MURDAR ƏTDƏN DÖNƏR SATIŞI DAVAM EDİR | İqtisadiyyat

	12 fevral 2012


Onlayn ictimai-siyasi qəzet

İqtisadiyyat

MURDAR ƏTDƏN DÖNƏR SATIŞI DAVAM EDİR

2010-03-14

Səhiyyə naziri verdiyi sözü tutmadı

Səhiyyə naziri Oqtay Şirəliyev normativlərə cavab verməyən dönərxanaların bağlanacağını demişdi. Nazirin sözlərinə görə, araşdırma zamanı dönərxanaların əksəriyyətində normativlərə əməl olunmaması üzə çıxıb. Nazirin bu bəyanatından sonra paytaxtda fəaliyyət göstərən bir neçə dönərxanada monitorinq aparmışdıq.

Dönərxanalarda bizə bildirmişdilər ki, fevralın 22-də Səhiyyə Nazirliyi tərəfindən yoxlamalar aparılacaq. Qeyd edək ki, ötən dəfə araşdırmalarımız nəticəsində bəlli olmuşdu ki, “Qara Qarayev” metrosunun yanında yerləşən “Kral Dönər” köşkündə dönər satışına qadağa qoyulub. Dönərxana sahibi əməkdaşımıza bildirmişdi ki, Səhiyyə Nazirliyinin işçiləri dönərxananı standartlara cavab vermədiyi üçün bağlayıblar. Sahibkar demişdi ki, bir həftəyə işi bərpa edəcək: “Yoxlamanın nə ilə bağlı olduğu hamıya bəllidir də. Pullarını alandan sonra heç gəlib baxmayacaqlar burada mal əti satılır, yoxsa eşşək əti ”.
Ötən gün “Kral Dönər” köşkü öz fəaliyyətini bərpa edib. Özü də əvvəlki vəziyyətdə. Bu dəfə satıcıya yaxınlaşsaq da bizimlə söhbətdən imtina etdi. O, köşkün pəncərəsini bağlayaraq “qoyun alverimizi edək də” dedi.
Metronun “Neftçilər” stansiyası ərazisində yerləşən dönərxanalarda da antisanitariya vəziyyəti hökm sürür. Burada da dönər qazla bişirilirdi. Söhbətləşdiyimiz İsmayıl adlı dönər satanın sözlərinə görə, son zamanlar dönər alanların sayı azalıb: “Müştərilərimizin sayı xeyli azalıb. Əvvəllər hazırladığımız dönər axşama qədər satılıb qurtarırdı. İndi yarısını ancaq sata bilirik. Alıcılarımız da əsasən yaxınlıqda yerləşən Xəzər Universitetinin tələbələridir. Bizdə yoxlama oldu. Xəbərdarlıq ediblər ki, qazı yığışdıraq. Biz də vaxt istəmişik. Bu yaxınlarda elektriklə işləyən aparat alacağıq”.
“Nərimanov” metrostansiyası ərazisində fəaliyyət göstərən dönərxanaların da əksəriyyəti qazla işləyirdi. Metronun düz bir addımlığında fəaliyyət göstərən dönərxanya hələ çöldən baxanda adamın iştahı qaçırdı. Anar adlı satıcı alverdən razılıq etdi: “Siz buranın pis gündə olmağına baxmayın. Əsas dönərin dadlı olmasıdır, o da bizdə. Bizim elə müştərilərimiz var ki, ”Gənclik"dən bura dönər almağa gəlirlər. Dönər burada da qazla bişirilir. Amma bunun heç bir təhlükəsi yoxdur. Elektriklə olan aparat quraşdırsaq, qazancımız işığa gedər ki. Ötən həftə yoxlama gəlmişdi, buranın sahibi onlarla anlaşdı. Bir sözlə, heç bir problem yoxdur".
Metronun “Gənclik” stansiyası ətrafında isə bəzi dönərxanalar artıq elektriklə işləyən aparatlara keçmişdilər. Söhbətləşdiyimiz dönərçinin sözlərinə görə, Səhiyyə Nazirliyinin apardığı yoxlamalardan sonra bu addımı atıblar: “İndi xərclərimiz daha çox çıxacaq. Amma gərək şərtlərə də riayət edəsən ” .
Səhiyyə Nazirliyinin mətbuat xidmətinin rəhbəri Anar Qədirli ilə söhbətləşmək istəsək də telefonla əlaqə cəhdlərimiz baş tutmadı.

Zülfiyyə SAKİTQIZI

1031 dəfə baxılıb