TÜRK NAZİRİN VAŞİNQTONDAN MESAJLARI | Gündəm

	22 may 2012


Onlayn ictimai-siyasi qəzet

Gündəm

TÜRK NAZİRİN VAŞİNQTONDAN MESAJLARI

2012-02-11

Əhməd Davudoglu: “Hakimiyyətlərin atadan oğula keçdiyi dövr artıq arxada qaldı”

Vaşinqtonda səfərdə olan Türkiyənin xarici işlər naziri Əhməd Davudoğlu Qərbi Yaxın Şərqdə demokratiyanı təhlükəsizliyə qurban verməməyə çağırıb. “Turan”ın Vaşinqton müxbirinin məlumatına görə, “George Washington” Universitetində çıxışı zamanı nazir deyib ki, hakimiyyətlərin atadan oğula keçdiyi dövr artıq arxada qaldı: “Dünya dəyişir. Misirdə Hüsnü Mübarək, məsələn, 20 il əvvəl insanların çap makinası istifadə etdiyi dövrdə də prezident idi, indiki Facebook dövründə də. Bu, tarixə təhqirdir”.

Ə.Davudoğlu ötən il ərəb ölkələrində baş qaldırmış inqilabların “qarşısıalınmaz” olduğunu bəyan edib. O, Qərbi “ərəb baharı”na adekvat cavab verməyə və “tarixi səhvləri təkrarlamamağa” çağırıb. Bu zaman o, Rumıniyada Çavuşeskunun devrildiyi dönəmi xatırladıb: “Mübarək, Qəzzafi kimi diktatorlar hələ o zaman getməli idilər”.
Suriyadan bəhs edərkən, nazir qeyd edib ki, hazırda Bəşər Əsədin opponentləri aylar əvvəl Misirdə və Tunisdə müxalifətin səsləndirdiyi şüarları təkrarlayırlar: “Mesaj aydındır. Əsəd getməlidir. Türkiyə olaraq, biz Suriyada hər gün insan ölümünə göz yuma bilmərik. Suriya xalqını dəstəkləmək üçün beynəlxalq platforma yaratmalıyıq”.
Ə.Davudoğlu deyib ki, Türkiyə Əsədi Suriyanın “Qorbaçovu” görmək istəyirdi, ancaq o, “Miloşeviç” olmaq yolunu tutdu.
Nazir onu da bəyan edib ki, Türkiyə yerləşdiyi regionda azad və demokratik mühitin tərəfdarıdır və Ankara “öz xalqına qarşı çıxan istənilən liderə” arxasını çevirəcək: “Avtoritar rejimlərə artıq bu əsrdə yer yoxdur”.
Türkiyə XİN-in başçısı çıxışının sonunda avtoritar cəmiyyətləri belə təsvir edib: “Hansı ölkədə ona əvvəllər rəhbərlik etmiş eks-prezident yaşamırsa, deməli, o, artıq avtoritar ölkədir”.
Qeyd edək ki, sözügedən universitetdə “Hibrit rejimlərdə hakimiyyət-cəmiyyət münasibətləri: Azərbaycan nümunəsi” mövzusunda keçirilən tədbirdə ölkədə insan haqları və siyasi problemlər, müxalifətin boğulması və sosial narahatlıqlardan bəhs edilib.
Əsas məruzəçi qismində Türkiyədən olan araşdırmaçı Gokhan Alper Ataser çıxış edib.
O, xüsusilə son illərdə Azərbaycanda sosial və siyasi sahədə narazılıqların səsləndiyini, hakimiyyətin əhalinin böyük hissəsindən uzaq düşdüyünü diqqətə çatdırıb. Siyasi səhnəyə yaxın buraxılmayan nisbətən kasıb təbəqə isə çıxış yolunu dində axtarır. Lakin bu, dinə axının yeganə səbəbi deyil. “Adamlar bəzən maraq üçün din arxasınca gedirlər", - Ataser bildirib.
Müzakirələrdə Dövlət Departamenti və digər qurumların nümayəndələri də iştirak ediblər.
Gokhan Ataser Azərbaycanda siyasi vəziyyətin monitorinqini davam etdirəcək.

Xəbər xidməti

2662 dəfə baxılıb