QARABAĞDA MÜHARİBƏ TƏHLÜKƏSİ REALDIR

	12 fevral 2012


Onlayn ictimai-siyasi qəzet

Gündəm

QARABAĞDA MÜHARİBƏ TƏHLÜKƏSİ REALDIR

2010-03-11

Fransada danışıqların gözlənildiyi bir vaxtda Rusiya hərbi ekspertləri bu qənaətlə çıxış edir

Ermənistanla Azərbaycan prezidentləri arasında danışıqların yeni mərhələsini təşkil etmək üçün Fransa üzərindən müzakirələr davam edir. Martın 9-da bu ölkəyə səfər edən Ermənistan prezidenti Serj Sərkisyan dünən Yelisey sarayında prezident Nikola Sarkozi ilə görüşüb. Görüşdə Türkiyə-Ermənistan münasibətlərinin normallaşdırılması və Dağlıq Qarabağ münaqişəsinin həlli məsələləri əsas müzakirə mövzusu olub. Sərkisyanın səfər zamanı həmçinin Fransa Senatının rəhbəri Jerar Larje və Fransa Milli Məclisinin sədri Bernar Akkuayne ilə görüşəcəyi bildirilirdi. Ermənistan prezidentini xarici işlər naziri Edvard Nalbəndyan və diaspor naziri Qranuş Akopyan müşayiət edir.

Erməni mənbələri Parisdə Nalbəndyanın Minsk Qrupu həmsədrləri ilə görüşünün nəzərdə tutulmadığını xəbər verib. Xatırladaq ki, Fransanın Qarabağ münaqişəsinə dair tərəflərlə təmasa keçməsi Rusiya prezidenti Dmitri Medvedyevin ötən həftə Parisə səfərindən dərhal sonra başlayıb. Medvedyevlə Sarkozi Qarabağ münaqişəsinin nizamlanmasına dair birgə səylər göstərəcəklərini açıqlayıblar, elə həmin gün Rusiya XİN-də Qarabağ məsələsini kurasiya edən nazir müavini Qriqori Karasin Bakıya gəlib. Azərbaycan xarici işlər naziri Elmar Məmmədyarov onunla görüşün ardınca Parisə səfər edib və orada Minsk Qrupunun həmsədrləri, habelə Sarkozinin xarici siyasət müşaviri ilə müzakirələr aparıb. Nəhayət, Sərkisyan Parisə yollanmazdan bir gün əvvəl Ermənistan xarici işlər naziri Moskvada olub və həmkarı Sergey Lavrovla Qarabağa dair müzakirələr aparıb. Bütün bunlar danışıqların bu mərhələsində Rusiya ilə Fransanın ortaq şəkildə hansısa konkret məqamları razılaşdırmaq üçün tərəflərlə təmasa keçmələrindən xəbər verir.
Ehtimallara görə, yaxın aylarda Moskva Azərbaycan və Ermənistan prezidentlərinin növbəti görüşünü təşkil etmək əzmindədir. Bu görüş ya mayda, ya da iyunda baş tuta bilər. Mayın 9-da Moskvada Qələbənin 65 illiyi qeyd olunacaq. Buradakı şənliklərə həm Azərbaycan, həm də Ermənistan prezidenti dəvətlidir. İyunda isə Peterburqda növbəti beynəlxalq iqtisadi forum keçiriləcək. Son 3 ildə məhz bu forum çərçivəsində Azərbaycan və Ermənistan liderləri Qarabağ danışıqlarını aparıblar. Bu il də belə görüşün keçiriləcəyi istisna deyil. Bu baxımdan, şərhçilərə görə, Moskvanın Azərbaycan və Ermənistan rəsmiləri ilə təmaslarında belə görüşlərin hazırlanması da müzakirə edilə bilər. Lakin Əliyevlə Sərkisyan arasında görüşün göstərilən müddətlərdən daha tez, həm də bu dəfə Parisdə Sarkozinin vasitəçiliyi ilə baş tutması istisna olunmur. Bu, o halda baş verərdi ki, Fransa və Rusiyanın tərəflərlə son təmasları nəticəsində tərəflərin mövqelərini yaxınlaşdırmaq mümkün olsun.
Qarabağ danışıqlarının gedişi Türkiyədə də diqqətlə izlənilir. Əgər rəsmi Ankara bu məsələdə əvvəlcə kifayət qədər optimist görünürdüsə, son vaxtlar bu optimizm azalıb. “Hürriyet” qəzeti diplomatik qaynaqlara istinadən danışıqların gedişinin ürəkaçan olmadığını və tərəflərin Dağlıq Qarabağ ətrafındakı ərazilərin boşaldılması məsələsində hansısa anlaşmaya gəlməsinin yaxın perspektivlərdə mümkün görünmədiyini yazıb. Bu səbəbdən qəzet belə qənaətə gəlib ki, Türkiyənin Ermənistanla imzaladığı protokolları ratifikasiya etməsi də gözlənilmir. Danışıqların nəticəsiz qalması müharibə riskini də artırır və məlum olduğu kimi Azərbaycan rəhbərliyi son vaxtlar bu variantı tez-tez gündəmə gətirməyə başlayıb. Rusiyada da hərbi ekspertlər hesab edirlər ki, Azərbaycanla Ermənistan arasında müharibənin bərpası təhlükəsi tamamilə realdır. Bu barədə “Azadlıq” radiosunun rus xidmətinə hərbi ekspert Pavel Felqenhauer bildirib. “Hazırda situasiyanın dəyişməsi üçün real təhlükə mövcuddur. İndiyə qədər vəziyyətin kəskinləşməsini nə Bakıda, nə İrəvanda istəyirdilər. Ancaq indi hər şey dəyişib. Əliyev administrasiyası qarşısına ciddi vəzifə qoyub və bu vəzifənin öhdəsindən gəlmək üçün riskə gedib hərbi əməliyyatlara başlaya bilər. Məsələ ondadır ki, Azərbaycan hətta hərbi əməliyyatlarda gözlədiyi nəticəni əldə etməyə əmin olmadan da bu addıma gedə bilər” deyə, Felqenhauer bildirib. Ekspert deyib ki, Azərbaycan orduya böyük vəsaitlər yönəldir, lakin ölkədəki korrupsiya üzündən bu vəsaitlər istənilən nəticəni verməyib.

F.MƏMMƏDOV

5873 dəfə baxılıb