ZƏLZƏLƏ KƏRPİC EVLƏRİ TORPAĞA BATIRDI

	13 fevral 2012


Onlayn ictimai-siyasi qəzet

Gündəm

ZƏLZƏLƏ KƏRPİC EVLƏRİ TORPAĞA BATIRDI

2010-03-10

Elazığ bölgəsində baş verən təbii fəlakət nəticəsində onlarla adam ölüb

2010-cu ilin zəlzələlər ili ola biləcəyi barədə bir sıra alimlərin proqnozları özünü doğrultmaqdadır. Haiti və Çilidə baş verən dəhşətli zəlzələlərdən sonra bu dəfə dünyanın ən seysmik aktiv zonalarından birində yerləşən Türkiyə təbii fəlakətlə üz-üzə qalıb. Xəbərlərə görə, martın 7-dən 8-nə keçən gecə ölkənin ucqar Elaziğ bölgəsində Rixter şkalası ilə 6 ballıq zəlzələ baş verib. Zəlzələnin gücü orta şiddətli sayılsa da bölgədə 8 ballıq zəlzələ qədər dağıntı törədib və onlarla adamın ölümünə səbəb olub. Belə ki, Elazığ bölgəsinin evləri çiy kərpicdən ibarət 5 kəndi bütünlüklə dağılıb.

Dağıntının artmasına evlərin zəlzələyə qarşı qətiyyən davamlı olmaması ilə yanaşı, təkanların Yerin üst qatlarında-cəmi 5 kilometr dərinlikdə baş verməsi və 1 dəqiqəyə yaxın fasiləsiz davam etməsi səbəb olub. Tələfat isə ona görə çox olub ki, təkanlar insanları yuxuda haqlayıb. Son məlumatlara görə, ölənlərin sayı 60-a yaxındır, 74 nəfər yaralanıb. Birinci zəlzələdən sonra bölgədə 1000-dən çox “afterşoklar” yaşanıb. Bildirilir ki, təkanlar Türkiyənin daha dörd bölgəsində - Hatay, Adana, Bursa və Kütahyada qeydə alınıb. Təbii fəlakətdən sonra bölgəyə xilasedicilər, ordu bölmələri, təcili yardım briqadaları və humanitar yardımlar göndərilib. Sakinlər gecəni soyuq havada çöldə keçiriblər, onlara çadırların paylanılmasına başlanıb.
Baş nazir Rəcəb Tayyib Ərdoğan bildirib ki, zəlzələ zamanı evləri dağılmış insanlar üçün yeni evlər tikilməsinə dair təlimat verib. O, hadisə yerində xilasetmə işlərinin davam etdiyini, Qızıl Aypara Cəmiyyətinin artıq yardım göstərdiyini deyib: “Qızıl Aypara Cəmiyyəti 230 çadır, 20 quraşdırılma ev, 2 səyyar mətbəxi ilə hadisə yerində yardımlarını göstərir, çoxlu sayda ambulans hadisə yerindədir. Hökumətimizdən üç nazir millət vəkilləri ilə birgə əraziyə ezam olunublar. Kərpic evlərin bədəli ağır olub. Bir əsrdir zəlzələ görməyən bir ərazidə oldu zəlzələ. Bölgədə çalışmalar davam edir”. Baş nazirin müavini Cəmil Çiçək Elazığa gəlib, zəlzələ dağıntıları olan ərazidə jurnalistlərə açıqlama verib. O, 57 nəfərin öldüyünü, 50-dən artıq insanın yaralandığını deyib. “Hökumət olaraq hər şeyi qarşılamağa hazırıq” deyən hökumət rəsmisi bildirib ki, insanların itkilərini maddi şəkildə ödəmək, fəsadları aradan qaldırmaq üçün Türkiyənin imkanı var. Prezident Abdulla Gülün də təbii fəlakət bölgəsinə baş çəkəcəyi gözlənilirdi.

F.MƏMMƏDOV

2423 dəfə baxılıb