TÜRKİYƏDƏN AVROPA ÖLKƏLƏRİNƏ “SOYQIRIMI” HƏDƏSİ

	13 fevral 2012


Onlayn ictimai-siyasi qəzet

Gündəm

TÜRKİYƏDƏN AVROPA ÖLKƏLƏRİNƏ “SOYQIRIMI” HƏDƏSİ

2010-03-14

Əhməd Davudoğlu: “Cavabımız çox sərt olacaq”

Türkiyənin xarici işlər naziri Əhməd Davudoğlu İsveç parlamenti tərəfindən “erməni soyqırımı”nın tanınmasından sonra ilk dəfə bu ölkənin xarici işlər naziri Karl Bildtlə görüşüb. Avropa İttifaqına üzv ölkələrin xarici işlər nazirlərinin qeyri-rəsmi görüşü üçün Finlandiyada olan Davudoğlu Bildtə deyib ki, İsveç parlamentinin qərarı iki ölkə münasibətlərinə ciddi zərbə vurdu.

Bildt isə deyib ki, parlamentin qərarı böyük səhvdir və hökumətin onu qəbul etməsi mümkün deyil. Davudoğlu dost İsveç parlamentindən belə qərar gözləmədiklərini deyərək bildirib ki, əgər bu cür təxribatçı təşəbbüslər digər Avropa ölkələrinə də yayılarsa, Türkiyənin reaksiyası çox sərt olacaq: “Bəziləri 1915-ci il hadisələrini erməni məsələsi saya bilər, ancaq bu, bizim üçün türk millətinin çox böyük ordulara qarşı müdafiə etdiyi Çanaqqala deməkdir”.
Bildt isə məyusluğunu ifadə edərək deyib ki, tarixi məsələlər parlament qərarları ilə siyasiləşdirilməməlidir. Nazirin fikrincə, artıq qərar qəbul olunduğundan bundan sonra nəticələrə baxmaq lazımdır. K.Bildt Türkiyənin etirazlarını başa düşdüyünü bildirsə də səfirin geri çağırılmasından üzgün olduğunu da deyib. O deyib ki, qəbul olunan qərara baxmayaraq İsveç Türkiyənin Avropa Birliyinə üzvlüyünə verdiyi böyük dəstəyi davam etdirəcək: “Türkiyəni gələcəkdə görmək istədiyimiz Avropanın bir parçası olaraq dəyərləndiririk və bu məsələdə əlimizdən gələn dəstəyi veririk”.
Xarici işlər naziri deyib ki, İsveçdə “erməni soyqırımı” ilə bağlı mübahisələr olub və hökumət parlamenti bu qərarın yanlış olduğuna inandırmağa çalışıb. Onun sözlərinə görə, bu səsvermə İsveçdə hər il keçirilir. Amma bu il daxili siyasi mübahisələr üzündən qərar qəbul olunub.
Xəbərlərə görə, erməni lobbisi “soyqırımı” layihəsini İsveçdən sonra İspaniya parlamentinin iclasında qaldırmağa hazırlaşır. Artıq İspaniya parlamenti qondarma “soyqırımı” ilə bağlı qanun layihəsini gündəliyə salmaq qərarına gəlib. Təşəbbüsün müəllifləri solçu Kataloniya Respublika Partiyası (ERC) və Yaşıllar Partiyasının üç deputatıdır. Qeyd edək ki, martın əvvəlində Kataloniyanın qanunverici orqanı səs çoxluğu ilə “erməni soyqırımı”nı tanımışdı. Almaniyada da məsələni parlamentə çıxarmaq üçün iş gedir.
“Cümhuriyyət” qəzetinin köşə yazarı Çengiz Candar isə dünənki məqaləsində yazıb ki, Ankaranın “soyqırım”ın tanınmasına qarşı reaksiyası adekvat deyil: “Belə getsə, Türkiyənin Qərb ölkələrində səfiri qalmayacaq”. Ç.Candar deyir ki, ortaya çıxan bu durum Türkiyə xarici siyasətində yol verilən yanlışlıqlardan qaynaqlanır. Hökumət Ermənistanla protokolları imzalasa da Azərbaycanın mövqeyi üzündən onu həyata keçirə bilmədi. Müəllif yazır ki, bu günlərdə Türkiyə hökumətinin yüksək səlahiyyətli nümayəndəsi ona belə deyib: “Türk mediası Azərbaycan prezidenti İlham Əliyevi ortaya çıxan bu durumdakı payına görə niyə tənqid etmir?” Müəllif bu irada belə cavab verir: “İki il əvvəl İsveçrədə Ermənistanla gizli danışıqlar başlayanda Azərbaycan da yerində idi, Qarabağ problemi də qalırdı, üstəlik MHP və CHP-nin necə davranacağı hökumətə bəlli idi. Ancaq bunları nəzərə almadan işləri protokolların imzalanmasına qədər gətirdilər. Mən sual edirəm: Qarabağ ağlınıza yenimi gəldi? Əgər belə idisə, iki il əvvəl Ermənistanla gizli danışıqlara başlamayaydınız”.

Siyasət şöbəsi

2526 dəfə baxılıb