İSTEFADAKI GENERALLAR NİYƏ ORDUYA QAYTARILIB

	12 fevral 2012


Onlayn ictimai-siyasi qəzet

Gündəm

İSTEFADAKI GENERALLAR NİYƏ ORDUYA QAYTARILIB?

2010-03-10

Ələkbər Məmmədov: “Əbiyevin kadr islahatları görüntü xarakteri daşıyır”

Xəbər verildiyi kimi, Azərbaycan Silahlı Qüvvələrinin istefaya göndərilən bir qrup yüksək rütbəli zabiti - general-mayor Dadaş Rzayev, general-mayor Aleksandr Vasyak, general-mayor Məmməd Sarıyev və polkovnik Həsən Əmirov yenidən Müdafiə Nazirliyi Hərbi Elm Mərkəzinə müxtəlif vəzifələrə təyin olunublar. Bu barədə məlumat “MilAz” İA-ya hərbi mənbələrdən daxil olub.

Xatırladaq ki, onlar 2009-cu ilin sonlarında Hərbi Elm Mərkəzində aparılan struktur dəyişiklikləri ilə əlaqədar 30-a yaxın yüksək rütbəli hərbi qulluqçu ilə birgə vəzifələrindən çıxarılmışdılar. Müdafiə Nazirliyindən isə məsələyə hər hansı münasibət öyrənmək mümkün olmadı.
Qeyd edək ki, generalların ordu sıralarına qaytarılması Dağlıq Qarabağda müharibənin yenidən başlayacağı barədə məlumatların çoxalması, Azərbaycan rəhbərliyinin müharibə bəyanatlarının davamlı şəkildə yayılması, Ermənistanda müharibə ilə bağlı narahatçılıqların artması fonunda baş verməsi də diqqəti çəkir.
Amma “Silahlı Qüvvələrə Demokratik Vətəndaş Nəzarəti” Azərbaycan Mərkəzinin direktoru Ələkbər Məmmədov bu fikirlərlə razılaşmır. O, Səfər Əbiyevin nazir postuna təyin olunduğu zamandan kadr siyasəti adı altında keçmiş yüksək və aşağı rütbəli zabitləri ordudan tərxis etməklə öz adamlarından ibarət komanda formalaşdırmağa başladığını xatırlatdı və bildirdi ki, orduda ixtisara salınan zabitlər də həmin qrupa aid olublar: “Sonradan Əbiyev kiminsə təsiri altına düşməməsi üçün onları çağırıb mülki işlə təmin etmişdi. Onlar hərbi təqaüdlə yanaşı, maaş da alırdılar. Bəziləri müdafiə nazirinin fəaliyyətinə tərif gətirmək və baş vermiş hadisələri ört-basdır edib bəraət qazandırılması istiqamətdə fəaliyyət göstərirdi. Nazir də onlara şərait yaratmış, xidməti maşın da vermişdi. Onların fəaliyyəti milli maraqlara yox, müdafiə nazirinin maraqlarına xidmət edirdi. Son zamanlar ”NATO-ya inteqrasiya islahatları" adı altında guya orduda islahatlar aparılır. Dəfələrlə qeyd etmişəm ki, bu islahatlar görüntü xarakteri daşıyır. Bununla əlaqədar ordu rəhbərliyi həmin adamları kənarlaşdırmaq məcburiyyətində qalır".
Müsahibimizin fikrincə, gələcəkdə müdafiə nazirinin həmin şəxslərdən şəxsi maraqları naminə istifadə etməyəcəyi sual altındadır: “Hazırda onların əvvəlki formada orduya dəvət edilməsinin müsbət nəticə verəcəyini fikirləşmək çox absurddur. Biz gördük ki, onların heç birinin xeyri olmadı. Bundan sonra da onların ordudan uzaqlaşdırılmasının yenilik gətirəcəyinə inanmıram. Sadəcə, Qərb qarşısında NATO ilə bağlanan əməkdaşlıq planına uyğun görüntü yaradılır”.
Ə.Məmmədov onu da bildirdi ki, bu kimi addımların nəticəsində orduda problemlər get-gedə artır və kütləvi xarakter alır.