MÜXALİFLƏR ƏSƏDİN GENERALINI ÖLDÜRDÜ

	22 may 2012


Onlayn ictimai-siyasi qəzet

Gündəm

MÜXALİFLƏR ƏSƏDİN GENERALINI ÖLDÜRDÜ

2012-02-12

Suriyada qan su yerinə axır, yerlə bir edilən Homs şəhərində humanitar fəlakət yaranıb

Suriyada təhlükəsizlik qüvvələrinin günlərdir mühasirədə olan Homs şəhərini ağır artilleriyadan və tanklardan atəşə tutaraq darmadağın etdiyi bir vaxtda müxaliflər Bəşər Əsəd rejiminin bir generalını vurublar. “Assoşeyted press” xəbər verir ki, Dəməşqdə üç silahlı şəxs evindən çıxarkən general İsse əl-Houliyə atəş açıb və onu öldürüb. Bildirilir ki, əl-Houli hərbi həkim olub və Dəməşqdə hərbi hospitalın rəisi imiş. Digər xəbərlərə görə, Dəməşqin şimal hissəsində Azad Suriya Ordusunun döyüşçüləri ilə Əsəd sadiq təhlükəsizlik qüvvələri arasında yeni döyüşlər olub. Bir neçə nəfərin həlak olduğu bildirilir.

Hələb şəhərində isə Suriya hərbi kəşfiyyatının qərargahı qarşısında törədilmiş partlayışda 30-dan çox adam ölüb, 150-yə yaxın adam yaralanıb. Bu hücuma görə məsuliyyəti Azad Suriya Ordusu üzərinə götürüb.
Günlərdir mühasirədə olan Homs şəhərində isə şiddətli küçə döyüşləri gedir. Ara verməyən artilleriya zərbələrinin ardınca Əsəd ordusunun tankları şəhərin yaşayış məhəllələrinə girib. Ötən gün onlarla adamın həlak olduğu xəbər verilirdi. Əhalisinin əksəriyyəti sünnilər olan Homs şəhərində artilleriya zərbələrindən yerlə bir olan binaların altında çoxlu insan cəsədinin olduğu bildirilir. “Amnesty İnternational” beynəlxalq hüquq müdafiə təşkilatı şəhərdə humanitar fəlakətin hökm sürdüyünü bəyan edib.
Rusiyanın BMT Təhlükəsizlik Şurasında Bəşər Əsədin hakimiyyətdən uzaqlaşdırılmasını nəzərdə tutan sənədə veto tətbiq etməsindən sonra Qərb ölkələri, Ərəb Dövlətləri Liqası və Türkiyə bu təşkilatdan kənarda Suriyaya dair koalisiya formalaşdırmaq üçün müzakirələr aparır. Türkiyədə mənzillənən Suriya Milli Şurasının rəhbərliyi Qətərə dəvət edilib və orada qapalı toplantı keçirilir. Ehtimal edilirdi ki, bu toplantıda suriyalı müxaliflərin silahlandırılması planları müzakirə ediləcək. Həmçinin Ərəb Liqasının Suriya Milli Şurasını legitim hakimiyyət kimi tanımağa hazırlaşdığı xəbər verilirdi.
Bu arada ABŞ administrasiyasındakı mənbələrdən məlum olub ki, Bəşər Əsədin ailə üzvləri və yaxın ətrafına daxil olan bəzi şəxslər Suriyadan qaçmağa hazırlaşır. ABŞ Dövlət Departamenti bildirir ki, Suriya rejiminin bəzi yüksək rütbəli təmsilçiləri öz ailə üzvlərini və pullarını xaricə apara bilmək üçün hətta müxaliflərdən kömək xahiş ediblər. Vaşinqtondakı mənbənin bildirdiyinə görə, bu günlərdə Əsədin qohumlarından biri olduqca böyük məbləğdə pulla ölkəni tərk edib. Birbaşa Əsədə tabe olan Suriya Təhlükəsizlik Xidmətinin rəhbərlərindən biri isə ölkədən qaçıb və xarici ölkələrdən birindəki dəbdəbəli imarətdə məskunlaşıb. Dövlət Departamentinin rəsmisi Viktoriya Nulandın bildirdiyinə görə, son günlər Əsədin yaxın ətrafının ailə üzvlərini və pullarını xilas etmək səylərinin artması müşahidə edilir. Bununla belə o, Əsəd rejimini tərk edənlərin adlarını açıqlamaqdan imtina edib.

Siyasət şöbəsi

1341 dəfə baxılıb