DEPUTATLARIMIZ AYIN SONU İRƏVANA GEDƏCƏK

	22 may 2012


Onlayn ictimai-siyasi qəzet

Gündəm

DEPUTATLARIMIZ AYIN SONU İRƏVANA GEDƏCƏK

2012-02-11

Akif Nağı: “Əgər Qarabağı sevirlərsə, bu səfərə getməsinlər”

Fevralın sonlarında Azərbaycan Milli Məclisinin bir qrup üzvü Ermənistan paytaxtı İrəvanda keçiriləcək toplantıda iştirak etmək üçün düşmən ölkəyə gedəcək. Məqsəd Avropa Birliyinin “Şərq Tərəfdaşlığı” Proqramı çərçivəsində reallaşdırılacaq tədbirə qatılmaqdır. “Evronest” çərçivəsində baş tutacaq komitə iclasında Cənubi Qafqazın Avropaya inteqrasiyası məsələsi müzakirə ediləcək. Bu barədə redaksiyamıza daxil olan məlumatı deputat Fərəc Quliyev təsdiqlədi.

O bildirdi ki, “Euronest”in sosial, mədəniyyət və təhsil komitələrinin iclasında iştirak dəvəti alıblar: “Azay Quliyev, Rövşən Rzayev və mənim bu iclasda iştirakım gözlənilir. Tədbirlərin fevralın 20-26-sı arası keçirilməsi gözlənilsə də, bizim bütün proqrama qatılmaq fikrimiz yoxdur. Biz Sərkisyanla görüşə, yaxud hansısa digər tədbirlərə qatılmaq istəmirik. Yalnız iki rəsmi iclasda iştirak etmək niyyətindəyik. Amma hələ ki iştirak qərarı da tam deyil. Çünki proqram və sənədlərlə bağlı Avropa Birliyinə müraciət etmişik. Həmçinin qətnamə layihəsini alandan sonra son qərarımızı verəcəyik”.
F.Quliyev Ermənistana səfərlərin bir qayda olaraq sərt etirazla qarşılanmasına da reaksiya verdi: “Burda məsələ fərqlidir. Bu, Ermənistanın yox, Avropa Birliyinin tədbiridir. Apreldə plenar iclas Bakıda olacaq. Bakıdakı tədbir də Azərbaycanın yox, AB-nindir”.
Qarabağ Azadlıq Təşkilatının sədri Akif Nağı isə dedi ki, Azərbaycandan kimsə o tədbirə qatılarsa, ölkənin milli maraqlarına zərbə vurmuş olacaq: “Ermənilər hesab edir ki, müharibənin birinci hissəsini başa vurublar, indi qələbəni möhkəmləndirmək lazımdır. Bunun üçün də belə səfərlərin sayını artırmaq lazımdır. Hər kəs bu prosesdə iştirak edirsə, Qarabağın Azərbaycandan uzaqlaşmasına xidmət edir”. A.Nağı deputatlara çağırış etdi: “Mən onlara müraciət edirəm ki, əgər Qarabağı sevirlərsə, bu səfərə getməsinlər, ermənilərin maraqlarına uyğun addım atmasınlar”.
Qeyd edək ki, Ermənistanın bu qurumdakı nümayəndə heyətinin üzvü, “Euronest” Siyasi Komitəsinin sədr müavini Naira Zöhrabyan bir müddət öncə Ermənistanın müstəqilliyinin 20-ci ildönümü ilə əlaqədar nümayəndə heyətinin “Euronest”in komissiyalarından birinin iclasının İrəvanda keçirilməsini təklif etdiyini, lakin Azərbaycanın bunu əngəllədiyini söyləmişdi.

ELŞAD

1383 dəfə baxılıb