AŞPA HƏMMƏRUZƏÇİLƏRİ BAKIDA MƏTBUAT KONFRANSI KEÇİRİBLƏR

	22 may 2012


Onlayn ictimai-siyasi qəzet

Gündəm

AŞPA HƏMMƏRUZƏÇİLƏRİ BAKIDA MƏTBUAT KONFRANSI KEÇİRİBLƏR

2012-02-02

Bu gün Azərbaycanda səfərdə olan Avropa Şurası Parlament Assambleyasının (AŞPA) Monitorinq Komitəsinin Azərbaycan üzrə həmməruzəçiləri Pedro Agramunt və Cozef Debono Qrex səfərin yekunlarına həsr olunmuş mətbuat konfransı keçiriblər.

APA-nın xəbərinə görə, həmməruzəçilər Bakıda keçirdikləri görüşlər barədə məlumat veriblər.
Həmməruzəçilər bütün tərəflərlə görüşdüklərini, 2 apreldə həbs olunanların tezliklə azadlığa buraxılacağına ümid etdiklərini deyiblər : “Biz müzakirələrdə 2 apreldə həbs olunmuş 16 nəfərin məsələsini qaldırdıq. Ümid edirik ki, onlar azadlığa buraxılacaqlar”.
Onların sözlərinə görə, Azərbaycan hökuməti öhdəliklərinin yerinə yetirilməsi yönündə addımlar atır: “Bu istiqamətdə atılan addımlar uğurlu nəticə verəcək”.
Həmməruzəçilər Ədliyyə Nazirliyinin razılığı ilə 2 aprel hadisələrində həbs olunanlarla və onların vəkilləri ilə, həmçinin sabiq iqtisadi inkişaf naziri Fərhad Əliyevin nümayəndəsi ilə görüşüblər.
Pedro Aqramunt jurnalistlərin “2 aprel hadisələrində həbs olunanların siyasi məhbus hesab etmək olarmı” sualına cavab olaraq deyib: “Mən buna əmin deyiləm, əgər insanlar kütləvi etiraz aksiyasına gedərək avtobusların, binaların şüşələrini qırırlarsa bu zaman bu dinc aksiya hesab olunmur”.
Həmməruzəçilər bildiriblər ki, onlar Bakıda siyasi partiyalar, QHT-lər haqqında qanuna əlavələr və dəyişiklər barədə müzakirələr aparıblar, “Alternativ hərbi xidmət haqqında” qanun layihəsi ilə tanış olublar və Dağlıq Qarabağ münaqişəsinin həlli ilə bağlı fikir mübadiləsi aparıblar.
Pedro Aqramunt qoşunların təmas xəttində atəşkəs rejiminin pozulması ilə bağlı narahatlığını bildirib və deyib ki, hazırda da münaqişə nəticəsində həlak olduqları üçün münaqişəni “dondurulmuş” hesab etmək olmaz.
P. Aqramunt bildirib ki, Azərbaycan üzərinə götürdüyü öhdəliklər çərçivəsində ölkədə siyasi plüralizm, ümumi siyasi atmosferin yaxşılaşdırılması, 2013-cü ildə prezident seçkilərinin azad və ədalətli keçirilməsinə şərait yaradacaq.
Bakıda evlərin sökülməsi ilə bağlı sual da AŞ PA həmməruzəçisinə ünvanlanıb. O isə bu işdə şəffaflığın təmin olunmasının vacibliyini vurğulayıb və “evləri sökülən insanlara layiqli konpensasiya ödənilməsinə ehtiyac var” deyib.
Həmməruzəçilər deyib ki, səfərin nəticələri mart ayında Parisdə keçiriləcək monitorinq qrupunun iclasında təqdim olunacaq. Azərbaycan üzrə ümumi məruzə isə 2012-ci ilin sonunda hazır olacaq.
Qeyd edək ki, həmməruzəçilər bu il yanvarın 31-dən fevralın 2-nə kimi Bakıda səfərdə olub. Onlar Milli Məclisdə, Baş Prokurorluqda, Ədliyyə Nazirliyində görüşlər keçiriblər, siyasi partiyalar, ictimai təşkilatlar və qaçqın şəhərciyində görüşlər keçiriblər.

APA

447 dəfə baxılıb