RƏSMİ BAKI FRANSALI HƏMSƏDRİN DEDİKLƏRİNİ ARAŞDIRIR

	13 fevral 2012


Onlayn ictimai-siyasi qəzet

Gündəm

RƏSMİ BAKI FRANSALI HƏMSƏDRİN DEDİKLƏRİNİ ARAŞDIRIR

2010-03-14

Elxan Poluxov: “Nəticə etibarilə bizim məsələyə münasibətimiz olacaq”
Vəfa Quluzadə: “Fasyenin bəyanatı diplomata yaraşan bəyanat deyil”

ATƏT-in Minsk Qrupunun fransalı həmsədri Bernar Fasye növbəti dəfə anti-Azərbaycan mövqeyi ilə diqqəti özünə cəlb edə bilib. Vaxtaşırı tutduğu vəzifəyə və missiyasına uyğun olmayaraq qərəzli mövqe sərgiləyən diplomat bu dəfə də işğalçı Ermənistana bəraət qazandıran fikirlər söyləyib.

“Dağlıq Qarabağ münaqişəsi zonasında hərbi əməliyyatlar başlayarsa, Azərbaycan qələbə qazana bilməz. Şəxsən mən Ermənistan və Qarabağ döyüşçülərinin mərdliyinə bələdəm” , - deyə Fasye bildirib. Diplomat əlavə edib ki, müharibə Azərbaycana fayda gətirməyəcək və onun maliyyə maraqlarına, neft satışına zərər verəcək. Onun sözlərinə görə, Azərbaycan iqtisadiyyatına sərmayə qoyan beynəlxalq sərmayədarlar öz vəsaitlərinin təhlükə altında qalmasını istəməyəcəklər və Azərbaycana kapital qoymaqdan imtina edəcəklər.
Qeyd edək ki, artıq Azərbaycanın Müdafiə Nazirliyi Fasyenin dediklərinə reaksiya verib. Mətbuat xidmətinin rəisi Eldar Sabiroğlu fransalı həmsədrin Ermənistan və Qarabağ döyüşçüləri barədə dediklərinə təəccüblənmədiyini, onun ənənəvi mövqedən çıxış etdiyini bildirib.
Politoloq Vəfa Quluzadə hesab edir ki, fransız həmsədrdən inciməyə dəyməz: “Nə qədər təəssüf doğursa da, etiraf etməliyik ki, Fasye düz deyib. Haqlı olaraq bildirib ki, Qarabağda müharibə başlasa, Azərbaycan uduzacaq. Fasye yeni vəzifəyə təyin olunanda onunla ilk görüşənlərdən biri də mən olmuşam və bir sıra məsələləri müzakirə etmişik. O, gözəl başa düşür ki, Azərbaycan torpaqlarını işğal edən Ermənistan yox, Rusiyadır. Yəni əgər Azərbaycan torpaqlarını müharibə yolu ilə azad etmək istəsə, o zaman Ermənistan yox, Rusiya döyüşəcək. Bizim hərbi bəyanatlarımız ermənilərə müəyyən mənada əsas verir. Ona görə də məsləhət görərdim ki, bu tipli bəyanatlar verməsinlər. Unutmaq olmaz ki, Ermənistanın arxasında həm də Qərb dayanır”.
Ancaq V.Quluzadə bəyanatı diplomata yaraşan bəyanat saymadı: “Həmsədr ölkənin təmsilçisi belə bəyanatlar verməməlidir. Onlar özlərini diplomatik aparmalı, ümumi diplomatik ibarələr işlətməlidirlər. Əgər artıq onların diplomatik ifadələri tükənibsə, mənə müraciət etsinlər. Mən keçmiş diplomatik fəaliyyət baqajımdan istifadə edib onlara köməklik göstərərəm”.
XİN-in mətbuat katibi Elxan Poluxov isə məsələnin araşdırıldığını bildirdi: “Cənab Fasye tərəfindən belə bir bəyanatın verilib-verilmədiyini araşdırırıq. Nəticə etibarilə bizim məsələyə münasibətimiz olacaq. Amma fikrimizcə, həmsədr ölkənin nümayəndəsinin hansısa tərəfin mövqeyindən çıxış etməsi o qədər də inandırıcı görünmür. Həmsədrlər münaqişənin həllində bitərəf olmağa çalışmalı, kifayət qədər tarazlaşdırılmış ifadələr işlətməlidirlər”.
Bəs, fakt təsdiqini taparsa, Fasyedən imtina məsələsi gündəmə gətirilə bilərmi? E.Poluxovun cavabı diplomatik oldu: “Hansısa ölkənin nümayəndəsi açıqlamalarında bitərəf mövqedən çıxış etmirsə, bu, artıq həmin ölkənin məsələyə nə qədər ciddi yanaşmasının göstəricisidir”.