BAŞ NAZİRLƏ YAZIÇININ SÖZ DUELİ | Gündəm

	22 may 2012


Onlayn ictimai-siyasi qəzet

Gündəm

BAŞ NAZİRLƏ YAZIÇININ SÖZ DUELİ

2012-02-10

Ərdoğanla tərs düşmək amerikalı Pol Osterin işinə yarayıb

Türkiyənin baş naziri Rəcəb Tayyib Ərdoğanla məşhur Amerika yazıçısı Pol Oster arasında söz dueli davam edir. Bu söz “atışması”na artıq Türkiyənin ana müxalifət lideri Kamal Kılıçdaroğlu da qatılıb. Müxalifət lideri yazıçının iradlarını haqlı sayıb və onu ölkəyə dəvət edib.

Qeyd edək ki, Oster Türkiyə mətbuatına müsahibəsində Türkiyədə jurnalist və yazarların həbsdə olduğunu deyərək, bu ölkədə keçiriləcək kitab təqdimatına qatılmaqdan imtina etdiyini bildirib. Sitat: “Yazar və jurnalistlərin həbsdə olması səbəbindən Türkiyəyə gəlməkdən imtina edirəm. Artıq 100 nəfəri keçib. Biz demokratlar Buşdan xilas olduq, Türkiyədə nələr olur. Ən çox narahat olduğum ölkədir Türkiyə. Demokratik qanunları olmayan ölkələrə dəvət alsam da getmirəm. Eyni səbəblə Çindən gələn dəvətləri rədd eləmişəm”.
Pol Oster Amerikalı yazarın bu sözləri Türkiyənin baş naziri Rəcəb Tayyib Ərdoğanı qəzəbləndirib: “Həbsdə olan jurnalistlərə görə Türkiyəyə gəlməkdən imtina edirəm deyib. Biz sənə çox möhtacdıq. Niyə gəlmədin, aman gəl, nə olur? Gəlsən nə olur, gəlməsən nə?” Ərdoğan deyib ki, P.Oster Türkiyəyə gəlməkdən imtina edir, ancaq Fələstin xalqına zülm edən İsrail hakimiyyətinin cinayətlərinə göz yumur: “Bu cənab Türkiyəyə gəlmir, amma axırıncı səyahəti İsrailə olub. Bəs niyə o, bir dəfə də olsun ərəblərə zülm edən İsraili tənqid etmir?”
Kamal Kılıçdaroğlunun Osteri müdafiə etməsini də tənqid edən baş nazir Kılıçdaroğluna Osterlə birlikdə İsrailə getməyi tövsiyə edib: “Tam mənasında qazan yuvarlanıb qapağını tapıb. Türk hökumətini protest edən bu yazar, sonuncu dəfə 2010-cu ildə İsraildə beynəlxalq yazarlar konfransına qatılıb. Guya İsrail demokratik və dünyəvi bir ölkədir. Yahu, sən nə cahil bir adamsan, İsrailə necə dünyəvi bir dövlət deyə bilərsən? İsrail tam bir dini dövlətdir. Yəqin ki, bu yaz keçirilən konfransa Pol Oster Kılıçdaroğlu ilə birgə gedər”.
Ancaq maraqlıdır ki, Ərdoğanla söz dueli Osterin işinə gəlib. Türkiyədə Pol Osterin kitablarına maraq artıb. Yazıçının son romanı “Qış gündəliyi” ən çox satılan kitablar sırasındadır. Halbuki bu əsər ötən həftələrdə ən çox satılan kitablar siyahısına düşə bilməyibmiş.
Qeyd edək ki, Pol Oster (Paul Auster) 1947-ci ildə ABŞ-ın Nyu Cersi ştatında dünyaya gəlib. Kolumbiya Universitetində ingilis, fransız və italyan ədəbiyyatı üzrə təhsil alıb. 1971-1974-cü illərdə Fransada yaşayan Oster yazar peşəkarlığına nail olub. 2006-cı ildə İspaniyanın məşhur “Asturiya” ədəbiyyat mükafatına layiq görülüb. Yazarın bir sıra əsərləri, o cümlədən “Duman” romanı əsasında film çəkilib.