ÇEÇEN YARAQLILARI PREZİDENTİN KƏNDİNİ BASDI

	12 fevral 2012


Onlayn ictimai-siyasi qəzet

Dünya

ÇEÇEN YARAQLILARI PREZİDENTİN KƏNDİNİ BASDI

2010-08-30

Ramzan Kadırovun mühafizəçiləri də döyüşə girib; baş verənlər barədə ziddiyyətli xəbərlər var

Şimali Qafqazdan hər gün atışma və terror aktları barədə xəbərlər gəlməkdədir. Lakin dünən Çeçenistanda yaşananlar gözlənilməz hadisə kimi qarşılanıb. “RİA-Novosti” agentliyinin Şimali Qafqaz federal dairəsi üzrə hüquq-mühafizə orqanlarına istinadən yaydığı xəbərə görə, yerli vaxtla gecə saat 04:30 radələrində Çeçenistanda onlarla yaraqlı prezident Ramzan Kadırovun doğma kəndinə basqın edib. Kurçaloy rayonunun Sentroy kəndinə daxil olan yaraqlılar evlərə od vurublar və milis dəstələri ilə döyüşə giriblər. Döyüşə Kadırovun bu kənddən olan mühafizəçiləri də qatılıb. Azı 5 kənd sakininin və iki milis əməkdaşının həlak olduğu xəbər verilir.

Baş verənlər haqda məlumat alan kimi Kadırov özü də kəndə gəlib və yaraqlılara qarşı əməliyyata şəxsən rəhbərlik etməyə başlayıb. Kəndin mühasirəyə alındığı və döyüşlərin səhər saatlarına qədər davam etdiyi bildirilir.
Çeçenistan prezidentinin mətbuat xidməti baş verənlər barədə qısa məlumat yayaraq yaraqlıların Kadırovun kəndinə basqın etdiklərini təsdiqləyib. Məlumatda bildirilir ki, yaraqlılar “xüsusi problem olmadan” zərərsizləşdirilib, onlardan azı 12 nəfəri öldürülüb, qalanların isə axtarışı davam edir. Daha sonra Kadırov özü də kənddə jurnalistlərə açıqlama verib. Öldürülən yaraqlıların cəsədlərinin yanında jurnalistlərlə söhbət edən Çeçenistan prezidenti deyib ki, zərərsizləşdirilən yaraqlı qruplaşması onun doğma kəndinə basqın etməyə cəhd göstərib. Lakin görülən operativ tədbirlər nəticəsində hücumun qarşısı alınıb: “Vəziyyət stabildir və nəzarət altındadır. Bir neçə yaraqlı qaçmağa müvəffəq olub, onlar hücumu videolentə alaraq sifarişçiyə göstərmək üçün aradan çıxıblar, lakin tezliklə onları da tapıb məhv edəcəyik”. Məlumatlara görə, hücum edən yaraqlıların sayı 30-dan çox olub. Bu rəqəm Kadırovun bir neçə gün əvvəl Çeçenistanda qalan yaraqlıların sayının 50-60 nəfərdən çox olmadığı barədə verdiyi açıqlama ilə uzlaşmır.
Çeçenistanla qonşu Dağıstanda da vəziyyət stabil deyil. Bu muxtar respublikanın Qubden rayonunda aşkar edilmiş yaraqlı dəstəsinə qarşı iki gün davam edən xüsusi əməliyyatı ötən şənbə başa çatdırmaq mümkün olub. “İnterfaks”ın xəbərinə görə, azı 5 yaraqlı öldürülüb, OMON isə 1 itki verib. Dəstə üzvlərinin qalanlarının qaçdığı bildirilir. Onların axtarışı üçün əməliyyatlar gedir. Yaraqlıların Dağıstandakı radikal vəhhabi qruplaşmalarının liderlərindən olan Maqomedəli Vahabovun dəstəsindən olduğu bildirilir. Vahabov özü bir neçə gün əvvəl öldürülüb.

Xəbər xidməti

1263 dəfə baxılıb