28.09.2012 [9:59]

Gündəm

GÜLƏR ƏHMƏDOVANIN TALEYİNƏ QƏRAR VERİLDİ

“Video qalmaqalı YAP-da sevinclə qarşılanıb”
Deputatın cəzalandırılması ilə bağlı siyasi fətva verilib; cəzanın forması isə onun sonrakı davranışlarından asılı olacaq; hakim partiya Siyasi Şura üzvünə oliqarxiyanın maraqlarının təmsilçisi kimi yanaşdığı üçün son olaylardan məmnundur

Tweet

32032 dəfə baxılıb

YAP Siyasi Şurasının üzvü, deputat Gülər Əhmədovanın məlum video qalmaqalı hakimiyyət daxilində ciddi təbəddülat yaradıb. Cəmiyyətin və müxalifətin ağır qınaqlarını alan hadisəyə hələlik rəsmilərdən yalnız iqtidar sözçüsü Əli Həsənov münasibət bildirib. Eyni zamanda baş prokurorun da göstərişi ilə prokurorluq prosedur qaydasında araşdırmalara başlayıb. Bu biabırçı hadisəyə artıq xarici mətbuat da yer ayırıb.

Məlum videoya deputatın özü və ondan maaş alanlar “montaj” deyirlər. Lakin bu izahatı videoya baxan hər kəs gülüşlə qarşılayır və heç kim bu versiyaya dəstək vermir. Prezident Administrasiyasının şöbə müdiri Əli Həsənovun bu xüsusdakı açıqlaması isə xüsusi əhəmiyyət kəsb edir. Təcrübəli texnoloq olan Əli Həsənov öz açıqlaması ilə videogörüntüləri əslində təsdiqlədi və Gülər Əhmədovanın onsuz da ümidsiz olan arqumentini bitirdi. İqtidar sözçüsü deyir ki, videoda millət vəkili olmaq istədiyini deyən şəxs məqsədinə çatmayıb: “Video göstərdi ki, millət vəkili olmaq üçün rüşvət təklif olunub, amma keçməyib” (BBC). Bu ifadələr hakimiyyətin videonun gerçək olmasını qəbul etməsinin birbaşa təsdiqidir.
Qəzetimizin redaksiyasına hakimiyyət düşərgəsinə yaxın mötəbər qaynaqlardan çatan bilgilərdən aydın olur ki, G.Əhmədovanın bu məsələdən itkisiz çıxması üçün heç bir şansı yoxdur və onun məsələsinin bitdiyi birmənalıdır. Mənbənin bildirdiyinə görə, qalmaqal YAP rəhbərliyində və Prezident Administrasiyasında çox gərgin müzakirələrə səbəb olub. Bu müzakirələrdə G.Əhmədova ilə bağlı rüsvayçı qalmaqalın “seçki ərəfəsində ölkəni qarışdırmaq istəyən xarici qüvvələrin əlinə fürsət verə biləcəyi” vurğulanıb. Xüsusilə burada söhbət seçkili orqana keçmək üçün rüşvət amilinin təsdiqini tapmasından getdiyi üçün iqtidar bütün ittiham və qınaq yüklərini özündən aralamaq məcburiyyətindədir.
Enində-sonunda G.Əhmədova bir adamdır. Videorolikdə də yalnız iki fraqment istisna olmaqla (“deputat olmaq istəyən çoxdur, seçici isə yalnız bir nəfərdir” və “mən prezidentdən keçən siyahını dəyişdirən adamam” ifadələri) o, hər şeyi öz üzərinə götürür, kənar ad çəkiləndə təpki verir. Bu baxımdan G.Əhmədovanı siyasi səhnədən silməkdən başqa yol qalmadığı hər kəsə aydındır.
İndi gələn məlumatlar göstərir ki, hakimiyyət də ilkin olaraq belə bir qərar verib. Lakin bunun hansı müddətə həll ediləcəyi məsələsi hələlik açıq qalır. Tamamilə mümkündür ki, deputatın üzərindən toxunulmazlıq götürülsün və onunla bağlı araşdırmalar ən qısa zamanda başlasın. Mənbələrimizin məlumatına görə, müxalifətin, cəmiyyətin və Qərbin təzyiqlərinin güclü olacağı təqdirdə G.Əhmədovanın həbsi də qaçılmazdır.
