SƏHİYYƏ NAZİRİNDƏN ŞOK TƏYİNAT | Gündəm

	22 may 2012


Onlayn ictimai-siyasi qəzet

Gündəm

SƏHİYYƏ NAZİRİNDƏN ŞOK TƏYİNAT

2012-02-13

Korrupsiya ittihamı ilə qandallanan baş həkim azadlıqda
Oqtay Şirəliyev hələ də məhkumluğu qalan sabiq baş həkimi yeni məsul vəzifəyə təyin edib; 6 il 3 ay iş almış Könül Vəliyeva isə həbsini danır

Ötən ilin yayında Baş Prokuror yanında Korrupsiyaya Qarşı Mübarizə İdarəsinin əməkdaşlarının həbs etdiyi Narkoloji Dispanserin baş həkimi olmuş Könül Vəliyeva azadlıqdadır. Bu barədə “Yeni Müsavat”a məlumatlı mənbələrdən xəbər daxil olub. Mənbə deyir ki, istintaq dövründə K.Vəliyevanın əməlləri tam sübuta yetirilib və Bakı Ağır Cinayətlər Məhkəməsinin hökmü ilə Cinayət Məcəlləsinin 308-ci (vəzifə səlahiyyətindən sui-istifadə etmə) və 311-ci (rüşvət alma) maddələrinə əsasən ittiham olunaraq, 6 il 3 ay müddətinə azadlıqdan məhrum edilib. Sonradan Apelyasiya Məhkəməsində onun şikayətinə baxılıb və barəsindəki məhkəmə hökmü dəyişdirilib. Cinayət Məcəlləsinin 70-ci maddəsi tətbiq edilməklə, Könül Vəliyeva 3 il şərti olaraq azadlıqdan məhrum edilib və məhkəmə zalından azadlığa buraxılıb. Ancaq məsələ bununla bitməyib.

Ötən ilin yayında Baş Prokuror yanında Korrupsiyaya Qarşı Mübarizə İdarəsinin əməkdaşlarının həbs etdiyi Narkoloji Dispanserin baş həkimi olmuş Könül Vəliyeva azadlıqdadır. Bu barədə “Yeni Müsavat”a məlumatlı mənbələrdən xəbər daxil olub.
Azadlığa çıxan K.Vəliyeva səhiyyə naziri Oqtay Şirəliyevin əmri ilə yeni məsul vəzifəyə təyinat alıb - Narkoloji Dispanserdə baş həkimin müavini təyin edilib. Ancaq qanunvericilik məhkumluğu olan şəxsin məsul vəzifəyə təyin edilməsini yasaq edir.
Ən maraqlısı da odur ki, K.Vəliyeva nəinki məhkumluğunu, hətta həbs edilməsini də danır. O “gundelik-baku.com” saytına bildirib ki, dispanserdə sadəcə olaraq, struktur dəyişikliyi olub: “Bura indi mərkəzə çevrilib. Təzə direktor təyin olunub. Mən də indi müalicə işləri üzrə müavinəm”. Ona qarşı cinayət işinin açılması barədə suala gəldikdə isə, “heç bir şey olmayıb, sizi nə maraqlandırırsa, Səhiyyə Nazirliyindən məlumat alın”,- deyə cavab verib. Bir daha xatırladaq ki, K.Vəliyevanın həbs olunması ilə bağlı xəbər Baş Prokuror yanında Korrupsiyaya Qarşı Mübarizə İdarəsinin 2011-ci ilin iyunun 7-də yaydığı rəsmi açıqlamasında bildirilirdi.

Məlumatın mətnini bir daha oxuculara xatırladaq: “Respublika Narkoloji Dispanserinin həkimi Elgiz Mustafazadənin Baş Prokuror yanında Korrupsiayaya Qarşı Mübarizə İdarəsinin ”161" nömrəli “Qaynar xətt” əlaqə mərkəzinə daxil olmuş müraciəti əsasında toplanmış material üzrə Azərbaycan Respublikası Cinayət Məcəlləsinin 308.1-ci (vəzifə səlahiyyətlərindən sui-istifadə) maddəsi ilə 5 may 2011-ci il tarixdə cinayət işi başlanıb.
İstintaqla müəyyən edilib ki, 2006-2011-ci illərdə Narkoloji Dispanserin baş həkimi Könül Vəliyeva həkim Rumziyyə Maçanovanın vasitəsilə qanunsuz olaraq hər ay dispanserin həkimlərindən 150-200 manat məbləğində pul tələb edərək alıb, həmin məbləği verməyən həkimləri isə işdən azad etməklə hədələyib. Bundan başqa, K.Vəliyeva xəstələrə pulsuz verilməli olan dərman preparatlarının xəstələrə verilməsini təmin etməyib və sair qanunsuzluqlara yol verib. Hazırda Baş Prokuror yanında Korrupsiayaya Qarşı Mübarizə İdarəsində iş üzrə intensiv istintaq tədbirləri davam etdirilir".
İstintaqın getdiyi müddətdə “Yeni Müsavat”a verilən məlumata görə, K.Vəliyeva kollektivə bildirmişdi ki, “yuxarıların hesabını verdim, işimdə qalacam və görün sizin başınıza nə oyun açacam” (“Yeni Müsavat”, 10 iyun 2011-ci il). Görünür, həqiqətən də yuxarıların hesabı verilib, özü də çox “yuxarı səviyyədə”. Əks halda məhkumluğu olan bir şəxs nazirin əmri ilə məsul vəzifəyə təyinat almazdı. Deyəsən, korrupsionerlər hüquq-mühafizə orqanlarından və səhiyyə nazirindən daha prinsipaldırlar. Necə deyərlər, puluna minnət.
Bu olay bir daha göstərir ki, ötən ilin yanvarında korrupsiyaya qarşı mübarizə adı altında Azərbaycanda başladılan proses kampaniya xarakterlidir. Hələ ilk gündən mətbuat, siyasi ekspertlər və müxalifət yetkililəri bunun kampaniya və siyasi şou olduğunu israrla vurğulayırdı. Ən əsası ona görə ki, korrupsiya ittihamı ilə həbs olunanlar içində bir nəfər də olsun yüksək vəzifəli məmur yox idi. Hətta orta ranqlı məmurlara belə toxunulmadan ölkədə korrupsiya əleyhinə proses başlatmaq kənardan çox qeyri-ciddi görünürdü. İndi belə çıxır ki, bir neçə ay öncə korrupsiya ittihamı ilə qandallanmış baş həkim nəinki azadlığa buraxılır, üstəlik vəzifəyə təyinat alır.

İqtisadiyyat şöbəsi

14907 dəfə baxılıb