RÖVNƏQ ABDULLAYEVLƏ BƏRZANİNİN 2 MİLYARDLIQ İŞ BİRLİYİ

	13 fevral 2012


Onlayn ictimai-siyasi qəzet

İqtisadiyyat

RÖVNƏQ ABDULLAYEVLƏ BƏRZANİNİN 2 MİLYARDLIQ İŞ BİRLİYİ

2010-07-28

ARDNŞ Şimali İraqa investisiya qoymağı planlaşdırır

Son illər xarici ölkələrə böyük sərmayələr qoyan ARDNŞ Şimali İraqda, əsasən kürdlər yaşayan bölgəyə də investisiya yatırmağa hazırlaşır.

Bu barədə bizi məlumatlandıran ARDNŞ-in Xarici Əlaqələr Şöbəsinin qəzetdə adının çəkilməsini istəməyən əməkdaşının sözlərinə görə, bu barədə razılıq bu ilin iyun ayında Dövlət Neft Şirkətinin prezidenti Rövnəq Abdullayevlə İraq hökuməti arasında əldə olunub. Məlumata görə, ARDNŞ Mosul və Kərkuk şəhərlərində neft hasilatı ilə məşğul olmalı, bir sıra sosial və infrastruktur layihələri maliyyələşdirməlidir. Bu məqsədlə yaxın 2 ildə şirkət Şimali İraqa 2 milyard dollara yaxın vəsait yatırmalıdır. Sosial layihələr içərisində məktəb, xəstəxana tikilməsi, dəmir yolunun çəkilməsi, yeni yolların salınmasını və s. var. Maraqlıdır ki, ARDNŞ-in Şimali İraqa "girməsi" Türkiyə tərəfini də razı salıb.
Türkiyə Şimali İraqda sosial-iqtisadi vəziyyətin yaxşılığa doğru dəyişməsini terror mübarizəsində həlledici faktor sayır. Lakin Türkiyə şirkətlərinin hazırda Şimali İraqda işləməsi problemlidir. Başqa tərəfdən, türk iş adamları Şimali İraqda işləməyə də risk etmirlər. Çünki Türkiyə iş adamlarına qarşı bölgədə antipatiya yaradan kürd faktoru ilə yanaşı, sünni-şiə məsələsi də var. Bu üzdən də Şimali İraqda ARDNŞ-nin işləməsi məsləhət bilinib.
Mənbə ARDNŞ rəhbərliyinin də Şimali İraqda işləməsinə böyük həvəs göstərdiyi bildirdi. Onun sözlərinə görə, ARDNŞ-in geoloji-kəşfiyyat işlərini aparan mütəxəssislər qrupu hazırda Şimali İraqa yollanıb: "İlin sonuna kimi İraq hökuməti ilə ARDNŞ arasında müqavilə imzalanacağı gözlənilir. Hələlik tərəflər arasında iş gedir".
Mənbə ARDNŞ-nin bu layihələrinin Kərkükdə yaşayan türkmənlərin durumuna necə təsir edəcəyinin hələlik açıq qaldığını da əlavə etdi.
Qeyd edək ki, ARDNŞ son illər Türkiyəyə, Gürcüstana böyük həcmdə investisiya yatırıb. Şirkət bu ölkələrdə neft hasilatı ilə məşğul olmasa da, neft və qaz satışı, neft-kimya sahələrinə böyük miqdarda investisiya yatırıb. ARDNŞ təkcə Gürcüstana 470 milyon dollar məbləğində investisiya qoyub. Gürcüstandakı onlarca qazpaylayıcı şəbəkə, yanacaqdoldurma stansiyaları və "Kulevi" terminalı ARDNŞ-nin idarəçiliyindədir. Türkiyəyə isə ARDNŞ 5 milyard dollar həcmində investisiya qoymağı planlaşdırır.
Bununla belə, ARDNŞ neft hasilatı ilə bağlı böyük təcrübəyə malik olsa da, xaricdə investisiyaların müəyyən sahələrə yatırılması və onların idarə edilməsi işində təcrübəsizdir.
Mənbə Şimali İraqda böyük neft və qaz ehtiyatlarının olmasına baxmayaraq, oraya investisiya qoymağın riskli olduğunu da qeyd etdi. Onun sözlərinə görə, ARDNŞ rəhbərliyi ilə Şimali İraqın kürd administrasiyası arasında yaxşı əlaqələr var.
Rövnəq Abdullayevin bacısı oğlu, Azərbaycan neftinin xaricdə satışı ilə məşğul olan "Raf oil" şirkətinin prezidenti Rauf Məmmədovun Məsud Bərzaninin qohumları ilə ərəb ölkələrində böyük biznes layihələrində ortaq olduğu da gələn məlumatlar sırasındadır.

İdrak CAMAL

1895 dəfə baxılıb