“BEYNƏLXALQ ALƏMDƏ ƏLİYEV REJİMİNİN TƏKLƏNMƏSİ PROSESİ GEDİR”

	22 may 2012


Onlayn ictimai-siyasi qəzet

Gündəm

“BEYNƏLXALQ ALƏMDƏ ƏLİYEV REJİMİNİN TƏKLƏNMƏSİ PROSESİ GEDİR”

2012-02-04

İctimai Palatanın sessiyasındakı çıxışında İsa Qəmbər ilginc açıqlamalar verdi

Bu gün İctimai Palatanın sessiyasında qurumun Koordinasiya Şurasının üzvü, Müsavat Partiyasının başqanı İsa Qəmbər çıxış edib. Çıxışın birinci hissəsində İsa Qəmbər son bir ayda, Koordinasiya Şurasına sədrliyi müddətində İP-in fəaliyyətindən danışdı.

“Bu, İctimai Palatanın yeni Koordinasiya Şurası seçiləndən sonra ilk sessiyasıdır. Onu deməliyəm ki, yeni heyət kifayət qədər məhsuldar və səmərəli çalışıb. Koordinasiya Şurasının iclaslarının keçirilməsi ilə yanaşı, o qədər məsələlər çox olub ki, növbədənkənar iclasların da keçirilməsi halları olub. Ölkəmizdə baş verən, ölkəmizlə bağlı beynəlxalq aləmdə baş verən bütün hadisələrə vaxtlı-vaxtında mövqelərimiz bildirilib. Bəyanatlarla, açıqlamalarla, müraciətlərlə İctimai Palatanın mövqeyi təmsil olunub. Eyni zamanda yanvar ayında 4 böyük tədbirimiz olub. 20 yanvarda İctimai Palatanın şəhidlərimizi ziyarət tədbiri kifayət qədər yüksək səviyyədə keçdi. Xüsusən də İctimai Palatanın üzvü olan və İctimai Palataya yaxın olan gənclər təşkilatlarının birgə yürüşü çox təsirli mənzərə idi. Hakimiyyətin 20 yanvarı sırf bir hüzn günü, yas günü kimi keçirmək cəhdlərinə qarşı gənclərimiz öz möhtəşəm yürüşlərini qoydular. Həmin yürüşdə xalqımızın mövqeyi ifadə olundu. Yanvarın 31-də Novxanıda ənənəvi tədbirimiz keçirildi. Havanın həddən artıq soyuq olmasına baxmayaraq yüksək səviyyədə bir tədbir keçdi. Böyük liderimizə sayğımızı bir daha ifadə etmiş olduq. Həmçinin yanvarın 21-də vicdan məhbusu, dostumuz Arif Hacılının 50 illik yubileyi ilə bağlı İctimai Palatanın bayram tədbiri oldu. Yanvar ayında biz Fransa Senatının qərarı ilə bağlı bir Dəyirmi Masa təşkil etdik. Çox yerinə və zamanına uyğun bir tədbir oldu. Ümumiyyətlə, qeyd eləmək lazımdır ki, Fransanın əvvəlcə parlamentinin başlatdığı, sonra da Senatının davam etdirdiyi məlum biabırçı proseslə bağlı İctimai Palata çox çevik, çox prinsipial qərarlar qəbul etdi, mövqe ortaya qoydu. Bu mövqe də əslinə qalsa Azərbaycanın həm maraqların cavab verən mövqe idi, eyni zamanda Azərbaycanın nüfuzunu xilas edən bir mövqe idi. Azərbaycan hakimiyyətinin bu məsələ ilə bağlı laqeyd, ikiüzlü siyasəti Azərbaycanın maraqlarına da zidd idi, həmçinin Azərbaycanın faktiki olaraq öz taleyinə biganə olması görüntüsü yaradırdı. Məhz belə bir mərhələdə İctimai Palatanın bu məsələ ilə bağlı çox dəqiq təhlilləri, vaxtında edilmiş müraciətləri, bəyanatları Azərbaycan xalqının mövqeyini ifadə eləmiş oldu. İctimai Palatanın fəaliyyəti sırasına mənim Türkiyə səfərimi də aid eləmək olar. Çünki bu səfərdə təkcə Müsavat Partiyasını deyil, bütövlükdə İctimai Palatanı təmsil edirdim. Yəqin ki, “Yeni Müsavat” qəzetindəki və bəzi saytlardakı məlumatlardan xəbərdarsınız. Qısa müddətli səfərdə Türkiyənin demək olar ki, bütün əsas partiyalarının liderləri ilə, rəhbərliyinə daxil olan şəxslərlə görüşlər keçirdik. Mövqeyimizi onlara təqdim etdik və onların da mövcud proseslərlə bağlı düşüncələrini, fikirlərini eşitmiş olduq. Bütövlükdə Türkiyədə bütün səviyyələrdə Azərbaycana diqqət, hörmət çox aydın nümayiş etdirildi. Türkiyə və Azərbaycanın birliyi Azərbaycan üçün həddən artıq zəruri olan, Azərbaycanın müstəqilliyinin, gələcəyinin, inkişafının təminatı olan önəmli faktdır. Türkiyə-Azərbaycan birliyi təkcə keçmişimizə yox, həm də gələcəyimizə bağlı bir gerçəklikdir. Bunu hər kəs bilməlidir.
