ABŞ “İMEDİ”nin YALANÇI XƏBƏRİNİ “MƏSULİYYƏTSİZLİK” ADLANDIRDI

	13 fevral 2012


Onlayn ictimai-siyasi qəzet

Dünya

ABŞ “İMEDİ”nin YALANÇI XƏBƏRİNİ “MƏSULİYYƏTSİZLİK” ADLANDIRDI

2010-03-16

Böyük qalmaqala səbəb olan xəbəri Saakaşvili “faydalı” sayır

ABŞ-ın Gürcüstandakı səfiri Con Baas bəyan edib ki, “İmedi” telekanalının ötən şənbə günü ölkəni lərzəyə salan xəbəri məsuliyyətsizlikdir. Səfir Gürcüstanın ictimai kanalına müsahibəsində bildirib ki, bu xəbər jurnalistika standartlarına cavab vermir və ölkənin təhlükəsizliyinin möhkəmləndirilməsinə xidmət etmir.

“Bu xəbər məsuliyyətsizlikdir və jurnalistikada belə hallara yer olmamalıdır” deyə, səfir bildirib. Xəbər verildiyi kimi, Gürcüstan hakimiyyətinin nəzarətində olan “İmedi” kanalı şənbə günü axşam xəbərləri buraxılışında Rusiya qoşunlarının ölkəyə hücum etdiyini, Tiflisi tutaraq hökuməti devirdiyini və prezident Saakaşvilini öldürdüyü, müxalifət liderlərinin Rusiyanın tərəfinə keçərək xalq hökuməti yaratdığı barədə yarım saatlıq süjet yayımlayıb. Nəticədə ölkə əhalisi arasında böyük təşviş yaranıb, insanlar evlərini tərk edərək rus aviasiyasının bombardmanlarından yayınmaq üçün təhlükəsiz yer axtarıblar. Yarım saat sonra telekanal xəbərin imitasiya xarakteri daşıdığını elan etsə də ajiotaj səngiməyib. Bu süjet Tiflisdə etiraz aksiyalarına səbəb olub. Müxalifət ssenarinin şəxsən Saakaşvili tərəfindən yazıldığına inanır və onun cavab verməli olduğunu deyir. Rusiya da bu süjetdən Saakaşviliyə qarşı yeni təbliğat üçün istifadə edərək məsələni Avropa strukturlarında, NATO-da qaldırıb.
Etirazlara baxmayaraq, “İmedi”nin baş direktoru Georgi Arvaladze bildirib ki, o, vəzifəsindən istefa verməyə hazırlaşmır. Arvaladze süjetin yol açdığı ajiotaja görə üzr istəsə də hesab edir ki, bu uydurma xəbər Gürcüstanı gözləyən mümkün təhlükələr zamanı əhalinin reaksiyasını yoxlamaq baxımından əhəmiyyətli olub. O deyib ki, telekanal süjetin əvvəlində onun imitasiya xarakteri daşıdığını elan etmişdi və süjeti subtitrlərlə müşayiət etməyə ehtiyac yox idi. Prezident Mixail Saakaşvili də süjeti tənqid edib. O deyib ki, imitasiya xarakteri daşıyan xəbər hamını təşvişə salıb: “Mənim nənəm də narahatlıq keçirdi, baxmayaraq ki, bu xəbərdən az əvvəl məni görmüşdü”. Saakaşvili xəbəri tənqid etsə də deyib ki, imitasiya xarakterli süjet Gürcüstanın mümkün təhlükələrə qarşı hazırlanması üçün əhəmiyyətli olub. Lakin müxalifət hesab edir ki, bu təxribat iqtidarın mayın 30-da Tiflis meri postuna keçiriləcək seçkilərin nəticələrinə təsir etmək üçün düşünülüb. Müxalifət liderləri “İmedi” telekanalının rəhbərliyinin məhkəmədə cavab verməsi üçün iddia qaldıracaqlarını deyirlər.

F.MƏMMƏDOV

682 dəfə baxılıb