“AZƏRSUN” KRASNODARDA ÇAY FABRİKİ AÇDI | İqtisadiyyat

	13 fevral 2012


Onlayn ictimai-siyasi qəzet

İqtisadiyyat

“AZƏRSUN” KRASNODARDA ÇAY FABRİKİ AÇDI

2010-09-07

Ermənilərlə kürdlərin də sıx yaşadığı Beloreçensk şəhərində konserv zavodu da açılacaq; şirkət rəsmisi qəzetimizə açıqlamasında bu layihələrə aydınlıq gətirdi

Azərbaycandan “Azərsun Holdinq” şirkəti Rusiyanın Krasnodar vilayətində çay fabriki açıb. Fabrik vilayətin ermənilərin və kürdlərin də sıx yaşadığı Beloreçensk şəhərində işə başlayıb. Vilayətin yerli KİV-lərində yer alan xəbərlərdə 2.5 milyon dollara başa gələn fabrikin “Anadolu İnvestment” şirkəti tərəfindən açıldığı qeyd edilirdi. Məlum oldu ki, bu şirkət “Azərsun Holdinq”in tərkibinə daxil olan Azərbaycan Sənaye Bankının əsas səhmdarlarından biridir.

Bankın səhmlərinin 97 faizi bu şirkətə, 2 faizi “Sübhan Trans” nəqliyyat şirkətinə, 1 faizi isə “Azərsun Holdinq”in prezidenti Abdolbori Goozalın qardaşı Tahir Goozala məxsusdur. Krasnodar vilayətinin yerli KİV-lərində Beloreçensk şəhərinin administrasiyasına istinadən yayılan xəbərlərdə deyilirdi ki, yeni açılan çay fabrikində 100 nəfər işləyəcək. Tikintisi başlayan və 350 milyon rubla başa gələcək konserv zavodunda isə yerli xammaldan bir çox adda konserv məhsullarının istehsalı nəzərdə tutulur. Hər iki layihə Azərbaycan şirkəti ilə vilayətin qubernatoru arasında ötənilki Soçi investisiya forumunda razılaşdırılıb.
İnternet ensiklopediyası “Vikipediya”da yer alan məlumatlara əsasən Beloreçensk rayonu etnik baxımdan xeyli qarışıqdır. Orada əhalinin təxminən 65 faizini ruslar təşkil edir, ermənilər isə 25 faizdir. Həmçinin bu rayonda kürdlər, o cümlədən yezidi kürdlər, avarlar, osetinlər və azərbaycanlılar da yaşayır. Bu etnik tərkibi nəzərə alaraq Azərbaycan şirkətinin nədən ermənilərin də sıx yaşadığı rayona irihəcmli investisiyalar qoymasının motivlərini araşdırmağa çalışdıq. “Azərsun Holdinq”in ictimaiyyətlə əlaqələr departamentinin rəhbəri Kazım Babayev qəzetimizə açıqlamasında bildirdi ki, Beloreçensk rayonunda çay fabrikini “Anadolu İnvestment” yox, “Azərsun” açıb. “Bəli, bu rayon əhalisinin etnik tərkibi kifayət qədər qarışıqdır. Orada ermənilər, kürdlər və digər millətlərdən olanlar çox yaşayır. Ancaq Beloreçensk rayonunda, bütövlükdə Krasnodar vilayətində olduqca fəal, işgüzar azərbaycanlı diasporu da var. Bizim diasporumuzun üzvləri çay fabrikinin qarşısında Azərbaycan bayrağının dalğalanmasından böyük qürur hiss keçirdiklərini deyirdilər, Azərbaycandan gələn şirkətin orada iş görməsi və bayrağımızı qaldırması onları çox qürurlandırıb”. K.Babayev məlumat verdi ki, “Azərsun” investisiyalar üçün Krasnodar vilayətini təsadüfən seçməyib. O bildirdi ki, Soçidə keçiriləcək olimpiya oyunları ilə əlaqədar hər il oraya xarici şirkətləri cəlb etmək üçün investisiya forumları keçirilir: “Bizim şirkət də bu forumlardan birində investisiya layihələri ilə bağlı razılığa gəlib. Krasnodar vilayətinin qubernatoru çox işgüzar adamdır və orada investisiyalar üçün olduqca əlverişli mühit yaradılıb, məmur süründürməçiliyinə son qoyulub”.

F.MƏMMƏDOV

866 dəfə baxılıb