ERMƏNİ DİASPORU BAKIDA ŞİRKƏT ALIR | Gündəm

	12 fevral 2012


Onlayn ictimai-siyasi qəzet

Gündəm

ERMƏNİ DİASPORU BAKIDA ŞİRKƏT ALIR

2010-03-10

Fransanın ermənimeylli “AXA” maliyyə qrupu “MBASK” sığorta şirkətini “udur”

Fransanın və dünyanın ən böyük sığorta şirkəti olan “AXA” Azərbaycandakı “MBASK” sığorta şirkətini alır. Bu barədə məlumat verən mötəbər mənbənin sözlərinə görə, artıq bu istiqamətdə danışıqlar başa çatıb.

Sözsüz ki, hər hansı böyük şirkətin Azərbaycanla əlaqə yaratması normal haldır. Amma “AXA” ermənimeylli şirkət kimi tanınır. Bu qurum Fransadakı erməni diasporunun tam nəzarəti altındadır və uydurma “erməni soyqırımı”nın bu ölkədə qəbul olunmasında böyük rol oynayıb. Hətta İTAR-TASS agentliyinin martın 5-də yaydığı məlumata görə, “AXA” qondarma “soyqırım” qurbanlarının varislərinə kompensasiya ödəməyə başlayıb. Şirkət buna görə ermənilərə 17, 5 milyon dollar ödəmək niyyətindədir.
İndiyədək 14 min “varis” “AXA”-ya sorğu göndərib. Onlardan hələlik 1000 nəfəri tanınıb. Şirkət hər bir “varis”ə 8 min dollar ödəyir. Məsələ bundadır ki, kompensasiya verməklə presedent yaradan “AXA” indi də Azərbaycanın pullarından yararlanmaq niyyətindədir.
“AXA”-nın Azərbaycan sığorta şirkətlərindən birini alacağı haqda məlumatı hələ ötən il “AzərTAc” dövlət xəbər agentliyi yaymışdı. Məlumatda bildirilirdi: “AXA” şirkətinin sığorta xidmətləri göstərilməsi üzrə ixtisaslaşmış Türkiyə bölməsi bəyan edir ki, regionda öz fəaliyyətini genişləndirmək istəyinə görə gələn il Azərbaycanda sığorta şirkəti ala bilər. “AXA” şirkətinin nümayəndəsi Camal Ererdi “Reuters” agentliyinə bildirib ki, Fransanın bu ən iri sığorta şirkəti Türkiyə bazarında da sığorta qurumları əldə etmək imkanlarını nəzərdən keçirir. C.Ererdi deyib: “Biz Azərbaycanda şirkət almağa maraq göstəririk və bu istiqamətdə işi davam etdiririk. Çox güman ki, 2010-cu ildə niyyətimizi həyata keçirəcəyik”. “AXA”-nın əldə etmək istədiyi şirkət barədə müfəssəl məlumat verilmir".
Artıq bu şirkətin Azərbaycanın “MBASK” sığorta şirkəti olduğu bəlli olub. Qeyd edək ki, məlumatı dəqiqləşdirmək üçün “MBASK” şirkəti ilə əlaqə saxlasaq da suallarımızı cavablandırmağa məsul olan şəxsin işdə olmadığını söylədilər: “Biz heç bir məlumat verə bilmərik. Mətbuata məsul olan şəxs isə bu gün işdə olmayacaq, sonra zəng vurun”.
Mövzunu davam etdirəcəyik.

Aynur ELGÜNƏŞ

3262 dəfə baxılıb