ƏLİ HƏSƏNOV İRANIN İTTİHAMLARINA CAVAB VERDİ

	22 may 2012


Onlayn ictimai-siyasi qəzet

Gündəm

ƏLİ HƏSƏNOV İRANIN İTTİHAMLARINA CAVAB VERDİ

2012-02-21

“Azərbaycan özünün xarici əlaqələrindən İrana qarşı heç zaman istifadə etməyib”

İrandan Azərbaycan hökumətinə qarşı növbəti ittihamı gəlib. İran mətbuatı yazıb ki, rəsmi Bakı Cavidan adlı İsrail agentinə sığınacaq verib. Bu barədə “Qafqazinfo” saytı İranın “Fars Nyus” agentliyinə istinad edərək xəbər yayıb. Xəbərdə deyilir ki, bu şəxs bir neçə İran nüvə aliminin, xüsusilə də Məsud Əli Məhəmmədi və Mustafa Əhmədi Roşanın ölümündə iştirak edən yəhudidir.

Xatırladaq ki, bir qədər əvvəl Tehran rəsmi Bakını İrana qarşı düşmən münasibətdə günahlandırmışdı. O vaxt Azərbaycanın Tehrandakı səfiri Cavanşir Axundov İran XİN-ə çağırılaraq ona nota təqdim edilmişdi.
Ötən gün isə Prezident Administrasiyası ictimai-siyasi şöbəsinin müdiri Əli Həsənov Azərbaycan-İran münasibətləri ilə bağlı APA-ya açıqlama verib. Ə.Həsənov Azərbaycanın İranla xarici münasibətlərinin mehriban qonşuluq, qarşılıqlı faydalı əməkdaşlıq üzərində qurulduğunu bildirib. Deyib ki, son zamanlar Azərbaycan Milli Təhlükəsizlik Nazirliyi bu ölkəyə bağlı müəyyən çevrələr tərəfindən Azərbaycanda həyata keçirilməsi planlaşdırılan bəzi arzuolunmaz, o cümlədən terror cəhdlərinin qarşısının alınması istiqamətində müvəffəqiyyətli əməliyyat həyata keçirməsi İranda narahatlıq yaradıb: “İranın bəzi dairələri əsası olmayan şəkildə məhz buna cavab olaraq ”alternativ tədbir" kimi Azərbaycana qarşı, onu bu və ya digər fəaliyyətdə ittiham edən, günahlandıran nota verib. Bu, bizim arzu etdiyimiz hal deyil".
Şöbə müdiri bildirib ki, Azərbaycan özünün xarici əlaqələrindən İrana qarşı, eləcə də digər qonşu dövlətlərə qarşı heç zaman istifadə etməyib, istifadə edilməsinə də imkan verməyib: “Ona görə də bu şəkildə günahlandırmaların əsası yoxdur”.
O, iki ölkə arasında gərginliyin olması barədə fikirlərlə də razılaşmayıb: “Deməzdim ki, iki ölkə arasında vəziyyət gərgindir. Lakin münasibətləri gərginləşdirməyə cəhd göstərən insanlar, dairələr var. Bu isə nə İranın, nə də Azərbaycanın xeyrinədir. Azərbaycan həmişə bütün tədbirlərdə İranın maraqlarını nəzərə alıb, bundan sonra da almaq fikrindədir. İran bizimlə müştərək tarixi, dini bölüşən, on milyonlarla soydaşımızın ölkədir. Bu ölkənin maraqları bizim həmişə diqqətimiz mərkəzində olub və bu maraqların pozulmasına, heç bir anti-İran fəaliyyətinə yer verməmişik. Eyni şeyləri İrandan da tələb edirik və düşünürük ki, bu, belə də olacaq”.

KƏNAN

1130 dəfə baxılıb