RÖVNƏQ ABDULLAYEV 600 NƏFƏRİ İŞSİZ QOYUB

	13 fevral 2012


Onlayn ictimai-siyasi qəzet

İqtisadiyyat

RÖVNƏQ ABDULLAYEV 600 NƏFƏRİ İŞSİZ QOYUB

2010-03-16

19 şirkət ARDNŞ-nin Neft Emalı Zavodu, Bakı Şəhər İcra Hakimiyyəti, və Əmlak Komitəsindən kompensasiya tələb edir

Martın 17-də Bakı Apelyasiya Məhkəməsində hakim Sərvət Hüseynovun sədrliyi ilə “Meridian” kompaniyası, “Emal” istehsal müəssisəsi, “Everest” firması və başqalarının 2 saylı Bakı Yerli İqtisad Məhkəməsinin qətnaməsindən verdikləri şikayətə baxılacaq. Bu müəssisələr Azərbaycan Dövlət Neft Şirkətinin “Azərneftyağ” Neft Emalı Zavoduna, Əmlak Məsələləri üzrə Dövlət Komitəsinə Bakı Şəhər İcra Hakimiyyətinə, “KAT LTD” MMC-yə, “ADEC” Azərbaycan İnkişaf Şirkətinə qarşı iddia qaldırıblar.

İddiaçılar Bakı Şəhər İcra Hakimiyyətinin 7 iyun 2006-cı və 11 iyun 2007-ci il tarixli sərəncamlarının ləğvini tələb ediblər. Çünki Dövlət Əmlakının İdarə Edilməsi üzrə Dövlət Komitəsi və Bakı Şəhər İcra Hakimiyyəti bu sərəncamlar vasitəsilə vaxtilə “Azərneftyağ” Neft Emalı Zavodunun ərazisi olmuş torpaq sahələrini bu 19 müəssisədən alaraq yuxarıda adlarını çəkdiyimiz şirkətlərə veriblər. Mübahisəli ərazi “A.M.A.Y.” Ticarət Şirkətinin ətrafındakı ərazilərdə yerləşir. Əvvəllər dövlət müəssisələrinin istifadəsində olub və baxımsızlıq ucbatından yararsız vəziyyətə düşüb. Buna görə də icarədar razılıq verib ki, şirkətlər oraları öz vəsaitləri hesabına əsaslı təmir etdirsinlər. Həmçinin qeyri-yaşayış sahələrinin yerləşdiyi torpaq sahələrində şirkətlər yeni inzibati binalar və istehsal yönümlü tikililər, anbarlar və s. tikiblər. 20 ilə yaxın icarəyə götürdükləri sahələrdən istifadə ediblər. Bu müddət ərzində müxtəlif təyinatlı istehsal sahələrində 600-dən çox işçi işlə təmin edilib. Şirkətlər icarəyə götürdükləri qeyri-yaşayış sahələrinin icarə haqlarını vaxtlı-vaxtında dövlət büdcəsinə ödəyiblər. Bu vaxta qədər onların istifadələrində olan qeyri-yaşayış sahələri ilə bağlı dövlət və ya icarədar qarşısında hər hansı öhdəlikləri yaranmayıb. Bu şirkətlər on il fəaliyyət göstərəndən sonra 1998-ci ildə özəlləşmə ilə əlaqədar aidiyyəti dövlət qurumlarına müraciət ediblər. Mərhum prezident Heydər Əliyevə müraciətdən sonra bu məsələ ilə əlaqədar iki komissiya yaradılıb. Hər iki komissiyanın qərarı ilə Dövlət Neft Şirkəti “Azərneftyağ” İstehsalat Birliyinin razılığı əsasında hazırkı iddiaçı şirkətlər də daxil olmaqla, 39 müəssisə Dövlət Əmlak Komitəsinin sərəncamına verilib. Bu şirkətlər qanunun verdiyi hüquqdan yararlanaraq, sahibkarlıq fəaliyyətlərini genişləndirmək, işçilərinin həyat səviyyəsinin yüksəldilməsinə nail olmaq məqsədilə uzun müddət icarələrində olmuş qeyri-yaşayış sahələrini özəlləşdirmək və öz vəsaitləri hesabına orada tikdikləri tikililərə mülkiyyət hüquqlarını təsdiq edən şəhadətnamənin verilməsi üçün ƏMDK-ya müraciət ediblər. Sözügedən ərazidəki müəssisələrdən 20-si özəlləşdirilsə də, 19 şirkət ayrı-seçkiliyə məruz qalıb. Maraq1ıdır ki, Rövnəq Abdullayev ARDNŞ prezidenti təyin olunandan sonra 19 şirkətin özəlləşmə üçün razılıq verilməsi istəyinə qanunvericiliklə müəyyən edilməyən əsaslarla rədd cavabı verilib.
Bundan sonra Bakı Şəhər İcra Hakimiyyəti həmin torpaq sahələrini kommersiya müəssisələrinə - “KAT LTD” MMC-yə və “ADEC” Azərbaycan İnkişaf Şirkətinə verilməsi barədə sərəncamlar qəbul edib. Bir qədər keçəndən sonra şirkətlərə onların icarəsində olmuş əmlakdan və öz vəsaitləri hesabına tikdikləri qeyri-yaşayış sahələrindən istifadə etmələrinə məhdudiyyətlər yaradılıb. Ötən il “Azərneftyağ” əraziyə qanunsuz post qoyaraq, hazırkı iddiaçı şirkətləri və onların əməkdaşlıq etdikləri şəxsləri əraziyə buraxmayıblar.
Xatırladaq ki, şirkətlər 2 saylı Bakı Yerli İqtisad Məhkəməsinə ünvanladıqları mülki iddiada Bakı Şəhər İcra Hakimiyyətinin göstərilən sərəncamlarının etibarsız sayılması, ƏMDK-nın üzərinə onların icarəsində olan əmlakın qanunvericiliklə nəzərdə tutulmuş qaydada özəlləşdirilməsi ilə bağlı prosedurlara başlama öhdəliyinin qoyulması, şirkətlərin öz vəsaitləri hesabına tikdirdikləri qeyri-yaşayış sahəsi üzərində mülkiyyət hüququnu təsdiq edən şəhadətnamə verilməsini tələb edirlər. Məhkəmənin hər hansı səbəbdən bu tələbləri təmin etməkdən imtina edəcəyi halda, Əmlak Məsələləri üzrə Dövlət Komitəsindən və Bakı Şəhər İcra Hakimiyyətindən müştərək qaydada onların xeyrinə əmlaklarının bazar qiymətinə uyğun kompensasiya tutulması xahiş olunub. Lakin birinci instansiya məhkəməsi bir ilə yaxın davam edən məhkəmə araşdırmasının yekunu olaraq iddianın rədd edilməsi barədə qərar çıxarıb. Ərizəçilər məhkəmənin qərarını qanunsuz saydıqları üçün ondan apelyasiya şikayəti veriblər.

E.HÜSEYNOV

2101 dəfə baxılıb