AKP SÜRİX PROTOKOLLARINI PARLAMENTDƏ DONDURACAQ

	12 fevral 2012


Onlayn ictimai-siyasi qəzet

Gündəm

AKP SÜRİX PROTOKOLLARINI PARLAMENTDƏ DONDURACAQ

2010-03-11

Ermənistan imzalarını geri çəkə bilər

Türkiyə Böyük Millət Məclisinin Xarici Əlaqələr Komitəsinin AKP-dən olan sədri Murad Mərcan deyib ki, Ermənistanla münasibətlərin qurulmasına dair Sürixdə imzalanan protokolların parlamentdən geri çəkilməsi barədə çağırışları başa düşür. Lakin protokolları parlamentdən geri çəkməkdənsə onları orada dondurmaq daha məqsədəuyğundur. Protokolların parlamentdən geri çəkilməsi haqda çağırışlar Türkiyənin müxalifət liderləri tərəfindən ABŞ Konqresinin Xarici Əlaqələr Komitəsində martın 4-də “erməni soyqırımı” layihəsinə dair keçirilən səsvermədən sonra dəfələrlə edilib.

CHP lideri Dəniz Baykal və MHP lideri Dövlət Baxçalı parlamentdəki son çıxışlarında bu çağırışlarını yeniləyərək deyiblər ki, AKP Konqresdəki səsverməyə cavab olaraq protokolları dərhal geri çəkməlidir. Müxalifət liderləri bəyan edir ki, bu vəziyyətin ortaya çıxması AKP-nin yanlış Ermənistan yaxınlaşması və birtərəfli güzəştlərə gedərək Sürix protokollarına imza atması ilə bağlıdır. Konqresdəki səsvermədən sonra bu protokolların heç bir mənası qalmayıb və gərəksiz kağız parçasına çevrilib. Ona görə də AKP onları geri çəkərək səhvini düzəltməlidir.
“Radikal” qəzetinə açıqlamasında Murad Mərcan müxalifət liderlərinin çağırışlarını şərh edərək deyib ki, protokolları geri çəkmək emosional addım olardı və Türkiyənin mövqelərinə zərbə vurardı. Ona görə də protokolları parlamentdə dondurmaq daha düzgündür: “Mən protokolları Xarici Əlaqələr Komitəsində saxlamaqla onları geri çəkmək arasında fərq görmürəm. Protokollar komissiyada uzun müddət qala bilər, biz tələsmirik. Bizi iki fakt narahat edirdi: Ermənistan Konstitusiya Məhkəməsinin qərarı və Dağlıq Qarabağ problemi. İndi buna daha biri ”“Konqresin Xarici Əlaqələr Komitəsində qəbul olunan layihə əlavə olundu. Ona görə də bu üç məsələ həllini tapmadan protokolların ratifikasiya üçün parlamentin gündəliyinə gətirilməsi mümkün olmayacaq”.
Ermənistan prezidenti Serj Sərkisyan isə Fransaya səfəri zamanı “Le Figaro” qəzetinə müsahibəsində deyib ki, Türkiyə bu protokolları başqa məqsədlə istifadə etməyə çalışsa onlar öz imzalarını geri çəkəcəklər. “Mənim Türkiyə ilə normal münasibətlər qurmaq istəyim böyükdür. Ancaq Türkiyənin son açıqlamaları məndə bu protokolların yaxın gələcəkdə ratifikasiya edilməyəcəyi haqda qənaət formalaşdırır. Biz xəbərdarlıq etdik, əgər Türkiyə bu normallaşma prosesini başqa məqsədlə istifadə etməyə cəhd göstərsə, buna lazım olan cavabı verəcəyik və protokollardan imzamızı geri çəkəcəyik” deyə, Sərkisyan bildirib. O deyib ki, əgər Türkiyə parlamenti protokolları ratifikasiya etsə Ermənistan elə ertəsi gün bu addımı atacaq.

1638 dəfə baxılıb