“İMKAN TAPDIQCA KREML QARABAĞ MÜNAQİŞƏSİNİ QIZIŞDIRACAQ”

	13 fevral 2012


Onlayn ictimai-siyasi qəzet

Gündəm

“İMKAN TAPDIQCA KREML QARABAĞ MÜNAQİŞƏSİNİ QIZIŞDIRACAQ”

2010-03-13

Boris Berezovski deyir ki, rus kəşfiyyatı Azərbaycanın dövlət institutlarında özlərinə yer eləmək üçün səy göstərirlər

Rusiyada axtarışda olan keçmiş oliqarx, yəhudi əsilli milyarder Boris Berezovski “Azadlıq” radiosuna müsahibəsində deyib ki, Kreml Dağlıq Qarabağ münaqişəsinin həllində maraqlı deyil. Çünki ənənəvi olaraq “parçala və hökm sür” prinsipinə üstünlük verir. Berezovski vaxtilə MDB-nin icraçı katibi olarkən Qarabağ münaqişəsinin həllinin tapılması üçün göstərdiyi səylər haqda danışaraq deyib ki, o zaman Rusiyanın münaqişənin həllinə necə əngəl yaratdığının şəxsən şahidi olub: “Mən dəfələrlə Ermənistan və Azərbaycan prezidentləri ilə görüşdüm, Qarabağ məsələsinin hər iki tərəf üçün məqbul variantını tapmaq üçün səy göstərdim.

Ancaq Rusiyanın hərbi və siyasi dairələrinin bu mürəkkəb məsələnin hər iki tərəfi qane edən həllinə qarşı necə müqavimət göstərdiyini görürdüm. Yəqin xatırlayırsınız ki, mən MDB icraçı katibi postundan azad edilməyim haqda xəbəri də Bakıda o vaxtkı prezident Heydər Əliyevlə görüş zamanı eşitdim. Həmin qərarın arxasında Yevgeni Primakov dayanırdı”.
Berezovski deyib ki, əgər Azərbaycan və Ermənistan bu məsələnin həllini tapmaq istəyirsə o zaman onların kömək üçün müraciət edəcəyi ən son ölkə Rusiya olmalıdır. Çünki Rusiya bu münaqişənin həllini həmişə tormozlayacaq və onu qızışdırmağa çalışacaq.
MDB ölkələrindəki vəziyyətə yaxından bələd olan Berezovski Qərbin postsovet ölkələrinin liderlərinin xaricdəki sərvətlərindən onlara qarşı təzyiq kimi istifadə etməsinin mümkünlüyü haqda danışarkən deyib ki, onun fikrincə, Qərb öz maraqlarından çıxış edərək rasional siyasət aparır. “Qərbin öz siyasətində demokratiya, azadlıq ideallarından çıxış edəcəyi haqda deyilənlər boş söhbətdir. Ona görə də postsovet məkanında azad, demokratik dövlətlərin meydana çıxacağı haqda təxminlər özünü doğrultmadı. Birdəfəlik dərk etmək lazımdır ki, azad, demokratik dövlət qurmaq üçün heç kim kənardan gəlib yardım etməyəcək, yəni suda boğulanın xilası onun öz əlindədir”. Berezovskiyə görə insanlar küçələrə çıxıb öz azadlıqlarını, hüquqlarını tələb etməlidir: “Bu gün mənim yaşadığım Londonda belə insanlar hakimiyyətin qərarlarına etiraz olaraq küçələrə çıxırlar, öz hüquqlarını tələb edirlər. Bəzən nümayişlərlə 400 min adam qatılır. Nə qədər ki, postsovet ölkələrində küçələrə yüz minlərlə adam çıxmayacaq, biz heç nəyə nail ola bilməyəcəyik”.
Kremlin qatı düşməni olan milyarder Azərbaycan prezidenti İlham Əliyevin son vaxtlar işğal edilmiş ərazilərin geri qaytarılması üçün BMT-nin özünümüdafiə prinsipinə əsaslanıb hərbi əməliyyatlara başlamaq qərarı verə biləcəyi barədə bəyanatlara toxunarkən deyib ki, o, Rusiyanın Gürcüstanda olduğu kimi bu situasiyada hərbi müdaxilədən çəkinməyəcəyini düşünür. “Lakin başqa məsələ də var. Siyasətdə blef etmək lazım deyil. Diplomatiyada blef etmək olar, ancaq siyasətdə yox. Ona görə də əgər deyiriksə ki, biz özünü müdafiə prinsipinə əsasən qərar veririk, bu təkcə söz olmamalıdır. Yaxşı hazırlanmış və o cümlədən hərbi variantın da yer aldığı plan olmalıdır” deyə, o bildirib.
“Kremlin Azərbaycan hakimiyyətinə və İlham Əliyevin yaxın ətrafına təsir imkanları nə qədərdir” sualına cavab olaraq Berezovski deyib ki, əgər ona Ukrayna ilə bağlı bu sualı versəydilər cavabı kifayət qədər dəqiq olardı: “Rusiya xüsusi xidmət orqanlarından böyük sayda adam hər gün, hər saat Ukrayna ilə məşğul olur. Azərbaycana gəldikdə isə mən ancaq təxminlərlə danışa bilərəm və deyərəm ki, onlar Azərbaycanın dövlət institutlarında özlərinə yer eləmək üçün hər cür səy göstərirlər. O cümlədən digər postsovet ölkələrində”.

F.MƏMMƏDOV

1286 dəfə baxılıb