ÇİLİ ŞAXTAÇILARI 4 AYDAN SONRA XİLAS EDİLƏCƏK

	13 fevral 2012


Onlayn ictimai-siyasi qəzet

Dünya

ÇİLİ ŞAXTAÇILARI 4 AYDAN SONRA XİLAS EDİLƏCƏK

2010-08-29

700 metr dərinlikdə qalan 33 mədənçi xilas olunacaqları günü gözləyir; onların 5-i depressiyaya düşüb

Çilidə mis mədənində baş vermiş qəzadan sonra yerin 700 metr dərinliyində qalmış 33 şaxtaçının taleyi dünya mətbuatının gündəmindən düşmür. Qəza avqustun 5-də baş verib və şaxtaçıların taleyindən uzun müddət heç bir xəbər almaq mümkün olmayıb. Yalnız avqustun 22-də xilasedicilərin açdıqları dəlik şaxtaçıların qəzadan sonra 50 kvadratmetrlik sığınacağa yerləşə bildiklərini və onların hamısının sağ olduğunu üzə çıxarıb. Şaxtaçılar bu dəlik vasitəsilə məktub ötürə biliblər və ölkə prezidentindən xahiş ediblər ki, onları bu cəhənnəmdən xilas etsin.

Şaxtaçıların sağ qalması möcüzə hesab edilir. Bu fakt məlum olandan sonra Çili hakimiyyəti xarici ölkələrin də dəstəyi ilə onların xilas edilməsi üçün işlərə başlayıb. Lakin elan edilib ki, şaxtaçıların çıxarılması üçün 4 ay vaxt lazım ola bilər. Bu müddət ərzində onların sağ qalması üçün diametri bir neçə santimetr olan boru vasitəsilə şaxtaçılara içməli su, ərzaq, zəruri geyim və vaxtlarını keçirə bilmək üçün stolüstü oyunlar göndərilir.
İki gün əvvəl isə şaxtaçılar onlara ötürülən kamera vasitəsilə görüntülərini çəkərək yuxarı ötürə biliblər. Bu videoda onların yaxşı əhvalda olduqları görünürdü. Çilinin səhiyyə naziri deyir ki, arıq, yarıçılpaq və saqqallı şaxtaçıların kifayət qədər sağlam olduqları görünür.
“Biz burada hər şeyi yaxşı təşkil etmişik. Burada əylənirik, hər gün görüşüb planları müzakirə edirik. Dua edirik” - deyə mədəndə qalan şaxtaçılar kameraya əllərini yelləyirlər. Bir kadrda tibbi ləvazimat şkafını görmək olar. Onlardan biri öz dostlarını tərifləyir, digərləri isə əl çalıb Çili himnini oxuyur.
Lakin dünən məlum olub ki, şaxtaçılardan 5-i depressiyaya düşüb və onların durumu psixoloqlarda narahatlıq yaradır. Səhiyyə naziri Hayme Manaliç deyib ki, onlar öz yoldaşları ilə ünsiyyətə girmir, yemək yemir və videokameralara görüntü vermirlər. Nazir şaxtaya endirilmiş xüsusi danışıq qurğusu vasitəsilə depressiyaya düşən şaxtaçılarla həkim-psixioloqun ünsiyyətə girməyə çalışdığını deyib.
Mütəxəssislərin sözlərinə görə, uzun müddət yerin dərinliyində qalan insanlarda depressiya və qəzəb hisslərinin baş qaldırması gözləniləndir. Bildirilir ki, yaxın günlərdə insanın qapalı məkanda uzun müddət qalmasına dair təcrübələri bölüşmək üçün NASA mütəxəssisləri də Çiliyə gedəcək. Şaxtaya yol açmaq üçün gətirilən qazma qurğusu isə gündə ən çoxu 20 metr qaza bilər. Qazma işləri bu gün başlayacaq.
Əvvəlcə kiçik tunel qazılacaq, daha sonra onun diametri iki dəfə böyüdüləcək və şaxtaçılar oradan çıxarılacaq. İndi əsas məsələ tunel açılanadək onların sağ qalmasına nail olmaqdır.

F.MƏMMƏDOV

641 dəfə baxılıb