“TÜRKİYƏ İLƏ AZƏRBAYCANIN XARİCİ SİYASƏTİ QÜSURLUDUR”

	13 fevral 2012


Onlayn ictimai-siyasi qəzet

Gündəm

“TÜRKİYƏ İLƏ AZƏRBAYCANIN XARİCİ SİYASƏTİ QÜSURLUDUR”

2010-03-16

Sərdar Cəlaloğlu: “Mitinqlər məsələsində iqtidar və müxalifət birgə hərəkət eləməlidir”

Türkiyənin qondarma “erməni soyqırımı” iddiası ilə əlaqədar ciddi təzyiqlərlə üzləşdiyi bir məqamda qardaş ölkəyə dəstək olaraq Azərbaycan müxalifətinin də üzərinə düşən məsələlərin olduğu deyilir. Bəzi partiyaların Türkiyəyə dəstək aksiyaları keçirməsi, yaxud qondarma aktı qəbul edən ölkələrin səfirlikləri qarşısında piketlərin təşkilinin zəruriliyi vurğulanır. Hesab olunur ki, müxalifət Türkiyəyə dəstək məsələsində bəyanat müstəvisindən bir az irəli getməlidir.

Qeyd edək ki, artıq Ümid Partiyası və “Xilaskar” İctimai Birliyi ilk belə tədbiri keçirib və Türkiyəyə dəstəyini nümayiş etdirib. Bəs aparıcı müxalifət təşkilatları indiki durumda hansı addımları planlaşdırır? Türkiyəyə dəstək məsələsində onların hansı ideyaları var? Müxalifət liderlərinin Türkiyəyə səfərləri gözlənilirmi?
Müsavat Partiyası başqanının müavini, millət vəkili Arzu Səmədbəyli bildirdi ki, hələlik müxalifətin digər tədbirlər keçirməsinə ehtiyac duyulmur: “Elə partiya Divanının son iclasında da bu məsələlər müzakirə olundu və İsveç parlamentinin qondarma ”soyqırım" qərarı verməsinə etiraz bildirildi. Biz bölgədə Azərbaycan və Türkiyənin uzlaşmış siyasət yürütməsinin tərəfdarıyıq. Yəni hər iki dövlətin mənafeyinə uyğun olaraq ortaq mövqe qoyulmalıdır. Ümumiyyətlə, Türkiyə və Azərbaycanın uzlaşdırılmış, dövlət mənafelərinə uyğun siyasət həyata keçirilməlidir". A.Səmədbəyli qarşılıqlı səfərlərin həyata keçirilməsini zəruri sayır.
ADP sədri Sərdar Cəlaloğlu Türkiyə və Azərbaycanın hadisələrin arxasınca getməsindən təəssüfünü ifadə etdi: “Demək olar ki, ermənilər gündəmi müəyyənləşdirir, biz isə o gündəmə uyğun olaraq özümüzü müdafiə edirik. Ancaq ən yaxşı müdafiə hücumdur. Türkiyə və Azərbaycan əlində olan kartlardan demək olar ki, istifadə etmir. Ermənilər hələ bu günə qədər bir dənə toplu məzarlıq çıxarıb sübut edə bilməyiblər ki, burda genosid olub. Azərbaycan ərazisində yüzlərlə toplu məzarlıq aşkar olunub. Ermənilər 100 il bundan əvvəlki hadisələri gündəmə çıxara bilirlər, Azərbaycan və Türkiyə dünən olmuş Xocalı hadisəsini bu günə qədər gündəmə çıxara bilməyib. Əsas problem bundan ibarətdir. Biz həmişə gözləyirik ki, ermənilər bir addım atır, sonra o addımı neytrallaşdırmaq üçün boş-boş vaxt sərf edirik. Türkiyə və Azərbaycan bu günə qədər ermənilərin törətdikləri soyqırım aktı ilə bağlı dünya ictimaiyyətində, dünya parlamentlərində heç bir məsələ qaldırmayıb. Amerika Konqresinə biz də Xocalı genosidi ilə bağlı müraciət göndərməliydik ki, paralel baxsınlar. Biz də faktları qoyardıq, ermənilər də. Onda yəqin ki, fərqli qərar qəbul olunacaqdı, ya da ən pis variantda ikisindən də imtina olunacaqdı. Ancaq bunları eləmirik. Ona görə də mən Türkiyə və Azərbaycanın xarici siyasətini ən qüsurlu siyasət hesab edirəm”.
S.Cəlaloğlu Azərbaycan müxalifətinin proseslərdə aktiv iştirak etməməsi, Türkiyəyə lazımi dəstək verməməsi barədə fikirlərə də reaksiya verdi: “Türkiyənin heç bir dairəsi bizimlə görüşməyə o qədər də maraqlı deyil. Heç burda Türkiyə dövlətinin yaranmasının ildönümü keçiriləndə ADP heç vaxt ora dəvət olunmur. Türkiyə bizdən küsülüdür. Bir misal var, sən məni sevməsən də mən səni sevəcəyəm. Biz də elə olası deyilik ki. O ki qaldı piket, mitinq keçirilməsinə, fikrimcə, bu məsələdə iqtidar və müxalifət birgə hərəkət eləməlidir. Burda kənardan görünsə ki, iqtidar və müxalifətin məsələyə mövqeyi fərqlidir, bu, işimizin xeyrinə yox, əleyhinə olar”.

E.PAŞASOY

708 dəfə baxılıb