EYNULLA FƏTULLAYEV TƏCRİDXANADAN MƏQALƏ YAZDI

	12 fevral 2012


Onlayn ictimai-siyasi qəzet

Gündəm

EYNULLA FƏTULLAYEV TƏCRİDXANADAN MƏQALƏ YAZDI

2010-03-13

Orlando Sapata Tamayo
“Realist olun, olmayanı arzulayın”

Bir neçə gün öncə kubalı vicdan məhbusu Orlando Sapata Tamayonun qəfil ölüm xəbəri məni çox sarsıtdı. Kastro rejiminin zindanlarında çürüdülmüş bu fədakar insan hələ ötən ilin dekabrın əvvəllərindən aclıq aksiyasına başlamışdı. Onun totalitarizmə qarşı etirazının - aclıq aksiyasının 86-cı günündə qəfil vəfatı bütün dünya mətbuatında böyük əks-sədaya səbəb oldu, lakin nədənsə mətbuatımız bu mövzudan yan ötdü.

Orlando Amnesty İnternational təşkilatı tərəfindən vicdan məhbusu kimi tanınmışdı və onun da müdafiəsi uğrunda dünyada böyük təbliğat kampaniyası aparılırdı. Hətta bir neçə ay bundan öncə Amnesty tərəfindən onun adına göndərilən məktubu texniki səhv ucbatından mənə göndərilən konvertdən aşkar etdikdən sonra Orlando haqqında məlumat yığmağa başladım. O, 32 nəfər vicdan məhbusundan biri idi. Deməli, 31 nəfər qaldıq.
Məndən fərqli olaraq, Orlando jurnalist deyildi, tikintidə çilingər və bənna kimi çalışırdı. Çox kasıb adam idi. Lakin 2003-cü ildə Fidelin gerontakratik və marazmatik rejimindən boğaza yığılıb, “Azadlıq adası” üçün söz azadlığı və demokratiya tələb etdi, həbsdə olan jurnalistlərin qeyd-şərtsiz azadlığa buraxılması istəyini dilə gətirdi. Dövlətin cəza aparatı isə bir çilingərin sərbəst düşüncəsinə davam gətirə bilmədi. Hökumət qüvvələrinə hörmətsizlik etməsi adıyla onu zindana atdı. Orlando 3 illik həbs cəzasına məhkum edilsə də, Fidelin qəddar rejimi bu cəza ilə kifayətlənməyib, ona qarşı növbəti uydurma ittihamlar kəşf edərək, üsyançı çilingərə daha 25 il (!) əlavə cəza kəsdi. 6 ildən çox həbsxanada qalan vicdan məhbusu müddətsiz aclığa başladı. 3 aya yaxın, daha dəqiqi isə 86 gün ərzində mübarizəsini davam etdirə bildi. Orlando 42 yaşında dünyadan köçdü. Bu, əsl tarixin ironiyasıdı! Kubanın azadlığı və firavanlığı uğrunda canını fəda etmiş Çe də sosialist inqilabının salnaməsinin yeni Boliviya səhifəsinə imza atarkən ömrünün 42-ci baharına qədəm qoymuşdu. Bir qəhrəmanın romantik idealından doğmuş eybəcər dövlət başqa bir qəhrəmanın həyatına və ideallarına son qoydu. Həyatın ən böyük paradoksu - gözümüzün önündə həqiqətlər bir-birini inkar edir.
Çenin silahdaşı Raul Kastro isə dünyadan gələn etirazlar axını qarşısında üzr istəməli oldu. Amma Kubanın zindanlarında hələ 22 jurnalist qalmaqdadır. Yazılanlara görə, Fidel isə publisistik yaradıcılıqda özünə yeni məşğuliyyət tapıb. Azadlıq eşqinin publisistik despotizmə getdiyi yol azad fikirli çilingərin məhvindən keçdi. Və bütün bu qəddarlıq əbədiyyata qovuşmuş təvazökar Kondotyevin, Gevaranın portretləri fonunda baş verir. Doğrudan da ən böyük inqilablar insanların qəlbində baş verir. Əks-inqilablar kimi.
Orlando Sapata Tamayo Kubada əzabkeşə çevrildi. Kuba xalqı Orlando üçün göz yaşı tökür. Görəsən, göz yaşı seli Kubanı despotizmdən xilas edəcəkmi?..
Məni isə başqa sual düşündürür: görəsən Azərbaycanda hansısa bənna demokratik dövlət arxitekturasını xəyalına gətirirmi? Demokratik dövlət binasının tikintisi üçün bir daş da olsa, əsirgəməzmi? Görəsən, bizim məmləkətdə çilingər dissidentliyə can atıb, non-konformizm zirvəsinə ucala bilərmi? Demokratiya uğrunda 86 gün ac qalıb “ideallarımızı qaytarın” tələb-çağırışını səsləyərmi?
P.S. Rəbiyyət Aslanovanın fikrincə, Orlando Sapata Tamayo Kuba xalqı üçün şər olub. Xanım-deputat Kuba xalqını Fidel və Raul Kastro qardaşları arasında sıx birləşməyə çağırır, Kuba Kommunist Partiyasının daxili və xarici siyasətini səmimi dəstəklədiyini bildirir. "Amnesty İnternational" kimi təşkilatlar isə Kuba və Azərbaycan kimi dövlətlərə qarşı pozucu fəaliyyət göstərir (Rəbiyyət Aslanovanın Havanadakı çıxışından).

Eynulla FƏTULLAYEV

1352 dəfə baxılıb