“SOYQIRIM QANUNU LƏĞV EDİLƏCƏK” | Gündəm

	22 may 2012


Onlayn ictimai-siyasi qəzet

Gündəm

“SOYQIRIM QANUNU LƏĞV EDİLƏCƏK”

2012-02-09

Erməni diasporu Fransanı hədələdi

Fransa prezidenti Nikola Sarkozinin partiyasının yetkililərindən olan Qaudin "Fransa Konstitusiya Şurası, “erməni soyqırımı”nın inkarını cinayət sayan qanununu rədd edəcək. Bu azmış kimi hətta 2001-ci ildə Fransa parlamentində bu “soyqırım”ı tanıyan qanun da ləğv edilə bilər” deyib.

Türkiyənin Milliyət qəzetinin (milliyet.com.tr) yazdığı xəbərə görə, Fransada erməni diasporunun ən güclü olduğu Marsel şəhərinin bələdiyyə sədri və iqtidardakı Xalq Hərəkəti Birliyinin (XHB) Senatdakı qrup rəhbəri Jan Klod Qaudin çıxılmaz vəziyyətə düşüb: “Çox pessimistəm. Bu qanun Konstitusiya Şurasından keçməyəcək. Hətta bundan daha betəri də ola bilər. Yəni məhkəmə, 2001-ci ildə “erməni soyqırımı”nı tanıyan qanunu və hətta yəhudi soyqırımını inkar edənləri cəzalandıran Qayysot qanununu da ləğv edə bilər. Parlamentin isə bu qanunun yenidən gündəmə gətirmək üçün kifayət qədər vaxtı yoxdur. Bölgənin bir parlament üzvü kimi həqiqətləri söyləməliyəm”. J.K.Qaudin bu sözləri Marseldə keçirilən Fransız Ermənilərini Koordinasiya Şurasının (FEKŞ) yığıncağında erməni diasporuna xitabən söyləyib.
Qanunun Konstitusiya Şurasına aparılmasına reaksiya verən erməni diasporu isə hakim partiyanın məclisdəki 52 namizədinin sənədin əleyhinə səs verməsini sərt tənqid edib. Konstitusiya Şurasına göndərilən etiraz müraciətinə 18 iqtidar senatorunun imza atması isə erməniləri daha da özlərindən çıxarıb. Bu çaşqınlıq Fransadakı erməni diasporunun liderlərindən olan FEKŞ rəhbəri Culiyan Harunyan sözlərində açıq-aydın hiss olunub: “Qanunun əleyhinə hazırlanan sənəddə iqtidar partiyası senatorlarına da aid imzaların olması düşündürücü haldır. Hesab edirik bizimlə məzələnirsiniz. Hakim partiya içərisində çox ciddi bir fikir ayrılığı var. Prezident öz adamlarını idarə edə bilmir”.
Digər erməni Paskal Şamazyan bağda oturub bağbanla dava etməsi azmış kimi, hakim partiyanı hədələməkdən də çəkinməyib: “Son dərəcə paradoksal vəziyyətdir. Seçkilərə bir neçə ay qaldığı halda iqtidar necə olur ki, bu cür davrana bilir. Nəyə görə qanunun təsdiqlənməsi gecikdirildi? Üstəlik Konstitusiya Şurasına göndərilməsinə şərait yaradıldı. Qəribə duyğular içindəyik. Bizim qələbəmizi oğurladılar. Bu gün hirs hakimdir. Bizi aldatdılarmı? Hər nə baş verdisə bunu yaxında öyrənəcəyik və əlimiz qolumuz bağlı oturmayacağıq”.
Fransa prezidenti Nikola Sarkozinin də qanunun ləğv olunacağına şübhəsi qalmayıb. O, Fransanın məşhur "Politique Internationale" jurnalına verdiyi müsahibədə üzdəniraq qanun səbəbindən Türkiyə ilə gərginləşən əlaqələri qiymətləndirərkən "Mən Türkiyəyə hörmət edirəm, amma Türkiyə də öz tərəfdaşlarına hörmətli olmalıdır" deyib.

Cavid SƏRXANBƏYLİ

4952 dəfə baxılıb