Təhlillər göstərir ki, bu qalmaqal hakimiyyətdaxili qruplaşmaların da əlinə yaxşı fürsət verib və indi rəqib qruplaşmalar bu qalmaqaldan öz xeyrinə maksimum istifadə etmək üçün əllərindən gələni edəcək.
YAP dəhlizlərində isə G.Əhmədova ilə bağlı qalmaqal sevinclə qarşılanıb. “Yeri gəldi-gəlmədi hər işə müdaxilə edən, hansı qrupa xidmət etdiyi də bəlli olmayan deputat barədə kompromat çarxının yayımlanmasından partiyadaşları məmnun olublar” - bu barədə “Yeni Müsavat”a YAP rəhbərliyinə daxil olan şəxslərdən biri məlumat verib.
Qaynağın bilgisinə görə, G.Əhmədova özünü son vaxtlar YAP-ın “patronitsası” kimi aparırmış. Bu da partiya rəhbərliyində ciddi narazılıq yaradıbmış. Elə buna görə də uzun müddət YAP rəhbərliyi ilə G.Əhmədova arasında “əsəb müharibəsi” gedib. Bəlkə də elə bu səbəbdən videoçarx yayılandan sonra partiya rəhbərliyi neytral mövqe tutmağa çalışıb, hətta çarx yayılan gün, yəni sentyabrın 26-da günün birinci yarısında YAP icra katibinin müavini Siyavuş Novruzov “bu, iki nəfər arasında olan mübahisədir, bunu özləri məhkəmədə araşdırmalıdır” deyərək mövzudan qaçmağa çalışıb. Bu, həm də YAP rəhbərliyinin ümumi mövqeyi idi.
Ancaq günün ikinci yarısında Prezident Administrasiyasında məsələ müzakirə edilib və deputatın cəzalandırılması qərara alınıb. Bu qərar da YAP-da bəzi qruplar tərəfindən sevinclə qarşılanıb və dərhal məsələnin araşdırmalı olduğu barədə açıqlamalarla çıxış etməyə başlayıblar. Bunun ardınca da deputatın istefa məsələsi dövriyyəyə buraxıldı; özü də G.Əhmədovanın partiyadaşı, YAP-çı deputat Məlahət İbrahimqızının dilindən: “Dünyanın istənilən ölkəsində baş verməsindən asılı olmayaraq bu hal sübuta yetirilsə, həmin məmur və ya həmin siyasətçi o dəqiqə istefa verməlidir. Hesab edirəm ki, istefa verməklə də onlar öz günahını yüngülləşdirmiş olur”.
Fərqli qaynaqların hər birinin bilgisindəki ortaq məqam budur ki, G.Əhmədovanın məsələsini artıq qapanmış saymaq olar. Onlardan biri isə müxbirimizə belə söyləyib: “Onun cəzalandırılması ilə bağlı siyasi qərar artıq verilib. Ayın 26-da hakimiyyətin üst qatında bu məsələ müzakirə edilib və birmənalı mövqe bundan ibarət olub ki, bu adam mütləq cəzalanmalıdır. Cəzanın forması isə deputatın sonrakı davranışlarından asılı olacaq. Əgər Əhmədova bütün məsuliyyəti öz boynuna götürsə və könüllü şəkildə istefa ərizəsi yazsa, sərbəst buraxılacaq. Məlahət İbrahimqızı da açıqlaması ilə bunu həmkarının diqqətinə çatdırıb. Bu cür olsa, cinayət məsuliyyətinə cəlb edilməyəcək; əks halda isə prokurorluğun araşdırmaları onu həbsxanaya da apara bilər. Böyük ehtimalla Milli Məclisin payız sessiyasının ilk iclaslarında onun haqqında cinayət işinin açılması müzakirəyə çıxarılacaq. Deputatın cinayət məsuliyyətinə cəlb edilməsi ilə bağlı presedentlər isə artıq var. 2003-cü ildə İqbal Ağazadə, 2007-ci ildə isə Hüseyn Abdullayev eyni aqibəti yaşayıblar. Gülər Əhmədova isə haqqında cinayət işi açılan ilk xanım deputat kimi tarixə düşə bilər”.
