AMERİKALI HƏRBÇİLƏR QURANI YANDIRIB | Gündəm

	22 may 2012


Onlayn ictimai-siyasi qəzet

Gündəm

AMERİKALI HƏRBÇİLƏR QURANI YANDIRIB

2012-02-21

General müsəlmanlardan üzr istəyir

”The Associated Press” agentliyinin yaydığı xəbərə görə, ABŞ-ın Əfqanıstandakı hərbi kontingentinin komandanı Con Allen Quranın yandırılması ilə bağlı üzr istəyib. General bildirib ki, insidentin araşdırılmasına göstəriş verib, hazırda araşdırmalar aparılır: ”Biz Quranın və digər müqəddəs mətinlərin yandırılmasından xəbər tutan kimi, bu prosesi durdurduq”.

Gələn xəbərlərə görə, amerikalı əsgərlərin növbəti vandal hərəkətindən az sonra Bahrəm hava bazasında irimiqyaslı nümayiş keçirilib. ”Yabançılara ölüm” şüarları səslənən mitinqdə 2 mindən artıq əfqan iştirak edib.
Əfqan ordusunun generalı Əbdül Cəlil Rəhimi deyib ki, mitinqçilər son dərəcə acıqlıdırlar və onlar bazanın qarşısını tərk etmək istəmirlər.
Zia-Ul Rahman, əyalətin polis şefinin müavini deyib ki, mitinqçilər havaya atəş açıb, yanğın törətsələr də insan tələfatı qeydə alınmayıb.
Mitinqçilər vurğulayıblar ki, bu düşüncə ilə amerikalılar Əfqanıstana sülh və əmin- amanlıq gətirə bilməzlər.

General Allen Əfqanıstan prezidentindən, hökumətdən və xalqdan bir daha üzr istədiyini vurğulayıb.
Xatırladaq ki, ABŞ-da ötən il Quran nümayişkaranə şəkildə yandırıldıqdan sonra, Əfqanıstanda bu kimi mitinqlər keçirildi. Kütləvi tədbirlərdə ölən və yaralananlar oldu.
Əminliklə demək olar ki, bu hadisə də ABŞ-ın müsəlman dünyasında olan-qalan nüfuzuna da ciddi zərbə olacaq. Demokratiyaya düşmən olan şərqin bir sıra müstəbid rejimləri bu faktdan təbliğatda geninə-boluna istifadə edəcəklər...