ETİBAR PİRVERDİYEVİN DƏVƏLƏRİ SOYUQDAN TƏLƏF OLDU

	22 may 2012


Onlayn ictimai-siyasi qəzet

Gündəm

ETİBAR PİRVERDİYEVİN DƏVƏLƏRİ SOYUQDAN TƏLƏF OLDU

2012-02-04

Məmurun ekzotik biznesinə qış zərbəsi
“Azərenerji” ASC prezidentinin fermasında ölən dəvələrin əti və yunu, icra başçısının tapşırığı ilə satışa çıxarılıb; çobanın səhlənkarlığı Şabranın gündəmini dəyişdirib

Fevralın 2-si gecə saatlarında Şabranın Udulu kəndindəki dəvə fermalarından birində dəvələr kütləvi şəkildə tələf olub. 10-a yaxın dəvə donaraq ölüb, 23-ü isə son anda donmaqdan xilas olunub. Bu barədə qəzetimizə Udulu kənd sakinlərindən biri məlumat verib. Kənd sakinin sözlərinə görə, gecə saatlarında ölən dəvələrin əti kəsilib, yunu götürülüb və bazara çıxarılmaq üzrə maşınlara yüklənərək, naməlum istiqamətə aparılıb.

Dünən xəbərlə bağlı əlavə məlumat almaq üçün Şabrandakı mənbələrimizlə əlaqə saxladıq. Məlum oldu ki, güclü şaxta nəticəsində ölən dəvələr “Azərenerji” ASC prezidenti Etibar Pirverdiyevindir. Belə ki, “Azərenerji” prezidentinin rayonun Udulu kəndində 400 hektarlıq ərazidə 5 böyük dəvə ferması var. Dəvələrin tələf olması isə yenicə tikilmiş fermalardan birində olub. Hadisəyə səbəb çobanın fermanın istilik sistemini işə salmaması və güclü çovğunun fermanın qapısını açması olub. Nəticədə kəskin soyuq dəvələrin ölümünə səbəb olub.
Həmçinin öyrəndik ki, dünən səhər saatlarında Şabranın icra başçısı Novruz Novruzov səhər saat 11 radələrində ferma ərazisinə gəlib. Onu da qeyd edək ki, icra başçısı Pirverdiyevin dəvə biznesinin ortağıdır. 400 hektarlıq otlaq ərazini isə o, “Azərenerji” prezidentinə rayona yeni icra başçısı təyin olan zaman verib.
N.Novruzov tələf olan dəvələrin yununun qırxılması və kəsilərək ətinin bazarda satışa çıxarılması haqda tapşırıq verib. Rayon bazarındakı qəssablar fermaya gətirilib və soyuq vuran, ancaq hələ canı üstündə olan dəvələrin kəsiminə başlanılıb. Bakıdakı restoranlarla əlaqə saxlayan icra başçısının adamları sifariş götürüblər. Daha sonra kəsilmiş dəvə ətləri maşınlara yüklənərək Bakı istiqamətinə aparılıb. Mənbəmizin məlumatına görə, ölmüş və sonradan kəsilmiş dəvələrin ətləri Sumqayıt və Bakıdakı restoranlara paylanacaq.
Aldığımız məlumata görə, hazırda fermanın ətrafına tikanlı məftillər çəkilib və ərazi gecə-gündüz ciddi şəkildə mühafizə olunur. Mühafizəçilər fermaların yerləşdiyi ərazidə “Niva” markalı maşınlarla patrul kimi gəzirlər.
Qeyd edək ki, dəvə əti bahalı delikates sayılır. Dəvə yunundan toxunmuş xalçalar isə Avropada çox baha qiymətə satılır. Şabranda bəslənən dəvələrin yunu buradan Quba və Şamaxıya aparılır. Orada həmin yundan sırf Avropa bazarlarına göndərilmək üçün nəfis xalçalar toxunur. Yəni E. Pirverdiyev hansı işlə məşğul olduğunu yaxşı bilir.
Onu da qeyd edək ki, yüksək rütbəli məmurların əksəriyyətinin kənd təsərrüfatı təyinatlı obyektləri var. Onlardan daha geniş yayılanı isə fermalardır.

Fərahim İLQAROĞLU

4843 dəfə baxılıb