BENZİN 50 FAİZ BAHALAŞA BİLƏR | İqtisadiyyat

	12 fevral 2012


Onlayn ictimai-siyasi qəzet

İqtisadiyyat

BENZİN 50 FAİZ BAHALAŞA BİLƏR

2010-09-05

Avro sisteminə keçid yanacağın tərkibinə və qiymətinə təsir edəcək

İlin əvvəlindən Rusiyada benzinin qiyməti 3.3 faiz bahalaşıb. Orta hesabla ilin 7 ayında benzinin hər litrə qiyməti 1.1 rubl artıb. Rusiya mətbuatının məlumatına görə, iyulda ölkədə yanacaqdoldurma məntəqələrində bir litr avtomobil yanacağının qiyməti 22.2 rubl olub. Baxmayaraq ki, ötən il bu qiymət 20.68 rubl təşkil edib. Bir il ərzində benzinin qiyməti 7.11 faiz bahalaşıb. Ekspertlərin fikrincə, yay aylarında yanacağa tələbat artdığından, onun qiymətində cüzi artım hiss olunur. Bəzi analitiklər isə hesab edirlər ki, artımın psixoloji səbəbləri var. Hansı ki, bunda neftin dünya bazar qiyməti mühüm paya malikdir.

Qonşu ölkədə yanacağın qiymətinin artımının Azərbaycana təsirlərinə və analoji bahalaşmanın bizdə də baş verib-verməyəcəyinə gəlincə, iqtisadçı-ekspert Vüqar Bayramov bildirir ki, Azərbaycanda benzinin qiymətinin artması xarici faktorlarla müəyyənləşdirilmir: “Ölkədə benzinin qiymətinin artması daha çox daxili faktorlarla bağlıdır. Belə ki, Azərbaycan benzinə olan tələbatını daxili istehsal hesabına ödəyir. Qeyd edim ki, hazırda Azərbaycanda benzinin qiymətinin artırılması gündəmdə deyil. O cümlədən Dövlət Neft Şirkəti də bu barədə Tarif Şurasına hər hansı müraciət ünvanlamayıb. Cari ilin növbəti aylarında da Neft Şirkətinin Tarif Şurasına müraciət ünvanlayacağı güman edilmir. Bununla belə, 2011-ci ilin əvvəllərində benzinin qiymətinin artırılmasının gündəmə gətirilməsi ehtimalı böyükdür. Dövlət Neft Şirkəti Tarif Şurasına benzinin qiymətinin artırılması ilə bağlı müraciət ünvanlamasa da, bu məsələ hökumətdə zaman-zaman müzakirə edilib. Hazırda benzinin qiymətinin artırılması üçün iqtisadi, siyasi zəmin olmasa da, 2011-ci ilin əvvəllərində belə bir addım atıla bilər”.
İqtisadçı deyir ki, neftin dünya bazar qiymətinin 70-80 dollar ətrafında stabilləşməsi, 2011-ci ilin əvvəllərində müəyyən qiymət artımlarının olacağı ilə bağlı proqnozlar benzinin xərcinin artmasına gətirib çıxara bilər: “Eyni zamanda avro standartlarına keçidlə bağlı atılan addımlar benzinin strukturunun dəyişməsinə səbəb olacaq. O baxımdan gələn ilin əvvəllərində qiymət artımı istisna edilmir. Güman olunur ki, benzinin qiyməti təxminən 50 faiz artırılacaq. Bu da qeyd etdiyim kimi, birbaşa benzinin strukturunun dəyişməsi, dünya bazarında neftin qiymətində müşahidə edilən artımlarla bağlı olacaq. Bütün hallarda ilin sonuna qədər qiymət artımları proqnozlaşdırılmır”.

HƏBİBƏ

1984 dəfə baxılıb