NOVRUZ MƏMMƏDOV TÜRKİYƏLİ JURNALİSTƏ SİRR AÇDI

	22 may 2012


Onlayn ictimai-siyasi qəzet

Gündəm

NOVRUZ MƏMMƏDOV TÜRKİYƏLİ JURNALİSTƏ SİRR AÇDI

2012-02-21

Prezident Administrasiyasının şöbə müdiri Azərbaycanın Türkiyəyə satdığı qazın məxfi saxlanılan qiymətini açıqlayıb-min kubmetri 330 dollar

Azərbaycan Prezidenti Administrasiyasının xarici əlaqələr şöbəsinin rəhbəri Novruz Məmmədov Türkiyəyə satılan qazın indiyədək kommersiya sirri kimi məxfi saxlanılan qiymətini açıb. O, Türkiyənin “Hürriyət” qəzetinin əməkdaşı ilə söhbətində deyib ki, hazırda Azərbaycan Türkiyəyə ən ucuz qaz satan ölkədir. Belə ki, qazı min kubmetrini 330 dollardan satır.

Xatırladaq ki, son günlər Türkiyənin Azərbaycan və digər ölkələrdən aldığı qazın qiymətini aşağı salmaq üçün danışıqlar apardığı məlumdur. Rusiyanın “Qazprom” şirkəti qiymətləri aşağı salmağa razı olub, ancaq İran və Azərbaycan endirimə getməyib. Bu da Türkiyə iqtidarına bağlı mediada Azərbaycan hakimiyyətinə qarşı tənqidlərə səbəb olmuşdu. Azərbaycan Prezidenti yanında Strateji Araşdırmalar Mərkəzinin Bakıya dəvət etdiyi “Hürriyət” əməkdaşı N.Məmmədovla görüşdə bu məsələni də qaldırıb. Azərbaycanın nədən Türkiyəyə satdığı qazın qiymətini endirmədiyini soruşub. Və jurnalist yazır ki, N.Məmmədovdan gözləmədiyi dərəcədə konkret cavablar alıb.
N.Məmmədov deyib ki, hazırda Türkiyə Azərbaycandan qazın min kubmetrini 330 dollardan alır. Bu da Türkiyənin aldığı ən ucuz qazdır. “Bu yaxınlara qədər qiymət 120 dollar idi. Dünya bazarlarında qiymətlərin artmasına baxmayaraq biz bunu uzun müddət artırmadıq. Ancaq belə qiymət uzun müddət davam edə bilməzdi. Ona görə də qarşılıqlı razılaşma əsasında qiymətlərə yenidən baxıldı” deyə, şöbə müdiri bildirib. O əlavə edib ki, buna baxmayaraq Azərbaycan yenə də Türkiyəyə ən ucuz qaz satan ölkədir. Rusiyadan alınan qazın min kubmetri 450 dollara başa gəlsə də Azərbaycan qiyməti 330 dollar səviyyəsində saxlayır. “Görürük ki, ”Rusiya qaza endirim etdi, azərilər isə əksinə bahalaşdırdı" deyə, yanlış şərhlər verilir. Rusiya qiyməti 500 dollardan 450-yə endirib, Azərbaycan isə 330-a satır. Türkiyə baha sat desə də biz qiyməti qaldırmarıq" deyə, N.Məmmədov bildirib.
Türkiyəli jurnalist daha sonra enerji sahəsinə məsul olan məmurlarla söhbətinə əsasən yazır ki, Azərbaycan ixrac qazını Rusiyaya yönəltmir və bu ölkəyə ən çoxu ildə 5 milyard kubmetr qaz satacaq. Türkiyəyə isə ildə 7 milyard kubmetr qaz verilir, Transanadolu qaz kəməri layihəsi işə düşsə bu həcm 14 milyard kubmetrə qədər artacaq. “Hürriyət” əməkdaşı Bakıda “Nabucco” qaz kəməri layihəsi ilə bağlı fikirlərin optimist olmadığını yazır. Ona bildiriblər ki, Azərbaycan heç vaxt bu kəmərlə qaz nəql edəcəyinə dair təminat verməyib. Bakıdakı rəsmilər deyiblər ki, “Nabucco” layihəsi üçün qaz mənbəyi tapılmadan onu reallaşdırmaq istəyirlər. Bu da baş tutmur.

F.MƏMMƏDOV

1673 dəfə baxılıb