İŞSİZLƏR ORDUSUNA DAHA 100 NƏFƏR ƏLAVƏ OLUNDU

	13 fevral 2012


Onlayn ictimai-siyasi qəzet

İqtisadiyyat

İŞSİZLƏR ORDUSUNA DAHA 100 NƏFƏR ƏLAVƏ OLUNDU

2010-09-06

Gəncədə xeyli dəmiryolçu işdən azad edilib

Gəncə dəmiryolçuları redaksiyamıza şikayət ediblər. Onlar Dəmiryol İnfrastrukturu Departamentinin Gəncə 5 saylı müəssisəsinə bu yaxınlarda rəhbər təyin olunan Aydın Cabbarov tərəfindən heç bir səbəb göstərilmədən işdən çıxarıldıqlarını bildirirlər. Şikayətçilər qeyd edirlər ki, Aydın Cabbarov bu vəzifəyə keçər-keçməz 100 nəfərə yaxın dəmiryolçunu işdən azad edib: “Aydın Cabbarova qədər biz uzun illərdir burada çalışırdıq. Heç bir nöqsanımız, yarıtmaz fəaliyyətimiz olmayıb. Aydın Cabbarov bizə rəhbər təyin olunandan sonra kütləvi ixtisarlar aparmağa başladı. Bizə isə heç bir izahat verilmir. Qanunla hər hansı bir işçi azad olunanda bunun səbəbi izah edilməli, iki aylıq maaşı ödənilməlidir. O, nəinki bunu edir, heç bizi görmək belə istəmir”.

Dəmiryolçular A.Cabbarovun ixtisar “siyasətinin” sadəcə bəhanə olduğunu deyirlər: “Prezident İlham Əliyev yeni iş yerlərinin açılması üçün çalışdığı bir vaxtda Aydın Cabbarov iş yerlərini ixtisar etməklə, nəyə nail olmaq istəyir? Bizə bəlli olub ki, əslində o, bizi işdən çıxarıb, yeni işçilər götürməklə pul qazanmaq istəyir. Bizə deyir ixtisara düşmüsünüz, amma bir yandan da yeni işçilər qəbul edir. Artıq o, 10-dək yeni işçi götürüb. Kim pul verdisə, onu işdə saxladılar, verməyənləri çıxardı”.
Gəncə dəmiryolçuları bildirir ki, müəssisənin fəaliyyətində heç bir geriləmə yoxdur, əksinə işlər daha da artıb: “Buna görə də ixtisar yalnız bəhanədir”. Onlar Aydın Cabbarovun bundan əvvəl Ağstafa Dəmiryol Stansiyasının rəisi işlədiyi dövrdə də qanunsuzluqlar etdiyini bildirirlər: “Cabbarov orada ehtiyat dəmiryol relslərini sökdürərək, Ağstafaçayın sahili boyunca yerləşən daş və çınqıl karxanalarına dəmiryol relsi çəkdirmişdi. Həmin karxanaların sahibləri ilə işbirliyinə girən rəis onların yüklərini birbaşa stansiyaya daşıyıb vaqonlara yükləmək üçün ayrıca rels çəkdirib. Bunu sahibkarlara kömək adı altında malaladı. Harada yazılıb ki, ehtiyat dəmiryol relsərini söküb şəxsi sahibkarlıq fəaliyyəti ilə məşğul olan şəxslərə dəmiryolu çəkəsən?”
A.Cabbarovun ünvanına səslənən ittihamlarla bağlı onun mövqeyini də dərc edə bilərik.

Maqsud MAHRIZLI

665 dəfə baxılıb