“QAZAXISTAN AZƏRBAYCANA TAXIL İXRACINI ARTIRMAĞA HAZIRDIR”

	13 fevral 2012


Onlayn ictimai-siyasi qəzet

İqtisadiyyat

“QAZAXISTAN AZƏRBAYCANA TAXIL İXRACINI ARTIRMAĞA HAZIRDIR”

2010-08-31

Səfir təsəlli verir, amma ölkədə artıq ciddi bahalaşma müşahidə edilir

“Qazaxıstan Azərbaycanın taxıla olan tələbatını təmin etməyə hazırdır”. Bunu Qazaxıstanın Azərbaycandakı fövqəladə və səlahiyyətli səfiri Serik Primbetov bəyan edib. O, Rusiyanın taxıl ixracına qadağa qoyduğunu xatırladaraq hazırda Qazaxıstanın postsovet məkanında əsas taxıl təchizatçısı olduğunu deyib.

Onun sözlərinə görə, Azərbaycandan taxılla bağlı daxil olan bütün sifarişlər yerinə yetirilir. Səfir deyib ki, hazırda Azərbaycan Qazaxıstandan 500 min ton taxıl alır, ölkənin ümumi tələbatı isə 1 milyon tondur: “Bu il Qazaxıstanda 15 milyon ton məhsul toplanacağı, bunun 6-8 milyon tonunun ixrac olunacağı gözlənilir”. S.Primbetovun sözlərinə görə, Qazaxıstan Azərbaycana taxıl satmağa hazırdır: “Yalnız qiymətlə bağlı məsələ razılaşdırılmalıdır. Bu gün üçün taxılın qiyməti 230 dollardır”. (anspress.com)
Qazaxıstandan buğda idxal edən Azərbaycan şirkətlərindən isə deyirlər ki, sərhəddə buğdanın tonu 230 dollardan alınır. Bura gömrük rəsmiləşdirilməsi, 18 faizlik əlavə dəyər vergisi, ölkə daxili daşıma və boşaltma xərclərini də əlavə etsək, qiymətlər 290 dollara çatır.
Qeyd edək ki, son vaxtlar ölkədə taxıl qıtlığının yaranması, çörəyin qiymətinin bahalaşması ilə bağlı məlumatlar intensivləşib. Dünyada taxıl istehsalının azalması, Rusiyada baş verən yanğınlardan sonra bu ölkənin cari ilin sonunacan taxıl ixracına qadağa qoyması, əsas taxıl təminatçımız olan Qazaxıstanın ixracın həcmini azaltması, üstəlik də daxili istehsalın gözləniləndən xeyli az olması taxıl qıtlığını zəruri edir. Bütün bunlarla yanaşı, əvvəlki illərdən ölkənin taxıl ehtiyatının azlığı da qıtlıq təhlükəsini artıran amillərdəndir. Verilən rəsmi açıqlamalara görə, hazırda 500 min ton taxıl ehtiyatımız var, ilin sonunacan bu rəqəmin 900 min tona çatdırılması planlaşdırılır.
İqtisadi İnkişaf Nazirliyi isə verdiyi açıqlamalarda taxıl və çörək qıtlığının olmadığını, çörəyin qiymətinin artmadığını bəyan edir. Lakin həftənin şənbə günü ölkə televiziyalarının çörək sexlərindən və satış obyektlərindən hazırladığı reportajlardan aydın olur ki, taxıl qıtlığı var və bunun nəticəsi olaraq un bahalaşıb. Çörəyin qiymətində isə bir çox hallarda bahalaşma müşahidə edilməsə də çəkisində azalma var. Hətta bir çox sexlərdə 30 qəpiyə satılan və 600 qram olmalı olan çörəyin 380 qramdan istehsal olunması faktı da telekanallarda işıqlandırıldı. Bunu qeyd etməkdə məqsədimiz isə odur ki, qəzetlər yazdıqları faktları görüntülərlə sübut etmək imkanında olmadığından İİN və digər qurumlar asanlıqla təkzib mövqeyi seçə bilirlər. Telekanallarda hər şey çılpaqlığı ilə əks olunduqdan sonra isə aidiyyəti orqanlardan səs-soraq gəlmir...

HƏBİBƏ

415 dəfə baxılıb