İctimai Palatanın Koordinasiya Şurasının son bir ay ərzində fəaliyyətində əsas məsələlərdən biri İctimai Palatanın 2012-ci ildə məqsəd və hədəflərinin, fəaliyyət istiqamətlərinin müzakirəsi olub. Bir sənəd hazırlanıb və sizin diqqətinizə təqdim olunub. Sənəd kifayət qədər balanslı bir şəkildə hazırlanıb. Hesab edirəm ki, müzakirədən sonra həmin sənədi qəbul etmək olar. Bilirsiniz ki, İctimai Palatanı sizlərlə birlikdə o məqsədlə yaratmışdıq ki, mövcud saxta parlamentin buraxılmasına və yeni demokratik parlament seçkilərinin keçirilməsinə nail olaq. Bu məqsədlə bir çox addımlar atılıb, qərarlar qəbul olunub, sənədlər hazırlanıb ki, onlardan ən ciddisi “Avtoritarizmdən demokratiyaya keçidin Yol Xəritəsi”dir. Son vaxtlar o müzakirələr də olmuşdu, mən də təklif eləmişdim ki, artıq parlamentin növbədənkənar seçkiləri məsələsini qüvvədə saxlamaq şərti ilə, İlham Əliyevin istefası məsələsini gündəmə gətirməyin və mübarizəni daha da sərtləşdirməyin zamanıdır. Bu fikirlər də bu sənəddə ifadə olunub. Siyasi rejim dəyişikliyi əsas məqsəd kimi göstərilib. Eyni zamanda kütləvi xalq hərəkatına başlamaq zərurəti aydın bir şəkildə qeyd olunub. Yəni bu sənəd hesab edirəm ki, 2012-ci ildə bizim daha fəal, daha fədakar mübarizə aparmağımıza və ölkədə köklü dəyişikliklərə nail olmağımıza yol göstərə bilən bir sənəd olmağa layiq vəziyyətdədir”.
İsa Qəmbər sonra bildirdi ki, 2012-cil ölkədə köklü demokratik dəyişikliklərə nail olmaq üçün tamamilə uyğun bir ildir. Bütün şərtlər yetişir: “Təbii 2013-cü ildəki prezident seçkiləri də yaddan çıxarılmamalıdır. Ancaq biz mübarizəmizi, fəaliyyətimizi seçkidən seçkiyə müəyyənləşdirməməliyik. Mən hesab edirəm ki, 2012-ci ildə də köklü dəyişikliklərə nail olmaq mümkündür. Şərtlər buna imkan verir. Beynəlxalq aləmdə Əliyev rejiminin təklənməsi prosesi gedir. Bu, Əliyev rejiminin özünün səhvləri, yanlışları ilə bağlı yaranmış bir vəziyyətdir. Azərbaycan hakimiyyətinin heç bir xarici siyasət proqramının olmaması, beynəlxalq aləmdə öz yerini müəyyənləşdirməməsi, hamı ilə eyni dərəcədə məsafədə dayanmaq cəhdi, Azərbaycana dostluq edə biləcək dövlətlərlə də, Azərbaycana düşmənçiliyi dəyən və dəyə biləcək dövlətlərlə də eyni məsafədə dayanmaq istəməsi, müasir beynəlxalq sistemdə öz yerini müəyyənləşdirmək istəməməsi, hər şeydə yalnız öz maraqlarını güdməsi bu hakimiyyətin etibarsızlığı rəyini yaradıb. Bu, hakimiyyətin özü üçün çox təhlükəlidir, ancaq həm də Azərbaycan üçün təhlükəlidir. Dünyanın dəyişən zamanında Azərbaycanı Əliyev rejiminin təmsil etməsi Azərbaycan üçün təhlükədir. Biz fəaliyyətimizdə bu gerçəkliyi də nəzərə almalıyıq. Dünya dəyişir və Azərbaycanın çox prinsipial məsələlərdə mövqe tutması tələb olunur. Azərbaycan hakimiyyəti də buna qadir deyil. Sınaqlar gündən günə artır. Bu gün Suriyanın məsələsi var. Suriya məsələsi BMT-də müzakirə edilir. Azad dünya prinsipial qərarlar qəbul edilməsinə çalışır, Rusiyada müəyyən qüvvələr buna müqavimət göstərir. Azərbaycanın mövqeyi isə hələ ki, qeyri-müəyyəndir və çox təəssüf ki, yanlış olması ehtimalı da istisna olunmur. Sabah İran məsələsi daha da aktuallaşacaq. Təbii ki, qonşu ölkədə baş verə biləcək hadisələrdən narahatıq. 10 milyonlarla Azərbaycan türkünün yaşadığı bir ölkədə hadisələrdən narahat olmaya bilmərik. Ancaq istənilən halda Azərbaycan dövləti bu məsələdə aydın, prinsipial, birmənalı mövqe tutmağı bacarmalıdır. Bu mövqe ilk növbədə Azərbaycanın maraqların, eyni zamanda dünyada gedən demokratikləşmənin qaçılmazlığını nəzərə alan bir mövqe olmalıdır. Rusiyada gedən proseslər də Azərbaycanda gedən proseslərə təsir edən amillərdəndir.

