“ƏT MƏHSULLARININ QİYMƏTİ ARTACAQ” | İqtisadiyyat

	12 fevral 2012


Onlayn ictimai-siyasi qəzet

İqtisadiyyat

“ƏT MƏHSULLARININ QİYMƏTİ ARTACAQ”

2010-09-09

Vüqar Bayramov: “İllik inflyasiya 8 faizdən az olmayacaq”

Avqust ayında kənd təsərrüfatı məhsullarının istehsal qiymətləri əvvəlki ayla müqayisədə 1,1 faiz bahalaşıb. Dövlət Statistika Komitəsinin məlumatına görə, ay ərzində bitkiçilik, bostan və bağçılıq məhsullarının qiymətləri 2,4 faiz bahalaşıb, diri mal-qara və heyvandarlıq məhsullarının qiymətləri isə əvvəlki ayla müqayisədə 0,4 faiz ucuzlaşıb. Qeyd edək ki, Mərkəzi Bank ilin sonuna ölkədə 6 faizlik inflyasiya proqnozlaşdırır.

İqtisadçı-ekspert Vüqar Bayramov bildirir ki, rəsmi elan edilən qiymət artımları reallığı tam əks etdirmir. Xüsusən avqust ayında ərzaq məhsullarının qiymətinin 1 faiz artması real rəqəm deyil: “Əslində qiymət artımları daha yüksəkdir. Bütün hallarda istər rəsmi, istərsə də müstəqil hesablamalarda avqust ayında qiymət artımlarının baş verdiyini müşahidə edirik”.
İqtisadçının rəyinə görə, bahalaşma bundan sonra da davam edəcək. İlin sonuna doğru bu artımlar daha da sürətlənəcək: “Bahalaşma yalnız idxal olunan ərzaq məhsullarının qiymətində deyil, o cümlədən kənd təsərrüfatı məhsullarının qiymətində də özünü göstərir. Güman edilir ki, idxal məhsullarında baş verən bahalaşma neftin dünya bazar qiymətinin artması nəticəsində dünya bazarındakı artımlarla bağlıdır. Eyni zamanda dolların möhkəmlənməsi fonunda dünya bazarında ərzaq və qeyri-ərzaq məhsullarında artımlar müşahidə edilməkdədir”.
Mütəxəssis bildirir ki, dünyada və Azərbaycanda ət məhsullarının istehsalının azalması, eləcə də dünya bazarında ət məhsullarının qiymətinin 4 faiz bahalaşması bizdə də bu istiqamətdə artım üçün əsas yarada bilər. Qeyd edək ki, Azərbaycan bazarlarında ətin qiyməti təxminən 1 manata yaxın bahalaşıb: “Bütün bunları nəzərə alaraq Mərkəzi Bank illik inflyasiyanı 6 faiz proqnozlaşdırsa da, 2010-cu ildə illik inflyasiya 8 faizdən az olmayacaq. Ümumiyyətlə ilin ikinci yarısında birinci yarısı ilə müqayisədə qiymət artımlarının daha yüksək olacağı proqnozlaşdırılır. Bu, həm də daxili faktorlarla bağlıdır. Kənd təsərrüfatı mövsümü başa çatdığı üçün bazara çıxarılan məhsulların qiymətində artımlar baş verib. Təklif tələbi üstələyə bilmir”. Ekspertin sözlərinə görə, cari ildə bir sıra ərzaq məhsullarının istehsalı baxımından qıtlıq olması, bundan əlavə, həm daxili, həm də xarici faktorlar ilin ikinci yarısında qiymət artımları tendensiyasının qalacağını, inflyasiyanın artacağını təsdiq edən amillər kimi dəyərləndirilməlidir.

HƏBİBƏ

908 dəfə baxılıb