıda yoxdur

Nüfuzlu “Forbes” dünyanın ən varlı adamlarının illik reytinqini açıqlayıb. Dünyanın ən varlı adamı meksikalı telekommunikasiya maqnatı Karlos Slimdir. Onun təxmini varidatı ötən il ərzində artaraq, 53.5 milyard dollara çatıb. 70 yaşlı Karlos Slimə məxsus şirkətlər Meksika rabitə xidmətlərinin 90 faizinə nəzarət edirlər. Son 16 ildə ən varlı adamın amerikadan olmadığını yazan “Forbes” diqqəti Asiya mənşəli milyarderlərin sayının artmasına yönəldir. Dünyanın zənginlər siyahısına daxil edilən 97 milyarderdən əksəriyyəti məhz asiyalıdır.

İqtisadi çətinliklərə baxmayaraq, milyarderlər klubunun sayı bu il ərzində artıb. Ötən il siyahıda 793 adamın adı çəkilirdisə, bu il həmin siyahıya 1001 adamın adı əlavə olunub. Onlardan 89-u qadındır. Bu arada milyardlara malik olanların sayına görə Moskva New Yorkdan sonra ikinci yeri tutub. “Forbes” jurnalına əsasən, burada 50-dək milyarder yaşayır. Uçüncü yerdə London gəlir. Britaniya paytaxtında “cəmi” 32 milyardçı var. Ən varlı adam Amerikalı olmasa da, milyarderlərin ümumi sayına görə ABŞ ənənəvi liderliyini yenə də saxlayıb. “Forbes” siyahısında təmsil olunmuş 403 amerikalının 1.3 trilyon dollara malik olduğu qeyd olunur.
Dünyanın ikinci ən varlı adamı isə “Microsoft”un sahibi Bill Qeytsdir. Onun sərvəti 53 milyard dollara yaxındır. Amerikalı investor Uorren Baffet isə bir qədər kasıblayaraq üçüncü pilləyə enib, onun sərvəti 47 milyard dollardır. İqtisadi böhrana baxmayaraq, onların hər ikisinin sərvəti artıb. Rusiyanın ən varlı adamı statusunu isə bu dəfə çoxlarının tanımadığı Vladimir Lisin qazanıb. Metallurgiya kombinatının sahibi olan Lisin jurnalın ümumi siyahısında 32-ci yeri tutur. Mixail Proxorov Lisindən sonra Rusiyanın ikinci ən varlı adamıdır. Onun sərvəti 13.4 milyard dollardır. Mixail Fridman isə 12.7 milyard dollarla üçüncü yerdədir. Bir vaxtlar Rusiyanın ən zəngini olan Roman Abramoviç geriləyərək jurnalın ümumi siyahısında 50-ci yerlə kifayətlənib, onun 11.3 milyard dolları var. Siyahıda sonrakı yerləri Oleq Deripaska və “Lukoyl” prezidenti Vahid Ələkbərov tutur. Ələkbərovun sərvəti 10.6 milyarddır. Siyahıda yer alan digər azərbaycanlı İsgəndər Mahmudovun isə cəmi 8.5 milyard dolları var.
Qeyd edək ki, siyahıda bu dəfə də Azərbaycandan heç kim yer almır. Baxmayaraq ki, ölkədə milyarder statusunu çoxdan qazanmış bir neçə yüksək rütbəli məmur-oliqarx var. Onların siyahıda yer almaması əslində təəccüblü deyil. Çünki “Forbes” siyahısını zənginlərin bəyan etdikləri sərvətlərinin həcminə, habelə onların leqal bizneslərinin və malik olduqları səhm paketlərinin hazırkı birja dəyərlərinə əsaslandırır. Azərbaycan kimi ölkələrdə isə milyarderlər pullarını korrupsiya yolu ilə əldə edirlər və əksər hallarda bizneslərini öz adalarına rəsmiləşdirmirlər. Yəni milyarder olsalar da rəsmən onların hamısı maaşla “dolanır”, bu üzdən nəinki milyarderlər, heç milyonçular siyahısında da yer almır.

Siyasət şöbəsi

3235 dəfə baxılıb