Mənbənin iddiasına görə, hakimiyyətin üst qatını ən çox qıcıqlandıran “mən gedib camaatın prezidentdən keçən siyahısını pozdurmuşam” ifadəsidir: “Siyasi hakimiyyət bazar söhbətlərində belə məsuliyyətsiz ifadələrin işlədilməsini həzm edə bilmir. Bu, siyasi hakimiyyətin fəlsəfəsinə və yazılmamış qanunlarına ziddir. Eyni zamanda beynəlxalq təşkilatların bu videoçarxı siyasi hakimiyyətin əleyhinə yönəldəcəyi də siyasi hakimiyyəti narahat edir. Çünki hakimiyyət iddia edir ki, ölkədə korrupsiyaya qarşı mübarizə gedir, seçkilər şəffaf, azad və ədalətli aparılır. Ancaq parlamentin özünün bu cür korrupsiya yolu ilə formalaşdırılması barədə çarx gündəmi zəbt edib. Ona görə də Gülər Əhmədovanın bağışlanması sadəcə mümkün deyil”.
Adının çəkilməsini istəməyən siyasi ekspert YAP rəhbərliyi ilə G.Əhmədova arasındakı mövcud soyuqluğu və təşkilatın ona sahib çıxmamasını bu cür izah edir: “YAP rəhbərliyi belə hesab edir ki, siyasi danışıqların aparılması səlahiyyəti ancaq hakim partiyaya məxsus olmalıdır. Ancaq çarx qalmaqalı göstərdi ki, hakim partiya rəhbərliyi bu danışıqlardan tam kənardır. Bu, ictimaiyyətə bəlli olan yalnız bir detaldır. Başqa dairələr üzrə “deputat seçilmək” danışıqlarını YAP rəhbərliyi yox, oliqarxların və hakimiyyətdaxili güc mərkəzlərinin “səlahiyyətli nümayəndələri” aparır. Səlahiyyətli nümayəndə Gülər Əhmədova kimi deputat da ola bilər, Sevinc Babayeva kimi adi kitabxana müdiri də. Düzdür, Gülər Əhmədova da YAP Siyasi Şurasının üzvüdür. Ancaq o, danışıqları YAP-ın mandatı ilə aparmayıb. Həm də YAP Siyasi Şurasının 89 üzvü var və onların partiya adından belə danışıqlar aparmaq səlahiyyəti yoxdur. Gülər Əhmədova sadəcə təmsil olduğu güc mərkəzinin resurslarından faydalanmaqla, partiyada muxtar status əldə edib. Bu da təbii ki, YAP rəhbərliyinin narazılığına səbəb olub. Əhmədovanın hərəkətləri YAP-ın siyasi sistemdən kənarlaşmasının yalnız bir detalıdır. Oliqarxiya YAP-ın bütün səlahiyyətlərini mənimsəyib. Ona görə də YAP Əhmədovaya oliqarxiyanın maraqlarının təmsilçisi kimi yanaşırdı və onunla bağlı qalmaqalı sevinclə qarşılayıb”.
Məsələdə maraqlı cəhətlərdən biri də ABU rektoru Elşad Abdullayevdən alınan 500 min dolların taleyidir. Hadisələrin nəticəsi olaraq demək mümkündür ki, G.Əhmədova həmin pulu heç yerə çatdırmayıb. Lakin məbləğ Elşad Abdullayevə də qaytarılmayıb. Bu, o dərəcədə ciddi cinayət əməlidir ki...
Artıq hakimiyyətdəki bəzi əks qruplar Türkiyə mətbuatına G.Əhmədovanın neçə il iş ala biləcəyi məlumatını da ötürüblər. Qardaş ölkənin ciddi media quruluşlarından olan “Vatan” qəzeti yazıb ki, azərbaycanlı deputatı 8 ildən 12 ilə qədər həbs gözləyir...

Əli İBRAHİMLİ, Tofiq ƏHMƏDLİ