“Rüstəm İbrahimbəyovun, Əkrəm Əylisinin, Cəmil Həsənlinin, Ramiz Rövşənin, Rafiq Əliyevin qarşısına hakimiyyət hansı ziyalısını çıxaracaq?”

Azərbaycandakı avtoritar rejimin də dayağı bir çox postsovet ölkələrində olduğu kimi, Rusiyadakı avtoritar rejimdir. Bu baxımdan, Rusiyada gedən dəyişikliklər Azərbaycanda dəyişiklikləri labüd edən beynəlxalq amillər sırasına əlavə oluna bilər. Azərbaycanın özündə isə hesab edirəm ki, hakimiyyətin görməmişliyi və səriştəsizliyi, cəmiyyətdə artan narazılıq bizim 2012-ci ildə bütün qüvvələri cəm eləmək, ölkədə köklü dəyişikliyə nail olmağımıza imkan yaradır. Fəallıq gündən-günə artır. Bu günlərdə Ziyalılar Forumu gözəl bir tədbir keçirdi. Gənclər mövzusu qoyulmuşdu. Çox vacib və düzgün mövzudur. Gənclərin problemlərinin gündəmə daşınması, gənclərə dəstək, eyni zamanda gənclərin prosesin önünə çıxmasını təmin etmək həddən artıq zəruridir. Bu baxımdan, Ziyalılar Forumunun belə bir tədbir keçirməsi və tədbirdə məruzəçi kimi tanınmış iqtisadçı və siyasətçi Qubad İbadoğlunu dəvət etməsi, tədbirə bütün real müxalifət partiyalarının, gənclər təşkilatlarının liderlərini dəvət etməsi (o cümlədən bu tədbirə biz də dəvət olunmuşduq, təəssüf ki, tədbir Koordinasiya Şurasının iclası ilə eyni vaxta düşdüyü üçün biz iştirak eləyə bilmədik) olduqca önəmli faktdır. Ziyalılar Forumunun artıq siyasi qüvvələrlə iç-içə müzakirələr aparmağı mümkün sayması özü də ciddi gəlişmədir. Görünür, Vahid Qazinin də döyülməsi hakimiyyətin buna cavabıdır. Vahid Qaziyə qarşı zorakılıq ziyalılara yönəlmiş bir xəbərdarlıdır. Bu hakimiyyətin axı başqa arqumenti yoxdur. Rüstəm İbrahimbəyovun, Əkrəm Əylisinin, Cəmil Həsənlinin, Ramiz Rövşənin, Rafiq Əliyevin, digərlərinin qarşısına hakimiyyət hansı ziyalısını çıxaracaq? Ona görə də yenə də zorakılığa əl atırlar. Biz ziyalılarımıza tam dəstəyimizi ifadə eləməliyik.
Cəmiyyətdəki narazılığı, gənclərin fədakarlığını, ziyalıların mövqeyini bir araya gətirərək işimizi fəallaşdırmalıyıq. Bu il güclü bir xalq hərəkatının formalaşmasını həyata keçirməyi bacarmalıyıq. Ciddi kütləvi tədbirlərə ehtiyac var. Vəziyyət imkan verir ki, İctimai Palata yaxın zamanlarda böyük kütləvi tədbirlərə qərar versin”.

Etibar SEYİDAĞA

2961 dəfə baxılıb